ژماره‌ى قوربانیيانى بۆمبارانه‌كه‌ى توركیا به‌رزبووه‌وه‌ بۆ 5 كه‌س

0
551
بۆردومانكردنى سنوورى قه‌ندیل له‌لایه‌ن فڕۆكه‌ جه‌نگییه‌كانى توركیاوه‌ | فۆتۆ: ماڵپه‌ڕه‌كان

ئه‌مڕۆ هه‌ینى به‌هۆى بۆردومانى فڕۆكه‌ جه‌نگییه‌كانى توركیاوه‌ پێنج هاووڵاتى له‌ ناوچه‌كانى ده‌وروبه‌رى ناحیه‌ى شیلادزێ و كانى ماسێ شه‌هیدبوون، كه‌ ته‌رمى یه‌كێكیان به‌هۆى سووتانییه‌وه‌ شێواوه‌ و ناناسرێته‌وه‌.

پامنێرى (SNN) له‌ شیلادزێ رایگه‌یاند: “به‌یانى ئه‌مڕۆ فڕۆكه‌ جه‌نگییه‌كانى توركیا له‌ چوارچێوه‌ى ئۆپراسیۆنى (چنگى هه‌ڵۆ) گوندى سیدان-یان له‌ سنوورى ناحیه‌ى شیلادزێ بۆردومان كرد، له‌ سه‌ره‌تادا واده‌ركه‌وت كه‌ سێ هاووڵاتى مه‌ده‌نى شه‌هیدبوون، به‌ڵام له‌ ئێستادا ئامارى قوربانییه‌كان به‌رزبووه‌ته‌وه‌ بۆ پێنج كه‌س”.

وتیشى: “قوربانییه‌كان چواریان له‌ ناوچه‌كانى ده‌وروبه‌ى شیلادزێ شه‌هیدبوو، سێ كه‌سیان ناسنامه‌یان دیاره‌ كه‌ هاووڵاتى مه‌ده‌نین، به‌ڵام یه‌كێكیان به‌هۆى ئه‌وه‌ى سووتاوه‌ و ته‌رمه‌كه‌ى شێواوه‌ ناسنامه‌ى دیار نیه‌ و ناناسرێته‌وه‌، هاوكات قوربانى پێنجه‌م به‌هه‌مان شێوه‌یه‌ به‌هۆى بۆردومانى فڕۆكه‌ جه‌نگییه‌كانى توركیاوه‌ شه‌هید بووه‌ له‌ سنوورى كانى ماسێ”.

به‌رزبوونه‌وه‌ى رێژه‌ى قوربانیانى بۆردومانه‌كه‌ى شیلادزێ له‌كاتێكدایه‌ پێشتر وارشین سه‌لمان، به‌ڕێوه‌به‌رى ناحیه‌ى شیلادزێ رایگه‌یاندبوو: “ئه‌و سێ كه‌سه‌ى كه‌ شه‌هیدبوو هاووڵاتى مه‌ده‌نین”، له‌ به‌رامبه‌ریشدا وه‌زاره‌تى به‌رگريى توركیا له‌ به‌یاننامه‌یه‌كدا رایگه‌یادبوو: “سێ گه‌ریلاى پارتى كرێكارانى كوردستان (په‌كه‌كه‌) یان كوشتووه‌ له‌ بۆردومانى فڕۆكه‌ جه‌نگییه‌كانه‌وه‌”.

كۆتا ساته‌كانى شه‌وى یه‌كشه‌ممه‌ و به‌ره‌به‌یانى دووشه‌ممه‌ 15ى حوزه‌یران، فڕۆكه‌ جه‌نگییه‌كانى توركیا ده‌ستیانكرد به‌ بۆردومانكردنى چیاى قه‌ندیل، ده‌وروبه‌رى كه‌مپى مه‌خمور و شنگال له‌ هه‌رێمى كوردستان، دواى كه‌متر له‌ 30 خوله‌ك له‌ ده‌ستپێكردن به‌ بۆردومانه‌كه‌ وه‌زاره‌تى به‌رگریى توركیا له‌ به‌یاننامه‌یه‌كدا رایگه‌یاند: “ده‌ستیانكردووه‌ به‌ ئۆپراسیۆنى (چنگى هه‌ڵۆ) له‌ باكوورى عێراق (هه‌رێمى كوردستان) له‌ دژى چه‌كدارانى پارتى كرێكارانى كوردستان”.

ئۆپراسیۆنه‌كه‌ى توركیا به‌پێى به‌یاننامه‌كه‌ى وه‌زاره‌تى به‌رگريى ئه‌و وڵاته‌، “باره‌گاكانى په‌كه‌كه‌ له‌: شنگال، قه‌ندیل، كه‌ره‌كاك، زاپ، ئاڤاشی، باسیان و خواكوڕك ده‌كاته‌ ئامانج”.

هاوكات هه‌ر له‌ چوارچێوه‌ى ئه‌و ئۆپراسیۆنه‌دا پێشتر (SNN) بڵاویكرده‌وه‌ كه‌ هێزێكى كۆماندۆى توركى هاتوونه‌ته‌ ناو خاكى هه‌رێمى كوردستان و گوندێكیان به‌ته‌واوه‌تى داگیر كردووه‌، هاوكات هه‌ر به‌هۆى بۆردومانه‌كانه‌وه‌ گوندنشینانی 10 گوندی هەرێم ماڵ و حاڵی خۆیان جێهێشتووە و روویان کردووەتە شوێنی سەلامەتتر.

پێشتر محەمەد حەسەن، هاوسەرۆکی شارەوانی بناری قەندیل بە (SNN)ی راگەیاندبوو: “دوای ساڵی 2007 بۆردوومانی فڕۆکە جەنگیەکانی سوپای تورکیا بۆ سەر گوندەکانی بناری قەندیل چڕبوونەوەی زیاتری بەخۆیەوە بینی و بە گوێرەی ئەو ئامارانەی کە ئەوان لەبەردەستیانە لە ماوەی نزیکەی 15 ساڵی رابردوو تا ئێستا نزیکەی 30 هاووڵاتی بناری قەندیل شەهید بوون و دەیانی تریش بریندار بوون، ئەمە جگە لەو زیانە زۆر و گەورەی بەر ژێرخانی ئابووری و کشتوکاڵ و سامانی ئاژەڵی ئەو گوندانە کەوتووە”.

بەشی بکە لە
Previous Next
Close
Test Caption
Test Description goes like this