هەواڵ
پەخشی ژمارەیەك كەناڵی تەلەفزیۆن و ڕادیۆ ڕادەگیرێت
ژمارەیەك كەناڵ و رادیۆی ناوخۆیی لەهەرێمی كوردستان سزادەدرێن و بەڕێوەبەری گشتی ڕاگەیاندن و چاپ و بڵاوكردنەوەش، وردەكاری سزادانی ئەو كەناڵانە ئاشكرادەكات، ڕاشیدەگەیەنێت: بەشێكیان كرێی نوێكردنەوەی زیاتر لەپێنج ساڵیان لەئەستۆیەو تا قەرزەكان نەدەنەوە، ڕێگە بەپەخشەكانیان نادرێت.

محەمەد گەردی، بەڕێوەبەری گشتیی ڕاگەیاندن و چاپ و بڵاوكردنەوە لەوەزارەتی ڕۆشنبیری، بەSNNی ڕاگەیاند: ئەو مۆڵەتەی درایە كەناڵەكانی تەلەفزیۆن و ڕادیۆ لەهەرێمی كوردستان، بۆئەوەی مۆڵەتەكانیان نوێ بكەنەوە كۆتاییهات، لەهەفتەی داهاتووەوە دەست بەگرتنەبەری ڕێوشوێنەكان بەرامبەریان دەكرێت.

وتیشی:" سزادانەكە كەناڵێكی ئاسمانی و ژمارەیەكی زۆر لە رادیۆو كەناڵە ناوخۆییەكانی تەلەفزیۆن دەگرێتەوە، هۆكاری سەرەكی سزادانیشان بۆ قەرزاریان و نوێنەكردنەوەی مۆڵەتەكانیان دەگەڕێتەوە".

سەبارەت بەجۆری سزاكانیشیان، محەمەد گەردی ئاشكرایكرد: بەپشت بەستن بەڕێنماییەكانی وەزارەتی ڕۆشنبیری، پەخشی ئەو كەناڵانە ڕادەگرین و چیتر ڕێگە بەپەخشیان نادەین تا مۆڵەتەكانیان نوێ نەكەنەوە، چونكە بەشێكیان زیاتر لەپێنج ساڵ كرێی نوێكردنەوەی مۆڵەت قەرزارن.

بەوتەی ئەو بەرپرسەی وەزارەتی ڕۆشنبیری، ئەو كەناڵانەی دادەخرێن قەرزیان لەسەر كەڵەكەبووە، بەگوێرەی تایبەتمەندی پەخشەكانیان قەرزیان لەسەرە، دەشڵێت: "كرێی كردنەوەی كەناڵێكی تەلەفزیۆن بۆ یەك پارێزگا بڕی 10 ملیۆن دینارەو نوێكردنەوەی ساڵانەشی دوو ملیۆن و 500 هەزار دینارە، بۆ سەرجەم پارێزگاكان 20 ملیۆن دینارەو كرێی نوێكردنەوەكەشی 5 ملیۆنە". 


SNN:

ڕەنج تاڵیب

  2 مانگ پێشتر - Oct 11 2018 6:52PM
Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2018 SNN. All Rights Reserved.