تیپى باسكه‌ى یانه‌ى سۆران وه‌ك یه‌كه‌م تیپى یانه‌كه‌ ده‌ستى به‌ئاماده‌كاریی كرده‌وه‌

0
446
یانەی سۆران

 

سه‌نگه‌ر زرار- SNN Sport

یاریزانانى تیپى باسكه‌ى یانه‌ى وه‌رزشى سۆران وه‌ك یه‌كه‌م تیپى یانه‌كه‌یان له‌پاش ئاسایی بوونه‌وه‌ى بارودۆخى دواى ڤایرۆسى كۆرۆنا ده‌ستیان به‌مه‌شق و راهێنان و ئاماده‌كارییه‌كان كرده‌وه‌ بۆ خوله‌كانى كوردستان.

 

تیپى باسكه‌ى یانه‌ى وه‌رزشى سۆران كه‌ كۆتایی ساڵى 2019ى رابردوو له‌خولى پله‌ دووى باسكه‌ى یانه‌كانى كوردستان پله‌ى دووه‌مى ده‌ستەبه‌ركرد و له‌گه‌ڵ تیپى باسكه‌ى یانه‌ى سه‌وره‌-ى كه‌ركوك راسته‌وخۆ بۆ خولى پله‌ یه‌ك سه‌ركه‌وتن،  چه‌ند رۆژێكه‌ راهێنه‌ر و ئه‌ندامانى تیپه‌كه‌ روویان له‌هۆڵى داخراوى یانه‌كه‌یان كرده‌وه‌ و دووباره‌ ده‌ستیان به‌مه‌شق و راهێنانى هاوینه‌ كرده‌وه‌.

 

به‌مه‌ش بوونه‌ یه‌كه‌م تیپى یانه‌كه‌یان كه‌ له‌دواى چه‌ند مانگێک بێده‌نگى گه‌ڕانه‌وه‌ بۆ ژیانى ئاسایی و ده‌ستیان به‌ئاماده‌كارییه‌كانیان كرده‌وه‌ بۆ هه‌ر خول و پاڵه‌وانێتییه‌ك كه‌ له‌ئاینده‌دا له‌سه‌ر ئاستى ناوچه‌كه‌ و كوردستان رێكده‌خرێت، به‌تایبه‌تیش خولى پله‌ یه‌كى باسكه‌ى یانه‌كانى كوردستان.

 

له‌مباره‌یه‌وه‌ تۆڕى هه‌واڵى سلێمانى (SNN Sport)، په‌یوه‌ندى به‌ فه‌رمان ئیسماعیل ئه‌ندامى ده‌سته‌ى كارگێڕیی و به‌رپرسى راگه‌یاندنى یانه‌ى وه‌رزشى سۆران كرد و ئه‌میش له‌باره‌ى تیپه‌كه‌ و ده‌ستپێكردنه‌وه‌ى ئاماده‌كارییه‌كانیان، وتى: هه‌ر له‌گه‌ڵ مێژووى دروستبوون و دامه‌زراندنى یانه‌ى وه‌رزشى سۆران له‌سه‌ره‌تاوه‌ تائێستا یه‌كێك بووه‌ له‌تیپه‌ هه‌ر به‌هێز و سه‌ره‌كى و باشه‌كانى یانه‌كه‌مان، مێژوویه‌كى دوورودرێژى له‌قه‌زاى سۆران و ناوچه‌ى دیانا به‌تایبه‌تى، له‌و سه‌رده‌مه‌ى كه‌كۆمپانیا ئینگلیزه‌كان له‌و ناوچه‌یه‌ كاریان كردووه‌، یارى باسكه‌ كراوه‌ و تیپ هه‌بووه‌ و ئاشنایه‌تییان له‌گه‌ڵ یارییه‌كه‌دا دروستكردووه‌”.

 

هه‌روه‌ها وتى: پاش دامه‌زراندنى یانه‌كه‌ تیپى باسكه‌ به‌رده‌وام له‌یانه‌كه‌ماندا هه‌بووه‌ و یه‌كێك بووه‌ له‌تیپه‌ سه‌ره‌كییه‌كان و به‌شدارى چالاكییه‌كانى یه‌كێتى باسكه‌ى كوردستانى كردووه‌ و ماوه‌ی 2 ساڵ تیپه‌كه‌ له‌خولى نایابى باسكه‌ى یانه‌كانى كوردستان ركابه‌ریی ده‌كرد، پاشان بۆ خوله‌كانى پله‌ یه‌ك و پله‌ دوو دابه‌زى، به‌ڵام مانگى تشرینى دووه‌مى ساڵى 2019ى رابردوو توانى له‌خولى پله‌ دوودا ئاستێكى به‌رز پێشكه‌ش بكات و بۆ خولى پله‌ یه‌ك سه‌ربكه‌وێته‌وه‌، ئێستاش تیپه‌كه‌ كه‌ سه‌رجه‌م یاریزانانى خه‌ڵكى سۆرانن، له‌ژێر سه‌رپه‌رشتى یانه‌ى وه‌رزشى سۆران و راهێنه‌ر و یاریزان دڵشاد سه‌عید عه‌بدوڵڵا به‌شێوه‌یه‌كى سه‌ره‌تایی ده‌ستیان به‌مه‌شقه‌كانى خۆیان كردووەته‌وه‌ و ئاماده‌كاریی بۆ خولى پله‌ یه‌كى باسكه‌ى یانه‌كانى كوردستان ده‌كه‌ن”.

 

بەشی بکە لە
Previous Next
Close
Test Caption
Test Description goes like this