هەواڵ
رونکردنەوەیەک لە وەزارەتی داراییەوە
وەزارەتی دارایی حکومەتی ھەرێم لەڕونکردنەوەیەکدا ئاشکرایدەکات، ئەو ڕێنماییەی دوو ڕۆژ بەر لەئێستا بڵاویانکردەوە تایبەت بەگێڕانەوەی پارەی نەدراوی فەرمانبەران، پاشەکەوتی موچە ناگرێتەوە، لەو ڕوەشەوە زانیاریی زیاتر ئاشکرادەکات.

بەگوێرەی ڕونكردنەوەیەكی وەزارەتی دارایی كە وێنەیەكی بۆ SNN نێردراوە تێیدا ئەوەهاتوە ((ئاماژە بەڕێنماییمان ژمارە (18)ی ساڵی 2018و بەهۆی ئەو لێكدانەوە جیاجیایانەی كە بۆی كراوە، لەڕێگەی ئەم ڕونكردنەوەیەوە مەبەستی ڕێنماییەكە دەیخەینەڕوو، كە بۆ كەمكردنەوەی ڕۆتینات و دەسەڵاتدانە بەبەڕێوەبەرایەتی گەنجینەكانی سەر بەوەزارەتمان)).

دارایی ئاماژەی بەوەشكردوە، "ئەم ڕێنماییە خەرجكردنەوەی پاشەكەوتی موچەی فەرمانبەران نییە كە بەگوێرەی ڕێنماییمان ژمارە (15)ی ساڵی 2016و لەسەر بنەمای بڕیاری ئەنجومەنی وەزیران ژمارە 64 لەڕۆژی 3ی 2ی 2016 جێبەجێكراوە، بەڵكو تەنها خەرجكردنەوەی جیاوازی موچەیە (موچەی بنەڕەتی و دەرماڵەكان)".

لەبارەی خەرجكردنەوەی جیاوازی موچەش جەختیكردۆتەوە، "(موچەی بنەڕەتیەكەی و دەرماڵەكان) مانگەكانی ساڵی 2017 كە بەهەڵە ‌یان بەهۆی دواكەوتنی فەرمانە كارگێڕییەكان خەرجنەكراوەو لەگەڵ موچەی مانگی كانونی یەكەمی 2017 بەستراون، بەهۆی ئەوەی موچەی مانگی كانونی یەكەمی ساڵی 2017 كراوەتەوە پاشەكەوت، بڕی ئەم جیاوازییەی كە فەرمانبەر شایستەی دەبێت بۆی خەرجدەكرێتەوە".

وەزارەتی دارایی نمونەی هێناوەتەوەو ئاماژەی بەوەداوە، فەرمانبەرێك شایستەی سەرموچەی ساڵانە‌بێت لەڕۆژی 1ی 10ی 2017، بەڵام فەرمانی كارگێڕی دوابكەوێت بۆ مانگی (11)ی ساڵی 2017و جیاوازی سەرموچەی لەڕۆژی 1ی 10ی 2017 تاكو 31ی 11ی 2017 لەگەڵ موچەی مانگی (كانونی دوەمی) ساڵی 2017 بۆ بەسترابێت، لەم‌ حاڵەتەدا ئەم جیاوازییەی بۆ خەرجدەكرێتەوە.

ئەوەشی باسكردوە، یاخود فەرمانبەرێك شایستەی دەرماڵەی هاوسەریی ‌بێت بەبڕی (50)هەزار دینار مانگانە لەمانگی (11)ی ساڵی 2017وە بۆی خەرجنەكرابێت، لەم حاڵەتەدا ئەگەر ئەم دەرماڵەیە لەگەڵ موچەی مانگی (12)ی 2017 بۆی بەسترابێت ئەوا ئەم دەرماڵەیەی كە بڕی (50)هەزار دینارە بۆی خەرجدەكرێتەوە.

سەبارەت بەو فەرمانبەرانەشی لەگەڵ موچەی مانگی (11)ی 2017ی بۆ خەرجنەكرابێت، تەئكیدیكردۆتەوە، "لەگەڵ موچەی مانگی (12)ی 2017دا بۆی بەسترابێت ئەوكات موچەی مانگی (11)ی 2017دا بۆ خەرجدەكرێتەوە".

لەكۆتایی ڕونكردنەوەكەشدا وەزارەتی دارایی ئەوەشی نوسیوە:"هەر جیاوازییەكی موچەیی و دەرماڵەیی فەرمانبەر كە شایستەیەتی، بەڵام بۆی خەرجنەكراوەو لەگەڵ موچەی مانگی (12)ی 2017 تۆماركرابێت، ئەوا بۆی خەرجدەكرێتەوە بەلیستی جیاو لـەكاتی دابەشكردنی موچەی مانگانەیدا".


SNN:

بەشی هەواڵ

  2 مانگ پێشتر - Oct 9 2018 1:23PM
Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2018 SNN. All Rights Reserved.