ئه‌مریكا و چین له‌ هاواى كۆده‌بنه‌وه‌

0
161
ئاڵاى چین و ئه‌مریكا | فۆتۆ: CFR

ئه‌مڕۆ شه‌ممه‌ میدیاكانى ئه‌مریكا بڵاویانكرده‌وه‌،‌ به‌رپرسانى حكومه‌تى چین و ئه‌مریكا به‌ نیازن له‌ هاواى كۆببنه‌وه‌.

زانیارییه‌كه‌ به‌یانى ئه‌مڕۆ له‌ میدیاكانى ئه‌مریكا بڵاوكراوه‌ته‌وه‌ و ئه‌وه‌یان ئاشكراكردووه‌، كه‌ مایك پۆمپه‌یۆ، وه‌زیرى ده‌ره‌وه‌ى ئه‌مریكا له‌ ئاینده‌یه‌كى نزیكدا سه‌ردانى ویلایه‌تى هاواى ده‌كات بۆ ئه‌وه‌ى له‌گه‌ڵ به‌رپرسانى حكومه‌تى چین كۆببێته‌وه‌.

ناوه‌ڕۆكى كۆبوونه‌وه‌كه‌ و ته‌وه‌ره‌كانى هێشتا ئاشكرا نه‌كراون، ئه‌وه‌ى تا ئێستا ئاشكرابووه‌ ته‌نیا ئه‌وه‌یه‌، “كۆبوونه‌وه‌كه‌ له‌سه‌ر ئاستى باڵا ده‌بێت و به‌ڕێبه‌رى وه‌زیرى ده‌ره‌وه‌ى ئه‌مریكا به‌ڕێوه‌ده‌چێت، هه‌ریه‌كه‌ له‌ وه‌زاره‌تى ده‌ره‌وه‌ى ئه‌مریكا و باڵیۆزخانه‌ى چین له‌ ئه‌مریكا تا ئێستا ئاماده‌نه‌بوون هیچ قسه‌یه‌ك له‌سه‌ر هه‌واڵه‌كه‌ بكه‌ن نه‌ به‌ ره‌تكردنه‌وه‌ نه‌ به‌ پشتڕاستكردنه‌وه‌”.

بڵاوبوونه‌وه‌ى هه‌واڵى ئه‌م كۆبوونه‌وه‌یه‌ و به‌شداریكردنى وه‌زیرى ده‌ره‌وه‌ى ئه‌مریكا له‌ كاتێكدایه‌ كه‌ دۆناڵد تره‌مپ، سه‌رۆكى ئه‌مریكا به‌شێوه‌یه‌كى به‌رده‌وام له‌ كۆنگره‌ رۆژنامه‌وانییه‌كانیدا هێرشده‌كاته‌ سه‌ر چین و تۆمه‌تبارى ده‌كات به‌، “شاردنه‌وه‌ى زانیارى له‌باره‌ى ڤایرۆسى كۆرۆنا كه‌ ئێستا ئه‌مریكا زۆرترین رێژه‌ى تووشبووى ڤایرۆسه‌كه‌ى تێدایه‌ له‌سه‌ر ئاستى جیهان”، هاوكات وه‌زیرى ده‌ره‌وه‌ى ئه‌مریكا هاوشێوه‌ى سه‌رۆكى ئه‌و وڵاته‌ یه‌كێكه‌ له‌و كه‌سایه‌تیانه‌ى كه‌ زۆرترین ره‌خنه‌ ئاراسته‌ى چین ده‌كات و مانگى پێشوو وتى: “چین ده‌یتوانى به‌ر له‌ مردنى سه‌دان هه‌زار كه‌س بگرتایه‌ ئه‌گه‌ر كه‌مێك زیاتر راستگۆبووايه‌ له‌ بڵاوكردنه‌وه‌ى زانیارییه‌كان ده‌رباره‌ى كۆرۆنا”.

له‌ ئێستادا چین به‌ تۆماركردنى 83 هه‌زار و 75 تووشبوو 18 یه‌مین وڵاتى جیهانه‌ له‌ڕووى بڵاوبوونه‌وه‌ى ڤایرۆسى كۆرۆنا، هه‌رچه‌نده‌ یه‌كه‌مین وڵاتبوو كه‌ ڤایرۆسه‌كه‌ تێيدا بڵاوبووه‌، به‌پێچه‌وانه‌وه‌ ویلایه‌ته‌ یه‌كگرتووه‌كانى ئه‌مریكا یه‌كه‌مین وڵاتى جیهانه‌ له‌ڕووى به‌رزى رێژه‌ى تووشبوون به‌ ڤایرۆسه‌كه تا ئێستا ‌ 2 ملیۆن و 116 هه‌زار و 922 كه‌س تووشبوون‌ و 116 هه‌زار و 825 تووشبوو به‌ ڤایرۆسه‌كه‌ تا ئێستا گیانیان له‌ده‌ستداوه‌.

بەشی بکە لە
Previous Next
Close
Test Caption
Test Description goes like this