له‌ ماوه‌ى دوو كاتژمێردا 11 حاڵه‌تى نوێى كۆرۆنا له‌ عێراق تۆماركران و كه‌سێكیش گیانى له‌ده‌ستدا

0
296
تاقیگه‌یه‌كى كۆرۆنا له‌ سلێمانى | فۆتۆ: هه‌وراز ئه‌حمه‌د

له‌ كاتژمێر 8:00ى به‌ره‌به‌یانى ئه‌مڕۆوه‌ 11 حاڵه‌تى‌ نوێى تووشبوون به‌ كۆرۆنا له‌ عێراق تۆماركراون، ژنێك به‌ ڤایرۆسه‌كه‌ گیانى له‌ده‌ستداوه‌، وه‌زیرى ته‌ندروستيى عێراق-یش ده‌ڵێت: “رێژى پشكنینه‌كان ده‌گه‌یه‌نینه‌ 10 هه‌زار پشكنینى رۆژانه‌”.

كه‌مێك له‌مه‌وبه‌ر به‌ڕێوه‌به‌رایه‌تى ته‌ندروستيى پارێزگاى بابل رایگه‌یاند: “11 حاڵه‌تى نوێى تووشبوون به‌ كۆرۆنا تۆماركراون”، هاوكات به‌ڕێوه‌به‌رایه‌تى ته‌ندروستيى دیوانیه‌ ئاشكرایكرد: “ژنێك به‌هۆى ڤایرۆسه‌كه‌وه‌ گیانى له‌ده‌ستداوه‌ له‌ یه‌كێك له‌ نه‌خۆشخانه‌كان”، ئه‌مه‌ سه‌ره‌ڕاى ئه‌وه‌ى له‌ كه‌ربه‌لا “دوو ئه‌فسه‌رى پۆلیس و سێ به‌ركه‌وته‌ى ئه‌و ئه‌فسه‌رانه‌ كه‌ره‌نتین كراون به‌ گوومانى تووشبوون به‌ كۆرۆنا”.

له‌باره‌ى هه‌ڵكشانى رێژه‌ى تووشبوون به‌ كۆرۆنا له‌ عێراق حه‌سه‌ن ته‌میمى، وه‌زیرى ته‌ندروستيى عێراق له‌ نوێترین لێدوانى رۆژنامه‌وانیدا ئه‌مڕۆ شه‌ممه‌ رایگه‌یاند: “تا ئێستا بڵاوبوونه‌وه‌ى كۆرۆنا و دۆخى عێراق له‌ژێر كۆنترۆڵدایه‌، هه‌وڵیشده‌ده‌ین له‌ داهاتوودا رێژه‌ى پشكنینه‌كان به‌رزبكه‌ینه‌وه‌ بۆ 10 هه‌زار پشكنینى رۆژانه‌ و ژماره‌ى تیمه‌ پزیشكییه‌كانیش زیاد بكه‌ین”.

وتیشى: “ئه‌م قسانه‌ واتاى ئه‌وه‌ نیه‌ كه‌ ئێمه‌ مه‌ترسییمان تێپه‌ڕاندووه‌، نه‌خێر، به‌ڵكو ئێمه‌ له‌ مه‌ترسییه‌كى گه‌وره‌داین، ئه‌وه‌ى پێویسته‌ ئه‌وه‌یه‌ هاووڵاتیان پابه‌ند بن و ئێمه‌ش ئه‌ركى سه‌رشانى خۆمان به‌باشى به‌جێبگه‌یه‌نین”.

هه‌ر ئه‌مڕۆ لیژنه‌ى باڵاى رووبه‌ڕووبوونه‌وه‌ى كۆرۆنا له‌ وه‌زاره‌تى ته‌ندروستیى عێراق كۆبوونه‌وه‌ى خۆى له‌باره‌ى دۆخى عێراق ئه‌نجامدا، بڕیاریدا، “قه‌ده‌غه‌ى هاتووچۆ درێژبكرێته‌وه‌ و رێكاره‌كان تووندتر بكرێن”.

دوێنى هه‌ینى عێراق ژماره‌یه‌كى پێوانه‌یى نوێى له‌ رێژه‌ى تووشبوون به‌ كۆرۆنا راگه‌یاند، چونكه‌ له ‌ماوه‌ى 24 كاتژمێردا 416 حاڵه‌تى نوێى تووشبوون و شه‌ش حاڵه‌تى گیان له‌ده‌ستدان تۆماركران.

بەشی بکە لە
Previous Next
Close
Test Caption
Test Description goes like this