ژووری ئۆپراسیۆنەكانی پارێزگای هەولێر چەند بڕیارێكى نوێ ده‌رده‌كات

0
570
بازاڕى قه‌یسه‌رى له‌ ناوه‌ندى هه‌ولێر | فۆتۆ: SNN

SNN – مەودا مستەفا
ئەمڕۆ ژووری ئۆپراسیۆنەكانی پارێزگای ھەولێر كۆدەبێتەوە و چەند بڕیارێكى نوێ لەبارەی رێكارەكانی خۆپارێزی لە ڤایرۆسی كۆرۆنا دەرده‌كات‌.

مەودا مستەفا، پەیامنێری SNN لە هەولێر رایگەیاند: “ئه‌مڕۆ ژوورى ئۆپراسیۆنه‌كانى پارێزگاى هه‌ولێر به‌ سه‌رپه‌رشتى فرسه‌ت سۆفى، پارێزگارى هه‌ولێر كۆده‌بێته‌وه، له‌ كۆبوونه‌وه‌كه‌دا‌ تاوتوێى چه‌ند بابه‌تێك ده‌كرێت كه‌ یه‌كێكيان بریتیه‌ له‌ بابه‌تى، دانانى تیمى پزیشكى تایبه‌ت به‌و كه‌سانه‌ى كه‌ دێنه‌ ناو شارى هه‌ولێر بۆ ئه‌وه‌ى پشكنینی ڤایرۆسى كۆرۆنایان بۆ ئه‌نجام بدرێت، ئه‌مه‌ سه‌ره‌ڕاى ئه‌وه‌ى رێگه‌ به‌ هاووڵاتییانى ده‌ره‌وه‌ى پارێزگاكه‌ نه‌درێت بێنه‌ ناو هه‌ولێر ته‌نیا بۆ كارى پێویست نه‌بێت”.

وتیشى: “هەڵگرتنی قەدەغەی هاتووچۆی نێوان پارێزگای هەولێر و پارێزگاكانی دیكەی هەرێمی كوردستان یه‌كێكى تره‌ له‌و بابه‌تانه‌ى كه‌ تاوتوێده‌كرێت، بڕیاره‌ له‌دواى كۆتایی هاتنى كۆبوونه‌وه‌كه‌ پارێزگارى هه‌ولێر ناوه‌ڕۆكه‌كه‌ى و بڕیاره‌كانیان رابگه‌یه‌نێت”.

رۆژی 13 ته‌مموزى 2020 پارێزگاری هەولێر رایگەیاند: “لەكاتی سەردانی هاووڵاتییان بۆ هەولێر لە بازگەكان بڕێك پارە وەردەگیرێت كە لە 50 هەزار دینار زیاتر نەبێت، چاوەڕێدەكرێت ئەمڕۆ ژووری ئۆپراسیۆنەكان ئەو پرسە یەكلابكاتەوە”، ئەو بڕیارانە كاتژمێر 12ی ئەمشەو كۆتاییان پێدێت.

بەپێی دوایین ئامارەكانی وەزارەتی تەندروستی، تا ئێستا لە پارێزگای هەولێر دوو هەزار و 580 كەس تووشی ڤایرۆسی كۆرۆنا بوون، لەو ژمارەیەش هەزار و 809 كەس چاكبوونەتەوە و 65 كەسیش گیانیان لەدەستداوە، هەروەها 706 تووشبوو لە نەخۆشخانەكاندا ماونەتەوە و چارەسەر وەردەگرن.

بەشی بکە لە
Previous Next
Close
Test Caption
Test Description goes like this