سلێمانى.. ئەنجامى پشکنینی کۆرۆنا لە رێگاى کورتەنامەوە دەگاتە هاووڵاتیان

0
607
پشکنینی کۆرۆنا

SNN-هەوراز ئەحمەد

بەڕێوبەرى نەخۆشخانەى شەهید تاهیر عەلى والى بەگ تایبەت بە تووشبووانى کۆرۆنا رایدەگەنێت: “بۆ ئەوەى قەرەباڵغى و بەریەککەوتن دروست نەبێت لەمەودا ئەوانەى پشکنینی کۆرۆنا دەکەن ئەنجامەکەی لە رێگەی کورتەنامەوە دەگاتەوە دەستیان”.

ئازاد هەورامى، بەڕێوبەرى نەخۆشخانەى شەهید تاهیر عەلى والى بەگ بە SNNی راگەیاند: “بەڕێوبەرایەتى تەندروستى سلێمانى لە هەنگاوێکى نوێیدا لەگەڵ کۆمپانیاى ئاسیاسێڵ گرێبەستێکى واژۆ کردوە بۆ ئەوەى ئەنجامى پشکنینى ئەو کەسانەى کە تێستى ڤایرۆسى کۆرۆنا دەکەن لە رێگاى کورتەنامەیەکەوە بگاتەوە دەستیان”.

وتیشى: “لە سلێمانى رۆژانە زیاتر لە 500 پشکنین ئەنجام دەدرێت بۆ ئەوەى قەرەباڵغى و بەریەککەوتن دروست نەبێت، هەموو کەسێکیش دڵنیا بێت لە وەرگرتنەوەی ئەنجامەکە لە رێگاى کورتە نامەیەکەوە ئەنجامى پشکنینەکان دەگاتەوە دەستى ئەو کەسانەى کە پشکنینیان کردوە”.

هاوکات ڕوونى کردەوە: “بەهۆى ئەوەى ئێستا ڤایرۆسەکە زۆر بڵاوبووەتەوە و رۆژانە لە نەخۆشخانەکان قەرەباڵغیەکى زۆر هەیە و کەسانێکى زۆر دێن بۆ پشکنین ئەمەش واى کردوە کە زۆرجار کێشەى کەمى کیت و کەلوپەلى تاقیگەمان بۆ دروست ببێت”.

بەپێى ئامارى وەزارەتى تەندروستى حکومەتى هەرێمى کوردستان تاوەکو ئێستا پێنج هەزار و 185 کەس تووشى کۆرۆنا بووە 127هەزار و 503 پشکنینی ڤایرۆسى کۆرۆنا ئەنجام دراوە.

بەشی بکە لە
Previous Next
Close
Test Caption
Test Description goes like this