جوتیارە نموونەیەکە رێگەیەكی نوێ‌ بۆ ساغكردنەوەی بەرهەمی جوتیاران دەدۆزێتەوە

0
1187

SNN-عەلی حەمە سەعید

جوتیارە نموونەییەكەی هەڵەبجە لە رێگەی بیرۆكەیەكی نوێوە و بەدروستكردنی دۆشاوی تەماتە داوا لە هاووڵاتیان دەكات هاوكاری جوتیاران بكەن لە ساغكردنەوەی بەرهەمەكانیان بەتایبەت بەرهەمی تەماتە و فڕێنەدانی بەرهەمەكانیان لە كێڵگە كشتوكاڵییەكاندا، “بەرپرسێكی وەزارەتی كشتوكاڵیش پشتگیری لە بیرۆكەكەی دەكات”.

ئازاد محەمەد، جوتیاری نموونەیی كوردستن و هەڵەبجە بە SNNی راگەیاند: لە ئێستادا كە وەرزی پێگەیشتنی بەرهەمی هاوینەی جوتیارانە لە هەرێمی كوردستان بەتایبەت بەرهەمی تەماتە، بەهۆی بوونی رێژەیەكی زۆرەوە لە بازاڕەكاندا تەماتە ئەو پارەیە ناكات كە جوتیاران رەنجیان پێوەكێشاوە، تەنانە بەشێك لە جوتیارەكان بەرهەمەكانیان فڕێداوە و زیانێكی زۆریان بەرکەوتووە.

ئاماژەی بەوەشكرد، من بەبیرۆكەی خۆم بیرم لەوەكردەوە كە بۆڕێگریكردن لە زیان گەیاندن بە جوتیاران و هەروەها ساغكردنەوەی بەرهەمەكانیان، هەر هاووڵاتییەك زۆر بەئاسانی دەتوانێت بەلایەنی كەم لە ماڵەكەی خۆیدا پلاسكۆیەك تەماتە بكرێت و بیكاتە دۆشاوی تەماتە، كە من بۆخۆم ئەوەم كردووە، ئەمەش چەند سودێكی هەیە لەلایەك بەرهەمی جوتیاران بەئاسانی ساغ دەبێتەوە لەلایەكی دیكەشەوە دۆشاوێكی تەماتەی فرێشمان دەستدەكەوێت كە دروستكراوی هیچ وڵاتێك نییە و تامو بۆنێكی سروشتی و تایبەتی خۆیی هەیە، بۆیە داواكارم لە هاووڵاتیان بۆ یەكجاریش بێت ئەمكارە بكەن.

ئەو جوتیارە لەبارەی ڕەنگاو ڕەنگی دۆشاوی تەماتەكەی ئەوەی وت، “ساڵی پار كاتێك سەردانی یابان و ئەڵمانیامكرد، لەوێ‌ چەند تۆوێكی جیاوازی تەماتەی ڕەنگاوڕەنگم لەگەڵ خۆم هێناوەتەوە، لە كێڵگەكەی خۆم تاقیمكردەوە سەركەوتوو بۆیە هەمان دۆشاوی تەماتەی سورم لێبەرهەم هێناوە و كەهەمان تایبەتمەندی و تامی دۆشاوی تەماتەی هەیە و دەكرێت لەساڵانی داهاتوودا بەشێوەیەكی فراوانتر كاری لەسەر بكەم.

لای خۆیەوە عەبدولكەریم عارف، بەڕێوەبەری كشتوكاڵی شارەزوور، بۆ SNN ئەوەی خستەڕوو، یەكێك لەو گرفتانەی كە ساڵانە رووبەڕووی بەرهەمی جوتیاران دەبێتەوە ئەوەیەكە هەموو بەرهەمەكان لەیەك كاتدا پێدەگەن و دەخرێنە بازاڕەكانەوە ئەمەش وادەكات خستنەڕوو زۆرببێت لەبەرامبەردا خواست كەمببێتەوە و دواجار بەزیانی جوتیارەكان بشكێتەوە، بەڵام ئەگەر بتواندرێت ئەو بەرهەمانە بە پیشەسازی بكرێن جوتیاران لەو گرفتە ڕزگاریان دەبێت بە تایبەت لەڕووی كردنەوەی كارگەی تایبەت بە دۆشاوی تەماتە و دامەزراندنی ساردخانە كە ئەمە ئەركی حكومەتە بیانكات.

ئاماژەی بەوەشكرد، ئەو بیرۆکەیەی (ئازاد محەمەد) بیرۆكەیەكی تەواو زانستی و سەركەوتووە بۆ ساغكردنەوەی بەرهەمی تەماتەی جوتیاران بە مەرجێك هەر خێزانێكی هەرێم ئامادەبێت پلاسكۆیەك تەماتە بكاتە دۆشاو كە لە ڕابردوودا ئەم كارە زۆر بە فراوانی دەكراو هاووڵاتیان بۆ دابینكردنی دۆشاو پشتیان بە خۆیان دەبەست، كە ئەمەش دەچێتە چوارچێوەی بە پیشەسازیكردنی بەرهەمی تەماتە، بۆیە بە هەموو توانایەك پشتگیری ئەو بیرۆكەیە دەكەین.

بەشی بکە لە
تاگەکانهەڵەبجە
Previous Next
Close
Test Caption
Test Description goes like this