یەكێتی وەبەرهێنەران: زیاتر لە 90% پڕۆژەکان وەستاون

0
262

SNN-مەودا مستەفا

یەكێتیی وەبەرهێنەرانی كوردستان رایدەگەیەنێت: زیاتر لە %90ی پرۆژەكان بەهۆی پەتای كۆرۆنا و قەیرانی دارایی وەستاون و تەنانەت كێشەی كۆمەڵایەتیشی لێكەوتووەتەوە .

ئەمڕۆ شەممە، ئەحمەد رێكانی سەرۆكی یەكێتیی وەبەرهێنەرانی كوردستان بە  SNN ی راگەیاند: زیاتر لە %90ی پڕۆژەكانی وەبەرهێنان بەهۆی رێکارەکانی خۆپارێزی لە ڤایرۆسی كۆرۆنا وەستاون و داواشمان لە لایەنە پەیوەندیدارەكان كردوە هاوسەنگی لە نێوان بەگەڕخستنەوەی پڕۆژەكان و خۆپارێزی رابگرێت.

وتیشی: بەهۆی وەستانی پڕۆژەكان بە تایبەتی پرۆژەكانی نیشتەجێبوون كێشەی كۆمەڵایەتی زۆر لە نێوان خاوەن پڕۆژە و هاووڵاتیان درووست بووە، چونكە پڕۆژەی وا هەیە، كاتی تەواو بووە كەچی هێشتا پڕۆژەكەی پێویستی بەچەند مانگێكی تر هەیە بۆئەوەی تەواو بێت .

ئاماژەی بەوەش كرد: “ناكرێت بەهۆی خۆپارێزیەوە ژیانی دەیان هەزار كەس و كرێکار بكەوێتە مەترسییەوە و بێكار بن، دەكرێت حكومەتی هەرێمی كوردستان كارێك بكات لانیكەم بەشێك لەو كرێكارانە بگەڕێنەوە سەر كارەكانیان و دەستبەكار بكەنەوە” .

دەستەی وەبەرهێنان كە یاساكەی لە ئابی 2006 دەرچووە، تاوەكو ئێستا مۆڵەتی وەبەرهێنانی بە 924 پرۆژە داوە، بەڵام 107 پرۆژەیان بەهۆی پابەندنەبوون بە یاسا و رێنماییەكانی وەبەرهێنان، مۆڵەتەكانیان هەڵوەشێنراوەتەوە. ئێستا سەرمایەی وەبەرهێنان گەیشتووەتە 49 ملیار و 407 ملیۆن دۆلار.

بەپێی داتاكانی دەستەی وەبەرهێنان ساڵی زێڕینی پرۆژەكانی وەبەرهێنان لەڕووی قەبارەی سەرمایەوە 2013 بووە كە گەیشتە 11 ملیار و 111 ملیۆن دۆلار، بەڵام دواتر بەهۆی بڕینی بودجەی كوردستان لەلایەن بەغدا و دابەزینی نرخی نەوت و شەڕی داعش،  قەبارەی وەبەرهێنان كەمی كرد، بە جۆرێك ساڵی 2017 كەمترین سەرمایە لە وەبەرهێنان خەرج كراوە كە تەنیا 712 ملیۆن و 461 هەزار دۆلار بووە، بەڵام لە دوای بڵاوبوونەوەی ڤایرۆسی كۆرۆنا و دووبارە دروست بوونەوەی قەیرانی دارایی بە وتەی بەرپرسانی وەبەرهێنان زیاتر لە %90ی پرۆژەكان وەستاون.

بەشی بکە لە
Previous Next
Close
Test Caption
Test Description goes like this