دوایین زانیاری لەسەر ئاگرەكەی هەولێر

0
306

SNN-

دوای نیوڕۆی ئەمڕۆ پێنجشەممە ئاگرێك لە باڵەخانەیەكی هەولێر كەوتەوە و جگە لە گیانلەدەستدانی كەسێك، زیانێكی زۆری مادیش بەر خاوەنی دوكانەكانی ژێر باڵەخانەكە كەوت.

رووداوەكە لە كاتژمێر یەکی پاشنیوەڕۆی ئەمڕۆ بەهۆی شۆرتی كارەباوە لە یەكێك لە دوكانەكانی ژێر باڵەخانەكە روویدا و دواتر ئاگرەكە تەشەنەی كرد و چووە ناو باڵەخانەكە و دەستبەجێ ئەو كەسانەی لە نزیك ئاگرەكە بوون، پەیوەندییان بە بەرگری شارستانی هەولێر كردووە بۆ ئەوەی ئاگرەكە كۆنتڕۆڵبكرێت، بەڵام لەكاتی كەوتنەوەی ئاگرەكە بایەكی بەهێز هاتووە و ئاگرەكە زوو تەشەنەی كردووە.

شاهید حاڵێك لە نزیك باڵەخانەكە بە SNNی راگەیاند: سەرەتا ئاگرەكە قەبارەی بچووك بوو، بەڵام بەهۆی بایەكی بەهێزەوە زوو تەشەنەی كرد و كۆنتڕۆڵ نەكرا و لەوكاتەشدا هیچ ئاگركوژێنەوەیەك لەشوێنی ئاگرەكە نەبوو، بۆیە نەتوانرا ئاگرەكە بكوژێندرێتەوە.

یادگار ئەنوەر بەرزنجی، بەڕێوەبەری بەرگری شارستانی هەولێر بە SNNی راگەیاند: “ئاگرەكە بەهۆی شۆرتی كارەباوە روویدابوو و بەهۆی ئەوەی كە ژێر باڵەخانەكە كەلوپەلێكی زۆری كارەبایی تێدابووە، ئاگرەكە بە زوویی هەڵاییساوە و تەشەنەی كردووە و لەسەرووی باڵەخانەكەش چەند ماڵێكی لێ نیشتەجێیە، ئەوانیش بەهۆی دووكەڵێكی زۆرەوە زیانی زۆریان بەركەوتووە و كەسێك گیانیلەدەستداوە كە گەنجێكی كوردی رۆژئاوایە”.

وتیشی: “تیمەكانمان زوو گەیشتنە شوێنی رووداوەكە و دوای كەمێك ئاگرەكەیان كۆنتڕۆڵكرد، بەڵام زیانێكی زۆری مادیش بەر خاوەن دوكانەكان كەوتووە كە مەزەندە دەكرێت بە دەیان هەزار دۆلار بێت”.

سەبارەت بە گیانلەدەستدانی گەنجەكە و نەبوونی دەرچەی سەلامەتی لە باڵەخانەكە بەڕێوەبەری بەرگری شارستانی هەولێر ئاماژەی بەوەشكرد: “باڵەخانەكە دەرچەی سەلامەتی نییە و پێشێلی رێنماییەكانی كردووە، بۆیە لە دوای رووداوەكە لێكۆڵینەوە لە چۆنیەتی كەوتنەوەی ئاگرەكە دەكرێت و هەر كەسێك كەمتەرخەمبێت، دەبێت لێپرسینەوەی لەگەڵ بكرێت”.

خاوەنی یەكێك لە دوكانەكانی ژێر باڵەخانەكە ئاشكرایكرد: “ژێرزەمینێك لەژێر باڵەخانەكە هەیە كە كۆگایی كەلوپەلی كارەباییە و نزیكەی بایی 60 هەزار دۆلار كەلوپەلی تێدایە زۆربەی بەهۆی ئاگرەكە و دووكەڵەكەیەوە زیانی بەركەوتووە و دوو ماڵیش كە لە تەنیشت باڵەخانەكەن، زیانی مادییان بەركەوتووە”.

 

 

بەشی بکە لە
Previous Next
Close
Test Caption
Test Description goes like this