لیژنەی باڵای ئۆپراسیۆنەکانی پارێزگای سلێمانی چه‌ند بڕیارێكى ده‌ركرد

0
407
پارێزگاى سلێمانى | فۆتۆ: Ranja

سه‌رۆكى لیژنەی باڵای ئۆپراسیۆنەکانی پارێزگای سلێمانی رایگه‌یاند: به‌ مه‌به‌ستى به‌ره‌نگاربوونه‌وه‌ى ڤایرۆسى كۆرۆنا چه‌ند بڕیاریكمان ده‌ركردووه‌.

له‌ به‌یاننامه‌یه‌كدا كه‌ كه‌مێك له‌مه‌وبه‌ر بڵاوكراوه‌ته‌وه‌ له‌سه‌ر زاى هه‌ڤاڵ ئه‌بوبه‌كر، پارێزگار و  سه‌رۆكى لیژنەی باڵای ئۆپراسیۆنەکانی پارێزگای سلێمانی هاتووه‌، “ئەمڕۆ لیژنەی باڵای ئۆپراسیۆنەکانی پارێزگای سلێمانی بۆ بەرەنگاربوونەوەی کۆرۆنا پاڵپشت بە بەیانی ژمارە (42)ی ساڵی (2020)ی وەزارەتی ناوخۆ، بڕیاریدا بە:
1. هاتووچۆ لەنێوان پارێزگای سلێمانی و پارێزگاکانی تردا لەناو هەرێمی کوردستان و دەرەوەی هەرێمی کوردستاندا بە پشتبەستن بە بەیانی وەزارەتی ناوخۆ تا (2020/7/1) بە داخراویی دەمێنێتەوە و رێگە بە هیچ کەسێک نادرێت هاتووچۆ بکات، جگە لەو حاڵەتانە نەبێت کە لە بەیانی وەزارەتی ناوخۆی هەرێمی کوردستاندا دیاریکراون و لە دوای ئەو کاتەشەوە وەزارەتی ناوخۆ یٔەم بابەتە دیاری دەکات.

2. راگرتنی دەوامی فەرمیی دامودەزگا حکومییەکان، جگە لە هێزەکانی ناوخۆ و کەرتی تەندروستی، خزمەتگوزاریی فەرمانگا خزمەتگوزارییەکان بەپێی سروشتی ئەرک و ئێشکگریی خۆیان، درێژ دەکرێتەوە بۆ رۆژی (2020/7/4).

3. هەموو مزگەوت و پەرستگا و شوێنە ئاینییەکان لە سنووری پارێزگای سلێمانیدا بە داخراوی دەمێننەوە.

4. تاقیکردنەوەی قۆناغی پێنجەمی پەیمانگاکانی سەر بە وەزارەتی پەروەردە و تاقیکردنەوەی پراکتیکیی ئامادەییە پیشەیەکان لە کاتی دیاریکراوی خۆیاندا بە پێیی رێکار و رێنماییە تەندروستییەکان بەڕێوەدەچن.

5. تا رۆژی (2020/7/4)، هەموو نۆرینگە ئەهلیەکانی پزیشکی ددان دادەخرێن و لەکاتی زۆر پێویستدا هاووڵاتییان دەتوانن سەردانی سەنتەرە راوێژکارییەکانی پیرەمێرد و شۆڕش تایبەت بە ددان بکەن. هەر کلینیکێکی پزیشکیی و تاقیگە و نەخۆشخانەیەکی ئەهلی پابەندی رێنماییە تەندروستی و خۆپارێزییەکان نەبێت، لەلایەن بەڕێوەبەرایەتی گشتی تەندروستی سلێمانییەوە بۆ ماوەی هەفتەیەک دادەخرێت.

6. تا رۆژی (2020/7/4) لە سنووری قەزای مەڵبەندی سلێمانیدا، چێشتخانەکان تەنیا بە دلیڤەری دەتوانن کاربکەن و چایخانە و قاوەخانە و ساردەمەنیەکانیش بەبێ شوێنی دانیشتن دەتوانن بەردەوام بن.

7. نێرگەلەخانە و هەر کافتریایەک کە نێرگەلە پێشکەش بکات، مەلەوانگە، لایڤ میوزیک، جیمەکان، یانە شەوانەکان، مەیخانەکان، شوێنەکانی کاتبەسەربردن و سەرگەرمکردن، هۆڵی بۆنەو کۆڕو کۆبوونەوەکان، بەداخراوی دەمێننەوە.

8. پرسە و پرسەی گەڕەکەکان و سەرقەبران و سەردانی نەخۆش و هەموو کۆبوونەوەیەکی خۆشیی و ناخۆشیی و ئاهەنگگێڕانێک قەدەغەن.

9. گواستنەوەی گشتیی (پاس و مینی پاس) تا رۆژی (2020/7/4) لە سنووری قەزای مەڵبەندی سلێمانیدا، رادەگیرێت، هەر شۆفێرێک سەرپێچی بکات دەست بەسەر ئۆتۆمبێلەکەیدا دەگیرێت.

10. هەر شۆفێرێکی (تەکسی) پابەندی رێنماییە تەندروستی و خۆپارێزییەکان نەبێت، بۆ ماوەی هەفتەیەک دەست بەسەر ئۆتۆمبێلەکەیدا دەگیرێت.

11. قەدەغەی هاتووچۆی ئۆتۆمبێل لە سەنتەری (ناوبازاڕی) شاری سلێمانیدا بەردەوام دەبێت و هاووڵاتیان بەپێی ڕێنماییە خۆپارێزیی و تەندروستییەکان تەنها بە پێ دەتوانن هاتووچۆو بازاڕ بکەن.
12. لە دابەشکردنی مووچەدا فەرمانگا و خەزێنە و بانکەکانی سەر بە وەزارەتی دارایی دەوامی خۆیان دەکەن بەپێی رێکار و رێنماییە تەندروستییەکان، فەرمانگەکان بەپێی لیستی مووچە بەهەمان رێکار و رێنمایی تەندروستیی لەو رۆژانەی بۆیان دیاریدەکرێت، مووچە دابەش دەکەن.
13. لە هەر شوێنێک، رێنماییە تەندروستیی و خۆپارێزییەکان جێبەجێ نەکرێت، بۆماوەی هەفتەیەک دادەخرێت.
14. هەر کۆمپانیا و دامەزراوە و مۆڵ و شوێنێکی کەرتی تایبەت پابەندی رێنماییە تەندروستی و خۆپارێزییەکان نەبێت، بۆماوەی هەفتەیەک دادەخرێت.

15. پێویستە هاووڵاتیان بەردەوام بن لەسەر خۆپارێزیی و خۆیان لە هەر بەریەککەوتن و تێکەڵاوبوون و کۆبوونەوەیەک بەدوور بگرن.

16. پێویستە لایەنە پەیوەندیدارە حکومییەکان لێپرسینەوە و رێکارەکان وردتر و زیاتر و خێراتر بکەن و هەر فەرمانگە و لیژنەیەک کەمتەرخەمیی بکات، رێکاری یاسایی و کارگێڕیی لەبەرامبەردا دەگیرێتەبەر.

17. دەسەڵاتی تەواو دەدرێت بە قایمقامەکانی سنووری پارێزگای سلێمانی، کە بەپێی تایبەتمەندیی سنوورە کارگێڕییەکانی خۆیان رێنمایی پێویست دەربکەن.

بەشی بکە لە
Previous Next
Close
Test Caption
Test Description goes like this