كۆرۆنا نرخی خانوو و زەوی لە هەڵەبجە دابەزاندووە

0
671

SNN- عەلی حەمە سەعید

بەهۆی نەبوونی هەلی كار و پرۆژەی خزمەتگوزاری و هەروەها بە فەرمی نەكردنی دەروازە سنورییەكان، گواستنەوەی ماڵی خێزانەکان لە شاری هەڵەبجەوە بۆ شار و شارۆچكەكانی دیكەی هەرێمی كوردستان بەردەوامی هەیە، بە وتەی خاوەن نوسینگەكانی كڕین و فرۆشتنی خانووش بڵاوبوونەوەی ڤایرۆسی كۆرۆنا و دابەشنەكردنی موچە هێندەی دیكە بازاڕی خانوو و زەوی سستكردووە و نرخەكانی دابەزاندووە. 

ڕێباز سەیفەدین، خاوەنی یەكێك لە نووسینگەكانی كڕین و فرۆشتنی خانوو و زەوی لە هەڵەبجە بە SNNی راگەیاند: “نرخی خانوو و زەوی بە بەراورد بە دوو ساڵی رابردوو لە هەڵەبجە زۆر دابەزیوە، بەجۆرێك ئەگەر پێشتر خانوویەك بە پێنج دەفتەر دۆلار بفرۆشرایە لە ئەمڕۆدا بە نیوەی ئەو نرخە هەمان خانوو دەكڕدرێت”.

نرخی خانوو و زەوی لە هەڵەبجە %50 دابەزیووە

ئاماژەی بەوەشكرد: “لە مانگێكدا نزیكەی 15 تا 20 هاووڵاتی سەردانمان دەكات بەمەبەستی فرۆشتنی خانووەكانیان ئەمەش وایكردووە كە بە بەراورد بە چەندین ساڵ لەمەوبەر كە مووچە لەكاتی خۆیدا دابەشدەكرا بە رێژەی %50 دابەزیووە، لەگەڵ ئەوەشدا كڕیاری خانوو كەمبووەتەوە چونكە ئەوانەی خانوو دەفرۆشن هەڵەبجە جێدەهێڵن و ڕوو لە شارێكی دیكە دەكەن بەڵام ژمارەیەكی كەمیش هەن كە لە دەرەوەی هەڵەبجەن و دێنە ناو هەڵەبجە نیشتەجێی دەبن”.

ئیسماعیل ئەحمەد، یەكێكە لەو هاووڵاتیانەیەی كە خانووەكەی فرۆشتووە و بەرەو سلێمانی ماڵی گواستووەتەوە بە SNNی راگەیاند: “من بۆ خۆم منداڵی هەڵەبجەم و هەر لە هەڵەبجەش گەورەبووم تا هاوسەرگیریشم ئەنجامدا و بوومە خاوەنی دوو منداڵ، بەڵام بەهۆی نەبوونی هەلی كار و پرۆژەی خزمەتگوزاری لە بەشێكی زۆری گەڕەكەكانی هەڵەبجە و هەروەها بەرجەستە نەبوونی سیمای بەپارێزگابوون، بە ناچاری بڕیارمدا كە هەڵەبجە جێبهێڵم و روو لە سلێمانی بكەم”.

ئەگەر هەڵەبجە بە راستی ببێتە پارێزگا و هەلی کار هەبێت دەگەڕێمەوە

ئەوەشی خستەڕوو: “هەرچەندە ئەم بڕیارەم زۆر قورس بوو بەڵام ناچار بووم هەڵەبجە جێبهێڵم لە پێناو دەستخستنی كار و ژیانێكی باشتر، دڵنیاشم كە ئەو خێزانانەی هاوشێوەی ئێمە هەڵەبجە جێدەهێڵن هەمان گرفت و هۆكاری ئێمە پاڵنەرە بۆیان، بەڵام لەوەش دڵنیام كە ئەگەر رۆژێك بێت هەڵەبجە بە راستی ببێت بە پارێزگا و هەلی كار و پرۆژەی هەبێت، منیش و ئەوانەی كە هەڵەبجەیان جێهێشتووە دەگەڕێینەوە زێدی خۆمان”.

بە گوێرەی ئەو ئامارانەی كە دەست SNN كەوتوون، تەنها لە ماوەی دوو ساڵی رابردوودا زیاتر لە 300 خێزان لە هەڵەبجەوە روویان لە شارەكانی سلێمانی و هەولێر و چەند شارێكی دیكەی كوردستان كردووە، هاوكات مانگانە نزیكەی 15 تا 20 هاووڵاتی سەردانی نوسینگەكانی كڕین و فرۆشتن دەكەن بە مەبەستی فرۆشتنی خانوەكانیان و دواتر بەشێک لەو خێزانانە شاری هەڵەبجە جێدەهێڵن.

زیاتر لە 300 خێزان هەڵەبجەیان جێهێشتووە

كاوە عەلی، جێگری پارێزگاری هەڵەبجە، بۆ  SNNی روونكردەوە: “هەندێكی دیكە لەو خێزانانەی كە كۆچ دەكەن بەرژەوەندییەكی تایبەتیان هەیە بۆ نمونە خێزان هەیە منداڵەكانی خوێندكاری زانكۆن لە سلێمانی لەبری ئەوەی پارەی بەشی ناوخۆیی بدەن، بەخێزانی دەڕۆن لە سلێمانی نیشتەجێ دەبن یاخود دەرفەتێكی باشتری ژیانیان بۆ رەخساوە، بەڵام لە هەموو حاڵەتەكاندا ئەركی حكومەتی هەرێمە كە بەجۆرێك مامەڵە لەگەڵ هەڵەبجەدا بكات کە لە بری ئەوەی خەڵكەكەی جێیبهێڵێن هاووڵاتیان لە ناوچەکانی دیکەوە رووی تێبکەن”.

ئەوەشی وت: “هەر دوێنێ‌ لە لایەن بەرپرسانی باڵای ئێرانەوە پەیوەندیی بە پارێزگاری هەڵەبجەوە كراوە سەبارەت بە هەردوو مەرزی تەوێڵە و پشتە کە لە ساڵی رابردووەوە لەلایەن سەرۆكایەتی كۆماری ئیسلامی ئێرانەوە بە فەرمی ناسێندراون و تەنها رەزامەندی حكومەتی عێراقی ماوە، بۆیە ئەگەر ئەم دوو مەرزە بكرێنە مەرزێكی نێودەوڵەتی بێگومان هەلی كاری زیاتر بۆ هاووڵاتیان دەڕەخسێت و هۆكارێكیش دەبێت بۆ زیاتر بوژانەوەی هەڵەبجەوە جێبەجێكردنی پرۆژەی خزمەتگوزاری لە سنورەكەدا”.

بەشی بکە لە
Previous Next
Close
Test Caption
Test Description goes like this