هەموو ئەو هێڵانەی ئینتەرنێت کە لە هەرێمەوە دراون بە خانەقین بچڕێنراون

0
214

SNN- سیروان حه‌سه‌ن

به‌ مه‌به‌ستى پچڕاندنى ئەو ئینته‌رنێتەى لە كوردستانەوە هاتووە، له‌ماوه‌ى یه‌ك هه‌فته‌دا دوو جار وه‌زیری په‌یوه‌ندییه‌كانى عێراق سه‌ردانى خانه‌قینى كردووە و تاوه‌رى كۆمپانیاکانی تێکداوە.

ئەو وەزیرە عێراقییە هه‌موو كۆمپانیاكانیشى ناچار كردووە به‌ كڕینى هێڵى ئینته‌رنێتى سه‌ر به‌ به‌غدا كه‌ ئێستا گرانتر له‌سه‌ر هاوبه‌شه‌كان ده‌كه‌وێت و خێراییه‌كه‌یشى زۆر خراپه‌.

سەر‌دار ئه‌حمه‌د خاوه‌نى یه‌كێك له‌ كۆمپانیاكان له‌ خانه‌قین به‌ SNNى راگه‌یاند: وه‌زیرى په‌یوه‌ندییه‌كانى عێراق له ‌ماوه‌ى سه‌ردانه‌كانیدا بۆ خانه‌قین كه‌ له‌ ماوه‌ى یه‌ك هه‌فتەدا دوو جار سه‌ردانى ناوچه‌كه‌ى كرد، سه‌ره‌تا چووه‌ حه‌مرین و دواتر جه‌له‌ولا و ئینجا خانه‌قین و كۆتا جاریش خودى خۆى سه‌ردانى شاخى مروارى كرد له‌ سنوورى كفرى له‌نێوان خانه‌قین و گه‌رمیان.

وتیشى: “هه‌موو تاوه‌ره‌كانی په‌خشكردنى هێڵى ئینته‌رنێتى سه‌ر به‌ هه‌رێمى كوردستان پچڕاوە و له‌ چه‌ند شوێنێكیش تاوه‌ره‌كان خراونه‌ته‌ خوار‌ و ئامێره‌كانیش شكاون”.

سه‌ردار ئه‌حمه‌د راشیگه‌یاند: بیانووى وه‌زیرى په‌یوه‌ندییه‌كانى عێراق ئه‌وه‌بووه‌ كه‌ ئه‌و هێڵانه‌ى سه‌ر به‌ حكومه‌تى هه‌رێمى كوردستانن باج ناده‌ن، بۆیه‌ پێویسته‌ بخرێنه‌ سه‌ر حكومه‌تى عێراق و له‌ ئێستادا ماوه‌ى دوو رۆژه‌ هیچ جۆره‌ ئینته‌رنێتێكى هه‌رێمى كوردستان له‌ خانه‌قین نه‌ماوه‌ و هه‌موومان به‌ ناچارى كۆمپانیاكانمان گواسته‌وه‌ بۆ سه‌ر كۆمپانیایه‌كى ئینته‌رنێت كه‌ رێگه‌پێدراوى وه‌زاره‌تى په‌یوه‌ندییه‌كانى عێراقه‌.

ئه‌وه‌شى خسته‌ڕوو: پێشتر خۆیان خاوه‌نى كۆمپانیاكانیان بوون و كارتیان دروستده‌كرد، به‌ڵام ئێستا وه‌كو دوكاندارێك یان بریكارێك ده‌بێت كارت بكڕن له‌ كۆمپانیاكه‌ى به‌غدا و بیفرۆشنه‌وه‌ به‌ هاوبه‌شه‌كانیان و جیاوازى زۆریش هه‌یه‌ له‌ نێوان هێڵه‌كانى هه‌رێم و به‌غدا، چونكه‌ هێڵه‌كانى كوردستان هه‌رزانتر و خێراتر بوون، به‌ڵام ئه‌م هێڵه‌ى به‌غدا و زۆربه‌ى هێڵه‌كانى دیكه‌یان گرانتر و خاو و خراپه.

ئه‌و خاوه‌ن كۆمپانیایه‌ى ئینته‌رنێت گله‌یشى له‌ حكومه‌تى هه‌رێمى كوردستان كرد كه‌ له‌ بڕینى هێڵه‌كانى ئینته‌رنێت له‌ خانه‌قین یه‌ك قسه‌یان نه‌كردووه‌ و ته‌نانه‌ت له‌ ڕووى راگه‌یاندنه‌كانیشه‌وه‌ گرنگى ئه‌وتۆى پێنه‌دراوه.

به‌ وته‌ى سه‌رچاوه‌یه‌كى ئه‌منى له‌ خانه‌قین، له‌كاتێكدا وه‌زیرى په‌یوه‌ندیه‌كانى عێراق سه‌ردانى خانه‌قینى كردووه‌، هێزێكى زۆر گه‌وره‌ و فراوانى له‌ گه‌ڵدابووه‌ و له‌و ماوه‌یه‌ى له‌ خانه‌قین ماوه‌ته‌وه‌ رێگا سه‌ره‌كییه‌كانى ناوه‌ڕاستى خانه‌قینی داخستووه‌ و بووه‌ته‌ جێی نیگه‌رانى هه‌موو لایه‌ك.

وتیشى: “دواتر هه‌ر به‌و هێزه‌ فراوانه‌وه‌ چووه‌ته‌ ناوچه‌كانى دیكه‌ و هه‌رچیه‌ك ویستویانه‌ له‌ خسته‌خواره‌وه‌ى تاوه‌ره‌كانى ئینته‌رنێت و شكاندنى ئامێر و پێداویستییه‌كانى ئه‌و تاوه‌رانه‌ شكاندوویانه”.

بۆ به‌دواداچوونى زیاتر SNN په‌یوه‌ندى به‌ قایمقامى خانه‌قینه‌وه‌ كرد، به‌ڵام بێ ئاكام بوو.

بەشی بکە لە
Previous Next
Close
Test Caption
Test Description goes like this