بەواژۆیەكی سەرۆكی حكومەت گرفتی رێگاوبانی ناحیەی بەمۆ و مەرزی پشتە چارەسەر دەبێت

0
487

SNN- عەلی حەمە سەعید

لەگەڵ ئەوەی ماوەی چەند ساڵێكە دانیشتووانی ناحییەی بەمۆی سەر بە پاریزگای هەڵەبجە بەهۆی خراپی رێگاوبانی سەرەكی ناحییەكەیان دەناڵێنن و هاوكات خاوەنی مەرزێكی بازرگانیشن كە مانگانە داهاتێكی زۆر بۆ خەزێنەی حكومەت كۆدەكاتەوە بەڵام بە وتەی بەڕێوەبەری ناحییەكە تەنها بە واژۆیەكی سەرۆكی حكومەت گرفتی ڕێگاوبانەكە چارەسەر دەبێت.

ڕەسوڵ ئەحمەد، یەكێك لە شۆفیرانی ئۆتۆمبێلە بارهەڵگرەكانی مەرزی پشتە بە SNNی راگەیاند: چەند ساڵێكە ئێمە و دانیشتەوانی سنوری ناحییەی بەمۆ بەدەست خراپی رێگاوبانی سەرەكی مەرزی پشتە و ناحییەی بەمۆوە دەناڵێنین بێزاربووین لەچاڵ و چۆڵییەكانی، چەندین جار لەرێگەی هاووڵاتیانی سنورەكە و كەسایەتی و بەرپرسانی حكومی و حزبییەوە داوای چارەسەركردنی ئەم گرفتەمان كردووە بەڵام تا ئێستا نەتواندراوە ئەو گرفتە چارەسەر بكرێت، لەكاتێكدا دەتواندرێت هەر لەسەر داهاتی ئەم مەرزە رێگاوبانەكان چاك بكرێن و هیچ فشارێكی دارایی نەخرێتە سەر شانی حكومەت.

ئاماژەی بەوەشكرد، رۆژانە لەم رێگایەدا زیاد لە 200 ئۆتۆمبێلی بارهەڵگر هاتوچۆ دەكەن و ئاڵوگۆڕی بازرگانی دەكەن، بەڵام رێگاوبانەكە هێندە خراپ بووە كەڵكی هاتووچۆكردن بەسەریدا نەماوە، لەكاتێكدا درێژی رێگاكە تەنها 20 كیلۆ مەترە و دەتواندرێت بە ئاسانی چارەسەر بكرێت بەڵام دەوترێت سەرۆكی حكومەت تا ئێستا رەزامەندی نەداوە بەخەرجكردنی بڕێكی كەم لە داهاتی مەرزەكە بۆ چارەسەر كردنی گرفتی رێگاوبانی ئەم سنورە.

سمكۆ سالار، بەڕێوەبەری ناحییەی بەمۆی سە بەپارێزگای هەڵەبجە، بۆ SNNی روونكردەوە، سەرەكیترین گرفت لەم سنورەدا گرفتی خراپی رێگاوبانەكانمانە لە كاتێكدا بەهۆی بوونی مەرزێكی بازرگانی كە خاوەن داهاتێكی زۆر باشە دەبوو باشترین رێگاوبانمان هەبووایە، بەڵام لەگەڵ ئەوەی چەند ساڵێكە دەرخستە و بڕی تێچووی پرۆژەكەمان خستووەتە بەردەم لایەنە پەیوەندیدارەكان بەڵام تا ئێستا سەرۆكی حكومەت ئامادەنەبووە واژۆ لەسەر پرۆژەكە بكات.

ئەوەشی خستەڕوو، بە گوێرەی ئەو دەرخستەیەی ئێمە چاككردنی رێگاكە پێویستی بە تەنها سێ‌ ملیار دینارە و دڕێژییەكەی نزیكەی 20 كیلۆمەتر دەبێت لەكاتێكدا مەرزی پشتە تەنها لەمانگێكدا چوار ملیار و 500 ملیۆن دینار داهاتی هەبووە و رۆژانە 200 ئۆتۆمبێلی بارهەڵگر لەمەرزی پشتەوە هاتووچۆ دەكەن، لەگەڵ ئەوەشدا150 ماڵە كە دانیشتووی سنوری ناحیەی بەمۆن لەسەر هەمان رێگاوبان هاتوچۆ دەكەن دانیشتووانەكەی هەزار كەس دەبێت.

بەڕێوەبەری ناحییەی بەمۆ جەختی لەوەشكردەوە، چەندین جار سەردانی نوسینگەی پەرلەمان و پارێزگاری هەڵەبجە و چەندین لایەنی دیكەی پەیوەندیدارماناكردووە، بەڵام ئەوەیان پێڕاگەیاندوین كە دەرخستەی پرۆژەكە گەیشتووەتە بەردەستی سەرۆكی حكومەتی هەرێم و بڕیاری خەرجكردنی بەشێك لە داهاتی مەرزە پێویستی بە واژۆی سەرۆكی حكومەت هەیە، بۆیە ئەگەر سەرۆكی حكومەتە تەنها بڕیاربدات پارەی 20 رۆژی مەرزەكەمان بۆ تەرخانبكرێت، هیچ گرفتێكی هاتوچۆمان نامێنێت لەسنورەكەدا.

بەشی بکە لە
Previous Next
Close
Test Caption
Test Description goes like this