بەكارهێنانی بۆمب و تەقەمەنی زیانێكی زۆری بە بەرهەمی ماسی گەیاندووە

0
517

SNN-عەلی حەمە سەعید
لەگەڵ دەستپێكردنەوەی وەرزی راوەماسی لە هەرێمی كوردستان و پۆلیس و دارستانی ژینگە رێنمایی لەبارەی شێوازی راوكردن دەدەنە راوچییەكان، بەڵام راوچییەکان بەردەوامن لە بەکارهێنانی بۆمب و تەقەمەنی و ئەوەش زیانێکی زۆری بە بەرهەمی ماسی گەیاندووە.

بە گوێرەی بەدواداچوونەكانی  SNNلە ئێستادا بەهۆی پشووی دام و دەزگاکانەوە، راوکردنی ماسی زیادیکردووە و ئەوە بووەتە هەلێك بۆ ئەو كەسانەی كە ڕوو لە ڕووبار و دەریاچەكان دەكەن بە شێوەیەكی نایاسایی و بەدەر لە رێنماییەكانی پۆلیسی دارستان و ژینگە بە بەكارهێنانی TNT و بۆمب و هەندێك مادەی دیكەی تەقەمەنی راوی ماسی بكەن بەتایبەت لە ناوچەی سازان لە سنووری پارێزگای هەڵەبجە.

ملازم فەرمان عومەر، وتەبێژی پۆلیسی دارستان و ژینگەی هەڵەبجە لەوبارەیەوە بۆ SNN ئەوەی خستەڕوو: “ساڵانە لە دوای كۆتایی هاتنی وەرزی قەدەغەی راوەماسی ئێمە كۆمەڵێك رێنمایی دەدەینە ئەو كەسانەی كە دەیانەوێت راوەماسی بكەن كردوشمانە بە مەرج بەسەریانەوە، كە بریتین لەوەی تەنها دەتوانن بە قولاپ و بەكارهێنانی تۆڕی رێگەپێدراو راوەماسی بكەن، بەڵام بەداخەوە ئەمە وەك خۆی جێبەجێ ناكرێت و هەندێك لە راوچییەكان ماددەی ژەهراوی و تۆڕی كون و ورد و تەقەمەنی و بۆمب بەكاردەهێنن كە ئەمە زیانێكی زۆری بە بەرهەمی ماسی لە سنوورەكەدا گەیاندووە.

ئاماژەی بەوەشكرد: ئێمە ناتوانین بە بەردەوامی لە سەر رووبار و دەریاچەكانی سنورەكە بنكە و بارەگا دابنێین و چاودێری بكەین بەهۆی دابیننەكردنی پێداویستییەكان بۆمان، تەنانەت زۆر جار كاتێك دەزاندرێت چاودێری ئەو راوچییانە دەكەین هەڕەشەمان لەسەر دروست دەبێت، بەڵام ئەمە واینەكردووە كە ئێمە بەكاری خۆمان هەڵنەستین، بۆیە ئەم بابەتە پەیوەندی بە وشیاری تاكە كەسی و هاوكات ویژدانی ئەو كەسانەوە هەیە كە لە پێناو بەرژەوەندی تایبەتی خۆیان هەرچی زیندەوەری ناو ئاوەكانە لە رێگەی ئەو بۆمبانەوە لەناو دەبەن.

وتەبێژەكەی پۆلیسی دارستان و ژینگەی هەڵەبجە ئەوەشی خستەروو: تەنها لەسەرەتای ئەمساڵەوە تا ناوەڕاستی مانگی حوزەیران، توانیومانە دەستبگرین بەسەر 80 چەكی جۆراوجۆر و فیشەك و تاپڕو پێداویستی تەقەمەنی، هاوكات 187 ماسی راوكراو دەستیان بەسەردا گیراوە لەگەڵ 325 تۆڕی راوەماسی، لەگەڵ ئەوەشدا 55 ماسی گەورە و بچوكمان لەدەستی راوچییەكان ئازادكردووە، 187 ماسیشمان بە بڕی یەك ملیۆن و 11 هەزار و 250 دینار فرۆشتووە كە لەلایەن راوچییەكانەوە بە نایاسایی راوكراون و پارەكەشمان گەڕاندوەتەوە بۆ خەزێنەی گشتی حكومەت.

بەشی بکە لە
Previous Next
Close
Test Caption
Test Description goes like this