مێژووی شار
مێژووی شاری سلێمانی له‌ مانگی ئه‌یلول دا



 *        له‌ 3 ی ئه‌یلولی ساڵی 1924 به‌مه‌به‌ستی یارمه‌تی دانی ده‌وڵه‌تی عێراق له‌ دژی شۆڕشه‌كه‌ی شێخ مه‌حمود ، رژێمی شاهانه‌ی ئێران به‌700 سه‌ربازی سواره‌ و  300 سه‌ربازی پیاده‌وه‌ ، هێرشی كرده‌ سه‌ر ناوچه‌كانی پشده‌ر . شۆڕشگێره‌كانی شێخ مه‌حمود رووبه‌ڕویان بوونه‌وه‌ و له‌ئه‌نجامدا هێزه‌كانی رژێمی شای ئێران دوای ئه‌وه‌ی ژماره‌یه‌كی زۆریان لێ‌ كوژرا ، به‌ناچاری له‌ ناوچه‌كه‌ كشانه‌وه‌ .

*        له‌ 3 ی ئه‌یلولی ساڵی 1975 ( عبدالقادر قڕگه‌یی) شاعیر له‌ شاری هه‌ولێر كۆچی دوایی كرد . (عبدالقادر محمد احمد) ساڵی 1898 له‌ شاری كه‌ركوك له‌دایك بووه‌ . باوكی له‌ كاتی جه‌نگی یه‌كه‌می جیهانی دا هاتۆته‌ شاری سلێمانی و كراوه‌ به‌ئه‌ندامی دادگای سلێمانی . عه‌بدولقادر قڕگه‌یی له‌ سلێمانی خوێندنی ته‌واوكردوه‌ و پاشان بووه‌ به‌ به‌ڕێوه‌به‌ری داهاتی سلێمانی و دواتر   له‌ شاره‌كانی رومادی  و كه‌ركوك و هه‌ولێر كاری كردوه‌ و  ساڵی 1958 خانه‌نشین كراوه‌ . ئه‌م شاعیره‌ جگه‌ له‌ شیعر چه‌ندین چیرۆكی نوسیوه‌ و  ناوه‌رۆكی شیعره‌كانی هۆشیاركردنه‌وه‌ی میلله‌تی كورد و پشتگیری داواره‌واكانی بووه‌ .

*        له‌ 3 ی ئه‌یلولی ساڵی 1987 رژێمی به‌عسی روخاو به‌ چه‌كی كیمیایی بۆ ردومانی یاخسه‌مه‌ر و گونده‌كانی دۆڵی جافه‌تی كرد . له‌ئه‌نجامدا چوار پێشمه‌رگه‌ی (ی.ن.ك) شه‌هیدبوون و ژماره‌یه‌كیش برینداربوو .

*        له‌ 4 ی ئه‌یلولی ساڵی 1926  ، كاربه‌ده‌ستانی به‌ریتانیا له‌ عێراق به‌ناچاری له‌گه‌ڵا (شێخ مه‌حمود) دا كه‌وتنه‌ دانوستان و گفتوگۆ. سه‌ره‌تای گفتوگۆكان له‌ شارۆچكه‌ی خورماڵی شاری سلێمانی ئه‌نجامدرا . له‌و دانیشتنه‌دا كه‌ سێ‌ سه‌عاتی خایاند گه‌یشتنه‌ رێكه‌وتنێك و هێمنی و له‌ 4 ی ئه‌یلولی ساڵی 1988 دوای ئه‌وه‌ی رژێمی به‌عسی روخاو  پڕۆسه‌ی به‌دناوی ئه‌نفالی له‌

*        له‌ 4 ی ئه‌یلولی ساڵی  1993 دا ئه‌دیب و نوسه‌ر ( جه‌لال ته‌قێ‌ ) كۆچی دوایی كرد. مامۆستا جه‌لال ته‌قێ‌ ساڵی 1939 له‌ سلێمانی له‌دایك بوه‌ و هه‌رله‌م شاره‌ قۆناغه‌كانی خوێندنی سه‌ره‌تایی و ناوه‌ندی و ئاماده‌یی ته‌واو كردووه‌ . ساڵی 1960 له‌به‌ر زیره‌كی و سه‌ركه‌وتنی له‌ خوێندنی ئاماده‌ییدا  بۆ ته‌واو كردنی خوێندنی باڵا نێردراوه‌ بۆ مۆسكۆ . ساڵی 1967 كۆلێژی ئه‌ندازه‌ی بیناسازی له‌ مۆسكۆ ته‌واو كردوه‌ . له‌ مۆسكۆ  كچێك به‌ناوی ( نینا ) ده‌ناسێ‌ و پاشان ده‌بێته‌ هاوسه‌ری و له‌گه‌ڵیدا دێته‌وه‌ بۆ ولكوردستان به‌ڵام له‌ سه‌ره‌تای ساڵانی حه‌فتاكاندا ئه‌م ژنه‌ كۆچی دوایی ده‌كات . ئه‌ندامی چالاكی كۆمه‌ڵه‌ی خوێندكارانی كورد بووه‌ له‌ ئه‌وروپا . له‌بواری ئه‌ده‌بیدا گه‌لێك بابه‌تی چیرۆك و شانۆگه‌ری له‌ زمانی روسیه‌وه‌ كردوه‌ به‌ كوردی .

*        له‌5 ی ئه‌یلولی ساڵی 1922 پاش ئه‌وه‌ی شێخ مه‌حمودی حه‌فید شۆڕشی له‌ دژی ئینگلیزه‌كان به‌رپاكرد . هێزه‌ سه‌ربازیه‌كانی ئینگلیز له‌ شاری سلێمانی كشـانه‌وه‌ و شاره‌كه‌یان چۆڵا كرد و ده‌سه‌ڵاتی شاره‌ه‌كه‌یان دایه‌ ده‌ست ئه‌نجومه‌نێك كه‌ شێخ قادر به‌رزنجی سه‌رپه‌رشتی ده‌كرد .

*        له‌5 ی ئه‌یلولی ساڵی 2007  به‌ ئاماده‌بوونی (مام جه‌لال)- سه‌رۆك كۆماری عێراق‌و  (د.به‌رهه‌م ساڵح)- جێگری سه‌رۆك وه‌زیرانی عێراق و ژماره‌یه‌ك له‌وه‌زیرانی كوردستان‌و عێراق و چه‌ندین لێپرسراوی حزبیی و حكومیی‌و ژماره‌یه‌كی زۆر له‌بازرگانانی ناوخۆیی و بیانیی، دووه‌مین پێشانگای نێوده‌وڵه‌تیی سلێمانی له‌ناوچه‌ی بازرگانی ئازاد له‌ تاسلوجه‌ كرایه‌وه‌ به‌ به‌شداری (200) كۆمپانیای تایبه‌تمه‌ند له‌بواره‌ جیاوازه‌كاندا. له‌و پێشانگایه‌دا چه‌ندین كاڵای جۆراوجۆری تیادا نمایشكرا‌و ژماره‌یه‌كی به‌رچاو كۆمپانیای بیانی‌و كه‌رتی تایبه‌ت به‌شدارییان تێدا كردبوو.

*        له‌6 ی ئه‌یلولی ساڵی 1930 و له‌ڕۆژێكی وه‌ك ئه‌مڕۆدا كۆمه‌ڵێك خه‌ڵكی شۆڕشگێڕ له‌شاری سلێمانی به‌مه‌به‌ستی ناڕه‌زایی ده‌ربڕین به‌رامبه‌ر به‌ هه‌ڵنه‌بژاردنی نوێنه‌ری راسته‌قینه‌ی شاری سلێمانی بۆ پارله‌مانی عێراق و پشتگوێ‌ خستنی مافه‌ ڕه‌واكانی گه‌لی كورد له‌ په‌یمانی ( عێراق به‌ریتانیا)دا ، له‌ به‌رده‌ركی سه‌رای سلێمانی  ده‌ستیانكرد به‌هوتافكیشان دژی حكومه‌تی پادشایه‌تی عێرا ق، حكومه‌تی ئه‌و كاته‌ش به‌ده‌ستڕێژی گولله‌ وه‌ڵامی خۆپیشانده‌رانی دایه‌وه‌و له‌ ئه‌نجامی ئه‌و كاره‌ساته‌دا نزیكه‌ی (45) هاوڵاتی شه‌هید و ( 195) كه‌سی تریش برینداربوون هه‌روه‌ها سه‌دان كه‌سیش ده‌ستگیر كران له‌ ناویاندا بێكه‌سی شاعیر بوو . ئه‌م ڕۆژه‌ له‌مێژووی گه‌لی كورددا به‌ڕۆژی ڕِه‌شی (6)ی ئه‌یلول ناسراوه‌.

*        له‌6 ی ئه‌یلولی ساڵی 1966 ، فه‌تحی شاعیر،  كۆچی دوایی كرد . فه‌تحی كوڕی شێخ فه‌تاحی شێخ سمایلی دۆڵانه‌  ، ساڵی 1918 له‌ گوندی دۆڵانی ناوچه‌ی قه‌ره‌داغی شاری سلێمانی له‌دایك بووه‌، به‌شیعر و هه‌ڵبه‌ست هاوبه‌شی گه‌لێك بۆنه‌ی نیشتمانی و نه‌ته‌وایه‌تی كردوه‌وچه‌ندین بابه‌تی له‌ زمانی فارسییه‌وه‌ وه‌رگێڕاوه‌ته‌ سه‌ر زمانی كوردی .

*        له‌6 ی ئه‌یلولی ساڵی 1979 ، پێشمه‌رگه‌ی قاره‌مانی (ی . ن . ك )  ( ئاسۆی ده‌لاك ) ، له‌لایه‌ن رژێمی به‌عسی روخاوه‌وه‌ له‌ناو شاری  سلێمانی ده‌ستگیركرا .  شه‌هید ( حه‌سیب عومه‌ر صابر) ناسراو به‌ ( ئاسۆی ده‌لاك )   ساڵی 1957  له‌ گه‌ڕه‌كی (سه‌ركارێز)ی شاری سلێمانی له‌دایك بووه‌ .له‌ سه‌رتای ساڵی 1976 په‌یوه‌ندی به‌ رێكخستنه‌كانی كۆمه‌ڵه‌ی ره‌نجده‌رانی كوردستانه‌وه‌ كردوه‌ ، هه‌ر له‌ هه‌مان ساڵدا چه‌كی پێشمه‌رگایه‌تی كردۆته‌ شان و له‌ هه‌رێمی (5)ی قه‌ره‌داغ بووه‌ به‌ پێشمه‌رگه‌ . شه‌هید ئاسۆی ده‌لاك له‌به‌ر  جوامێری و ئازایه‌تی هه‌ر زوو له‌لای خه‌ڵكی كوردستان و ته‌نانه‌ت له‌لای ئه‌من و ئیستیخباراتی رژێمی به‌عس ناسرا . شه‌هید ئاسۆ چه‌ندین چالاكی كه‌م وێنه‌ی له‌ناو شاری سلێمانی و ده‌وروبه‌ری ئه‌نجامداوه‌ . رۆژی 6ی ئه‌یلولی ساڵی 1979 له‌لایه‌ن داموده‌زگاكانی رژێمی به‌عس ده‌ستگیركراو رۆژ و شوێنی شه‌هیدبوونی نه‌زانراوه‌ .

*        له‌ 8 ی ئه‌یلولی ساڵی 1992، ئه‌نجومه‌نی وه‌زیرانی حكومه‌تی هه‌رێمی كوردستان بڕیاری ژماره‌ ( 1227)ی ده‌ركرد كه‌  تایبه‌ت بوو به‌ گه‌ڕانه‌وه‌ی زانكۆی سلێمانی له‌ شاری هه‌ولێره‌وه‌ بۆ شاری سلێمانی . له‌به‌رئه‌وه‌ له‌ساڵی 1982 زانكۆی سلێمانی به‌بڕیارێكی رژێمی به‌عس له‌شاری سلێمانیه‌وه‌ گواسترایه‌وه‌ بۆ شاری هه‌ولێر.

*        له‌11 ی ئه‌یلولی ساڵی   1937 یه‌كه‌م  ژماره‌ی  ڕۆژنامه‌ی زبان له‌لایه‌ن  شاره‌وانی سلیمانی یه‌وه‌  بڵاوكرایه‌وه‌.  مامۆستا(ساڵح قه‌فتان) سه‌رنوسه‌ری  رۆژنامه‌كه‌ بوو. زبان رۆژنامه‌یه‌كی هه‌فتانه‌ی شه‌ش لاپه‌ره‌ بوو به‌ تیراژی (300-500)ژماره‌ی لێ‌ چاپ ده‌كرا،له‌گه‌ڵا بڵاوكردنه‌وه‌یدا ژماره‌یه‌ك له‌ رۆژنامه‌كه‌ بۆ مه‌لیك مه‌حمود ره‌وانه‌ ده‌كرا كه‌ ئه‌و كاته‌ بۆ باشوری عیراق دورخرابووه‌ .هه‌روه‌ها  ژماره‌یه‌كیش بۆ پسپۆری كاروباری كورد (مینۆرسكی) و شه‌ش ژماره‌ش بۆ (ئه‌دمۆنز)ده‌نیردرا بۆ شاری به‌غدا. دواین ژماره‌ی زبان كه‌ ژماره‌ (94) بوو له‌( 18 ی كانونی دووه‌می ساڵی1941)  بڵاوكرایه‌وه‌  .

*        له‌ (11)ی ئه‌یلولی ساڵی1991 ته‌له‌فزۆنی گه‌لی كوردستان له‌ سلێمانی دامه‌زرا.ئه‌م ته‌له‌فزیۆنه‌ به‌ كه‌ناڵی دایك ناو ده‌برێت ,چونكه‌ یه‌كه‌م كه‌ناڵی ناوخۆیی كوردی پاش راپه‌ڕین بوو كه‌ په‌خشی به‌رنامه‌كانی ده‌ست پێ‌ كرد. یه‌كه‌م وێنه‌ كه‌ ته‌له‌فزیۆنی گه‌لی كوردستان په‌خشی كرد ، ئه‌و وتاره‌ی هه‌ڤاڵا مام جه‌لال بوو له‌ یاریگای سلێمانی به‌بۆنه‌ی ساڵیادی شۆڕشی ئه‌یلوله‌وه‌ پێشكه‌شی كرد . له‌ ماوه‌ی ته‌مه‌نیشیدا كه‌ناڵه‌كه‌ به‌ چه‌ند قۆناغیكدا تێ‌ په‌رێوه‌ . ئه‌م كه‌ناڵه‌ گرنگی به‌ تێكرای لایه‌نه‌كانی ژیانی  كورده‌واری وسیاسی و ئابوری و فه‌ رهه‌نگی و كه‌لتوری دواوه‌,له‌ دوا قۆناغیشدا له‌ 1 ی حوزه‌یرانی ساڵی /2008 سه‌ته‌لایتی گه‌لی كوردستان  له‌ هه‌ناوی كه‌ناڵی گه‌لی كوردستان  له‌ دایك بوو .

*        له‌12 ی ئه‌یلولی ساڵی 1920 شێخ مه‌حمودی حه‌فید كرا به‌ حوكمداری  كوردستان,له‌ كۆبونه‌وه‌یه‌كی جه‌ماوه‌ریدا نوێنه‌ری ئنگلیز (میجه‌ر نوئێل) ئه‌م ده‌سه‌ڵاته‌ی راگه‌یاند . پاشان مه‌لیك مه‌حمود كابینه‌ی حكومه‌ته‌كه‌ی راگه‌یاند كه‌ له‌ چه‌ند وه‌زیرێك پێك هاتبوو . به‌ڵام حكومه‌ته‌كه‌ی مه‌لیك مه‌حمود له‌گه‌ڵا له‌به‌رژه‌وه‌ندی ئینگلیزه‌كاندا نه‌ده‌گونجا بۆیه‌ ئینگلیزه‌كان كه‌وتنه‌ پیلان دانان بۆ له‌ناوبردنی . له‌ئه‌نجامدا كۆتاییان به‌ حكومه‌ته‌كه‌ی مه‌لیك مه‌حمود هێنا .

*        له‌13 ی ئه‌یلولی ساڵی 1991 گۆڕێكی به‌كۆمه‌ڵا له‌ نزیك سه‌ربازگه‌ی (سارداو)ی شاری سلێمانی دۆزرایه‌وه‌ ، ئه‌و گۆڕه‌ به‌كۆمه‌ڵه‌ ته‌رمی (9) هاوڵاتی تێدابوو كه‌ له‌لایه‌ن  رژێمی به‌عسی رووخاوه‌وه‌ و له‌رۆژی 17 ی تشرینی یه‌كه‌می ساڵی 1985 له‌كاتی (منع التجول)ه‌كه‌ی شاری سلێمانی  دا شه‌هیدكرابوون.

*        له‌14 ی ئه‌یلولی ساڵی 2005 مامۆستای موزیك(ولیه‌م یوحه‌ننا) له‌ته‌مه‌نی (74) ساڵیدا  له‌شاری سلێمانی كۆچی دوایی كرد .

*        مامۆستا ولیه‌م یوحه‌ننا له‌ ساڵی 1931 له‌شاری سلێمانی هاتۆته‌ دنیاوه‌ هه‌ر له‌ مناڵیه‌وه‌ خولیای موزیك بوه‌ و قۆناغه‌كانی خوێندنی سه‌ره‌تایی و ئاماده‌یی له‌ شاری سلێمانی ته‌واو كردوه‌ و ساڵی 1955 یه‌كه‌م وه‌جبه‌بووه‌ كه‌ به‌شی موزیكی په‌یمانگای هونه‌ره‌ جوانه‌كانی به‌غدای  ته‌واوكردوه‌ ، پاشان گه‌ڕاوه‌ته‌وه‌ شاری سلێمانی و بۆته‌ مامۆستای موزیك پاشان له‌ زانكۆی سلێمانی بۆته‌ مامۆستا ، له‌وماوه‌یه‌دا توانی هه‌ردوو تیپی زێڕین و زیوین دروست بكات . به‌شداری فێستیڤاڵه‌كانی زانكۆكانی عیراقی كردوه‌ و یه‌كێك بوه‌ له‌و پێنج مامۆستایانه‌ی بانگهێشت كراون بۆ ده‌ره‌وه‌ی عیراق . مامۆستا یه‌كێك بوه‌ له‌ دامه‌زرێنه‌رانی تیپی مۆسیقای سلێمانی و كۆمه‌ڵه‌ی هونه‌ره‌جوانه‌كان و نه‌قابه‌ی هونه‌رمه‌ندان . هه‌روه‌ها ماوه‌یه‌كی زۆر مامۆستا بوه‌ له‌ چالاكی قوتابخانه‌كانی شاری سلێمانی و گه‌لێك هونه‌رمه‌ندی موزیكی پێگه‌یاندووه‌ . زوربه‌ی ته‌مه‌نی بۆئه‌م مه‌به‌سته‌ ته‌رخان كردوه‌ .

*        له‌  15 ی ئه‌یلولی ساڵی 1972 (به‌نگینه‌)ی شـاعیر كۆچی دوایی كرد . به‌نگینه‌ ناوی (فه‌یزوڵڵا باقر ئه‌حمه‌د)ه‌ ، ساڵی 1908 له‌شاری سه‌قزی كوردستانی ئیران له‌دایك بووه‌ ، له‌به‌ر بژێوی ژیانی له‌ ته‌مه‌نی لاوێتیدا رویكردۆته‌ كوردستانی عیراق و له‌ شاری سلێمانی نیشته‌جێ‌ بووه‌ . پاشان چۆته‌ به‌رخوێندن و له‌ خوێندنگه‌ی زانستی ئێواران خوێندویه‌تی ، له‌ شانۆگه‌ری (مه‌م و زین)دا رۆڵی (به‌نگینه‌)ی بینیوه‌ و له‌دوای ئه‌مه‌وه‌ پیره‌مێردی شاعیر نازناوی (به‌نگینه‌)ی داوه‌تێ‌ . به‌نگینه‌ به‌شاعیرێكی میللی ناسراوه‌ و به‌زمانی زۆرینه‌ی خه‌ڵك  و چینی جوتیار وكرێكار دواوه‌ ، ساڵی (1950) به‌نگینه‌ به‌ (شاعیری گه‌ل) ناسراوه‌ وشاعیرێكی نیشتمان په‌روه‌ر بووه‌ و له‌گه‌ڵا مامۆستا حه‌مه‌ ساڵح دیلان دا زیندانی كراون ،. دیوانه‌ شیعریه‌كه‌ی له‌ساڵی 2003 به‌چاپ گه‌یه‌نراوه‌ .

*        له‌  17 ی ئه‌یلولی ساڵی 1985 هێزه‌كانی ئه‌من و ئیستیخباراتی رژێمی به‌عسی روخاو ، هه‌ڵمه‌تێكی ره‌شبگیریان له‌ شاری سلێمانی ده‌ستپێكرد . له‌ماوه‌ی چه‌ند رۆژێكدا زیاتر له‌ 900 گه‌نجی شاری سلێمانیان ده‌ستگیركرد  كه‌ زوربه‌یان خوێندكاربوون . له‌پاش چه‌ند مانگێك  له‌ مه‌حكه‌مه‌ی به‌ناو سه‌وره‌  زوربه‌یان حوكم دران و ژماره‌یه‌كیشان له‌سێداره‌دان .

*        له‌  18 ی ئه‌یلولی ساڵی 1924 ، یه‌كه‌م ژماره‌ی رۆژنامه‌ی (ژیانه‌وه‌) له‌ شاری سلێمانی ده‌رچوو . ژیانه‌وه‌ رۆژنامه‌یه‌كی ره‌سمی حكومی بوو هه‌فته‌ی جارێك بڵاوده‌كرایه‌وه‌ و پیره‌مێردی شاعیر سه‌رپه‌رشتی و به‌ڕێوه‌بردنی گرتۆته‌ ئه‌ستۆ ..  (ژیانه‌وه‌) هه‌فته‌نامه‌یه‌كی سیاسی و ئه‌ده‌بی و كۆمه‌ڵایه‌تیش بوو . تا ساڵی 1956 به‌رده‌وام بووه‌ و (56) ژماره‌ی لێده‌رچووه‌ .

*        له‌  18 ی ئه‌یلولی ساڵی2003 ، ئه‌دیب و نوسه‌ر شكور مسته‌فا له‌ شاری هه‌ولێر كۆچی دوایی كرد . نوسه‌ر و وه‌رگێڕی به‌توانا و زمانزانی لێهاتوو مامۆستا شكور مسته‌فا عه‌بدوڵڵا له‌ ساڵی 1926 له‌دایك بووه‌ ،   كۆلێژی شه‌ریعه‌ی ته‌واوكردووه‌ ، له‌سه‌ر هه‌ڵوێستی سیاسی زۆرجار بۆ شاره‌كانی ناوه‌ڕاست و باشووری عێراق   دوورخراوه‌ته‌وه‌. له‌ ساڵی 1975 كراوه‌ به‌ ئه‌مینداری گشتی كۆڕی زانیاری كورد له‌ شاری به‌غدا ، له‌م ماوه‌یه‌دا رۆڵێكی باشی بینیوه‌ و گه‌لێك په‌رتوكی به‌نرخی له‌ زمانه‌كانی ( توركی و ئازه‌ری و عه‌ره‌بی ) كردوه‌ به‌ كوردی . ساڵی 1996 خانه‌نشین كراوه‌ و له‌ ساڵی 1997 گه‌ڕاوه‌ته‌وه‌ كوردستان و له‌ شاری هه‌ولێر نیشته‌جێ‌ بووه‌ و ساڵی 1998 كراوه‌ به‌ سكرتێری كۆڕی زانیاری كوردستان . مامۆستا شكور مسته‌فا نوسه‌رێكی چالاك  و وه‌رگێڕێكی لێهاتوو بووه‌ و زنجیره‌یه‌ك په‌رتوكی به‌نرخی به‌ نوسین و  وه‌رگێڕان پێشكه‌ش به‌ كتێبخانه‌ی كوردی كردوه‌ .

*        له‌  20 ی ئه‌یلولی ساڵی  1923 ، یه‌كه‌م ژماره‌ی رۆژنامه‌ی (ئومێدی ئیستیقلال) له‌ شاری سلێمانی ده‌رچوو . (ئومێدی ئیستیقلال) رۆژنامه‌یه‌كی ( سیاسی – ئه‌ده‌بی – كۆمه‌ڵایه‌تی) بوو هه‌فته‌ی جارێك ده‌رده‌چوو . ئۆرگانی حكومه‌ته‌كه‌ی مه‌لیك مه‌حمود بوو . كه‌ پاش چۆڵكردنی ئینگلیزه‌كان له‌ شاری سلێمانی شێخ مه‌حمود ده‌ری ده‌كرد و 25 ژماره‌ی لێ‌ بڵاوكرایه‌وه‌ . تا ژماره‌ 16 ئه‌حمه‌د خواجه‌ و ره‌فیق حیلمی و حسێن نازم به‌ڕێوه‌به‌ر و سه‌رنوسه‌ری بوون . به‌ڵام له‌دوای ژماره‌ 16 وه‌ ناوی سه‌رنوسه‌ر نه‌ده‌نوسرا .

 

*        له‌ 20 ی ئه‌یلولی ساڵی 1959 تێكۆشه‌ری ناسراو سه‌عید قه‌زاز له‌سێداره‌درا . سه‌عید كوڕی مه‌جیدی ئه‌حمه‌د قه‌زاز ، ساڵی 1904 له‌ سلێمانی له‌دایك بووه‌ . سه‌ره‌تای خوێندنی له‌ حوجره‌وه‌ ده‌ست پێكردوه‌ و پاشان چۆته‌ قوتابخانه‌ . له‌ماوه‌ی ژیانیدا چه‌ندین پۆستی حكومی پێسپێردراوه‌ هه‌رله‌ مدیر ناحیه‌ و قایمقام و موته‌سه‌ریف . هه‌روه‌ها له‌ زوربه‌ی كابینه‌كانی حكومه‌تی عێراقدا پۆستی وه‌زاری پێدراوه‌ . له‌گه‌ڵا به‌رپابونی شۆڕشی 14 ی ته‌موزی ساڵی 1958 خۆی ته‌سلیم به‌ كاربه‌ده‌ستانی نوێ‌ كرد و ئه‌وانیش به‌ڵێنی ئازاد بونیان پێدا . به‌ڵام ره‌وتی دادگاكردنه‌كه‌یان به‌ئاراسته‌یه‌كی تردا بردو بڕیاری له‌سێداره‌دانیان په‌سه‌ند كرد .

*        له‌ 22 ی ئه‌یلولی ساڵی 1973 ، مامۆستا ره‌مزی قه‌زاز كۆچی دوایی كرد . ره‌مزی قه‌زاز ساڵی 1914 له‌ شاری سلێمانی هاتۆته‌ دنیاوه‌ . خوێندنی سه‌ره‌تای و ناوه‌ندی له‌ سلێمانی و پاشان خانه‌ی مامۆستایانی له‌ شاری به‌غدا ته‌واوكردوه‌ . له‌سه‌ر هه‌ڵوێستی سیاسی ده‌ستگیركراوه‌ و له‌پاش ئازادبوونی په‌یوه‌ندی كردوه‌ به‌ شۆڕشی ئه‌یلوله‌وه‌ .  له‌ گۆڤار و رۆژنامه‌كانی ئه‌و سه‌رده‌مه‌دا گه‌لێك بابه‌تی نوسیوه‌ .  جگه‌ له‌ زمانی كوردی زمانی عربی و ئینگلیزی و توركی به‌باشی زانیوه‌ .

*        له‌ 30 ی ئه‌یلولی ساڵی 1922 ، شێخ مه‌حمودی حه‌فید گه‌ ڕایه‌وه‌ شاری سلێمانی ، گه‌ڕانه‌وه‌ی شێخ مه‌حمود بۆ شاری سلێمانی پاش ئه‌وه‌ هات كه‌ ده‌سه‌ڵاتدارانی ئینگلیز بڕیاری دورخستنه‌وه‌ی شێخیان هه‌ڵوه‌شاندبۆوه‌ و رێگه‌یان پێدابوو له‌ هندستانه‌وه‌ بگه‌ڕێته‌وه‌ كوردستان . ئه‌م بڕیاره‌ی ده‌سه‌ڵاتدارانی ئینگلیز پاش ئه‌و گوشاره‌ جه‌ماوه‌ریه‌ هات كه‌دوای ده‌ستگیركردنی شێخ مه‌حمود له‌ كوردستان به‌گشتی و شاری سلێمانی به‌تایبه‌تی دروست ببوو

*        له‌ 30 ی ئه‌یلولی ساڵی 1924 به‌بڕیاری كۆمه‌ڵه‌ی گه‌لان، لیژنه‌یه‌ك بۆ لێكۆڵینه‌وه‌ له‌ ویلایه‌تی موسـڵا پێكهات ، ئه‌م بڕیاره‌ پاش ئه‌و ململانێیه‌ درا كه‌ له‌سه‌ر ویلایه‌تی موصل دروست ببو . پاشان له‌خولی (بیست وحه‌وته‌مین)ی كۆمه‌ڵه‌ی گه‌لاندا بریاری ئه‌وه‌ درا ویلایه‌تی (موسـڵا)به‌ ده‌وڵه‌تی تازه‌ دروست كراوی عیراقه‌وه‌ بلكێنرێت

Print Friendly and PDF

بابەتی زیاتر
زۆرترین بینراو
  • 24 کاتژمێر
  • هەفتە
  • مانگ
نرخە جیهانیەکان
بۆ بەئاگابوون لە دواین زانیاریەکان
   
Tel: (+53) 320 0475
© Copyright 2016 SNN. All Rights Reserved.