رۆیتەرز: تورکیا بنکەی سەربازی زیاتر لە هەرێم دەکاتەوە

0
370

SNN

ئاژانسى رۆيتەرز بڵاویکردووەتەوە، توركيا دەیەوێت بنكەى سەربازى كاتى زیاتر بۆ رووبەڕووبوونەوەى پەکەکە لە هەرێمى کوردستان دروستبکات، بەرپرسێکی حکومەتی هەرێمیش رایگەیاندووە: “بۆ ئەوەی گرژی لەگەڵ تورکیادا دروستنەبێت ناچاربووین بێدەنگی بەرامبەر لەشکرکێشیی تورکیا هەڵبژێرین”.

لەوبارەیەوە چەند بەرپرسێكى باڵای توركيا بە رۆیتەرزیان راگەیاندووە: “تورکیا شەڕەکانى لە دژى پەکەکە لە خاکی هەرێم چڕکردووەتەوە، تورکیا بە ستراتیژێکی نوێ دەیەوێت شەڕ دژی پەکەکە بباتە ناو قوڵایی خاکی هەرێم، کە پێکدێت لە دروستکردنی بنکەی سەربازی کاتی و بەکارهێنانی فڕۆکە بێفڕۆکەوانەکان”.

رۆیتەرز دەڵێت: “بەهۆی گەشەسەندنی تەکنەلۆژیا و بەکارهێنانی فڕۆکە بێفڕۆکەوانەکانەوە هاوسەنگی هێز لە بەرژەوەندی تورکیادایە، بەهۆی ئەوەی لە ئێستادا دەستی دەگات بەو شوێنانەی کە پێشتر بە سەختی دەیتوانی پێی بگات”.

ئەوەش خراوەتەڕوو، لە ئۆپراسیۆنی ئەم دواییەی ئەو وڵاتەدا، هێزەکانی تورکیا بە قوڵایی 40 کیلۆمەتر هاتوونەتە ناو خاکی هەرێمەوە و زیاتر لە 30 بنکەی سەربازی کاتی نوێیان داناوە.

بەرپرسێکی حکومەتی هەرێمیش کە نەیویستووە ناوی ئاشکرابکرێت بە رۆیتەرزی وتووە: “بەهۆی بێدەنگی بەغداوە، ئێمەش ناچاربووین بێدەنگی هەڵبژێرین، چونکە نامانەوێت گرژی لەگەڵ تورکیادا دروستبێت”.

لە 17ی مانگی رابردووەوە، تورکیا ئۆپراسیۆنی دژی پەکەکە دەستپێکردووە و هێرشی ئاسمانی و زەمینی لە خاکی هەرێم ئەنجامدەدات ئەوەش جگە لە زیانی گیانی، زیانی ماددیشی بە هاووڵاتیانیی هەرێمی کوردستان گەیاندووە.

بەشی بکە لە
Previous Next
Close
Test Caption
Test Description goes like this