ئاماری شەش مانگی رابردووی تاوانەکانی ماددەی هۆشبەر لە هەولێر بڵاوکرایەوە

0
598

SNN- هەولێر

بەڕێوەبەرایەتی گشتی نەهێشتنی ماددە هۆشبەرەکان رایگەیاند، لە شەش مانگی رابردوودا 586 کەس بە تۆمەتی بەکارهێنان یان بازرگانیکردن بە ماددەی هۆشبەر لە سنووری پارێزگای هەولێر دەستگیرکراون و دەستبەسەر چەندین جۆری ماددەی هۆشبەریشدا گیراوە.

بەڕێوەبەرایەتی گشتی نەهێشتنی ماددە هۆشبەرەکان ئەمڕۆ کە هاوکاتە لەگەڵ رۆژی جیهانی بەڕەنگاربوونەوەی ماددە هۆشبەرەکان، ئاماری شەش مانگی رابردووی بڵاوکردەوە و رایگەیاند: “لە شەش مانگدا 586 تۆمەتبار  بەهۆی تاوانەکانی ماددەی هۆشبەرەوە دەستگیرکراون، لەو ژمارەیەش 292 تۆمەتبار سزا دراون”.

بە گوێرەی ئامارەکانی بەڕێوەبەرایەتییەکە، لە ئێستادا 294 تۆمەتبار لە ژێر لێکۆڵینەوەن.

هاوکات لە ماوەی ئەو شەش مانگەدا دەستگیراوە بەسەر 358 کیلۆگرام و 552 گرام ماددەی هۆشبەر کە لە ماددەکانی هێرۆین، کریستاڵ، تلیاک و حەشیش و جامیکا پێکهاتوون. لەگەڵ 952 حەبی هۆشبەر.

لە کۆتایی راگەیەندراوەکەدا، بەڕێوەبەرایەتی گشتی نەهێشتنی ماددە هۆشبەرەکان داوا لەو کەسانە دەکات کە بازرگان و بەکارهێنەری ماددە هۆشبەرەکانن دوور بکەونەوە لەو کارە قێزەون و ترسناکە و چارەنووسی خۆیان بپارێزن کە لەئەنجامدا دەستگیر دەکرێن و ڕێکاری یاسایی توند لەبەرامبەریان دەگیرێتەبەر ، دەشڵێت: “هێزەکان چاو کراوەن و هیچ تاوانبارێك نەیتوانیوە لەدەستیان دەربازی ببێت و چاوپۆشیان لەهیچ کەسێکیش نەكردووە”.

رێکخراوی نەتەوەیەکگرتووەکان 26 ی حوزەیرانی وەک رۆژی جیهانی بەرەنگاربوونەوەی ماددە هۆشبەرەکان دیاری کردووە چونکە ماددە هۆشبەرەکان گرفتێکی جیهانییە و مرۆڤایەتی بەدەستیەوە دەناڵێنێت، بەجۆرێک، بازرگانی پێکردنی لەسەر ئاستی جیهان پلەی سێیەمی وەرگرتووە لەدوای بازرگانی چەک و نەوت.
بەشی بکە لە
Previous Next
Close
Test Caption
Test Description goes like this