“داوا له‌ حكومه‌ت ده‌كه‌ین هاوشێوه‌ى پارێزگاكانى تر مامه‌ڵه‌ له‌گه‌ڵ هه‌ڵه‌بجه‌ بكات”

0
1070
لیژنه‌ى رووبه‌ڕووبوونه‌وه‌ى ڤایرۆسى كۆرۆنا له‌ هه‌ڵه‌بجه‌| فۆتۆ: عه‌لى حه‌مه‌سه‌عید / SNN

SNN -عه‌لى حه‌مه‌سه‌عید

ئه‌مڕۆ شه‌ممه‌ سه‌رۆكى لیژنه‌ى رووبه‌ڕووبوونه‌وه‌ى كۆرۆنا له‌ پارێزگاى هه‌ڵه‌بجه‌ رایگه‌یاند: داوا له‌ حكومه‌تى هه‌رێم ده‌كه‌ین وه‌ك پارێزگاكانى تر مامه‌ڵه‌ له‌گه‌ڵ هه‌ڵه‌بجه‌ بكات، وتیشى: “دوو نه‌خۆشى كۆرۆنا بارى ته‌ندروستییان ناجێگیره‌”.

جیهاد ئیبراهیم، سه‌رۆكى لیژنه‌ى رووبه‌ڕووبوونه‌وه‌ى كۆرۆنا له‌ پارێزگاى هه‌ڵه‌بجه پێشنیوه‌ڕۆى ئه‌مڕۆ له‌ كۆنگره‌یه‌كى رۆژنامه‌وانیدا رایگه‌یاند: “ئه‌گه‌ر بڵاوبوونه‌وه‌ى كۆرۆنا له‌ ئاستێكدا نه‌وه‌ستێنین كاره‌سات رووده‌دات، چونكه‌ له‌ ئێستادا تواناى وه‌رگرتنى كه‌متر له‌ 50 نه‌خۆشمان هه‌یه‌، ئه‌گه‌ر نه‌خۆشخانه‌یه‌كى تریش بخه‌ینه‌ خزمه‌تى نه‌خۆشانى كۆرۆنا به‌هه‌موو توانامانه‌وه‌ ئینجا ئه‌توانین 100 نه‌خۆش چاره‌سه‌ر بكه‌ین، ئه‌مه‌ش رێژیه‌كى كه‌مه‌، له‌به‌ر ئه‌وه‌ داواده‌كه‌ین هاووڵاتییان خۆيان بپارێزن”.

سه‌رۆكى لیژنه‌ى رووبه‌ڕووبوونه‌وه‌ى كۆرۆنا له‌ وه‌ڵامى پرسیارى په‌یامنێرى (SNN) له‌باره‌ى خه‌رجكردنى پاره‌ و بودجه‌ى پێویست بۆ پارێزگاكه‌ و به‌ده‌مه‌وه‌ هاتنى داواكارییه‌كانیان؟ وتى: “داوا له‌ حكومه‌تى هه‌رێم ده‌كه‌ین وه‌ك پارێزگاكانى تر مامه‌ڵه‌ له‌گه‌ڵ هه‌ڵه‌بجه‌ بكات، به‌ ته‌نگ كارمه‌ندانى ته‌ندروستییه‌وه‌ بێت، بودجه‌ى پێویستمان بۆ دابینبكات، چونكه‌ كه‌موكورتى زۆمان هه‌یه‌، داواش له‌ خێرخوازان ده‌كه‌ین یارمه‌تیمان بده‌ت به‌تایبه‌ت له‌ كڕینى له‌ ئامێرى خۆپارێزى و ده‌رمان”.

له‌باره‌ى دۆخى نه‌خۆشانى كۆرۆنا جیهاد ئیبراهیم ئه‌وه‌شى خسته‌ڕوو: “تا ئێستا 16 نه‌خۆشى تووشبووى كۆرۆنا بوونى هه‌یه‌، له‌و ژماره‌یه‌ش 11 یان نیشانه‌یان هه‌یه‌، له‌وانه‌ش پێنجییان نیشانه‌كانیان به‌ تووندى تێدا ده‌ركه‌وتووه‌ و دووانیان بارودۆخى ته‌ندروستیان جێگیر نیه‌”.

له‌ كۆتاى كۆنگره‌ رۆژنامه‌وانییه‌كه‌دا سه‌رۆكى لیژنه‌ى رووبه‌ڕووبوونه‌وه‌ى كۆرۆنا ئاماژه‌ى به‌وه‌شكرد: “نه‌خۆشمان هه‌یه‌ له‌ماوه‌ى 24 كاتژمێردا پێنج بوتڵ ئۆكسجینى به‌كارهێناوه‌، نه‌خۆشمان هه‌یه‌ خۆى شێرپه‌نجه‌ى هه‌یه‌ و دۆخى ناجێگیره‌، له‌به‌ر ئه‌وه‌ تكاده‌كه‌ین هاووڵاتییان خۆیان بپارێزن”.

بەشی بکە لە
Previous Next
Close
Test Caption
Test Description goes like this