حكومه‌تى هه‌رێم مه‌رجى بۆ به‌غدا داناوه‌ و نامه‌یه‌كى ئاراسته‌ كردووه‌

0
3175
لۆگۆى حكومه‌تى عێراق و حكومه‌تى هه‌رێم | فۆتۆ: SNN

SNN

ئه‌ندامێكى ئه‌نجوومه‌نى نوێنه‌رانى عێراق رایده‌گه‌یه‌نێت: حكومه‌تى هه‌رێم و حكومه‌تى ناوه‌ندیی نامه‌یه‌كیان ئاڵوگۆڕ كردووه‌ له‌باره‌ى چاره‌سه‌ركردنى كێشه‌ داراییه‌كانى نێوانیان، ده‌شڵێت: “حكومه‌تى هه‌رێم به‌ روونى ئه‌وه‌ى به‌ به‌غدا وتووه‌ كه‌ ئاماده‌نین ته‌واوى داهاتى ده‌روازه‌ سنوورییه‌كان و نه‌وت راده‌ست بكه‌ن”.

حه‌سه‌ن ‌ئاڵى، ئه‌ندامى ئه‌نجوومه‌نى نوێنه‌رانى عێراق له‌ فراكسیۆنى سه‌وز به‌ میدیا عێراقییه‌كانى راگه‌یاندووه‌: “حكومه‌تى هه‌رێم نامه‌یه‌كى ئاراسته‌ى به‌غدا كردووه‌ زانیارى ته‌واوه‌تى پێداوه‌ له‌باره‌ى مه‌رج و چۆنیه‌تى راده‌ستكردنى نه‌وت و داهاتى ده‌روازه‌ سنوورییه‌كان له‌ به‌رامبه‌ر ناردنى مووچه‌، له‌ ئێستاشدا وه‌فدى حكومه‌تى هه‌رێم چاوه‌ڕێى به‌غدایه‌ بۆ ئه‌وه‌ى وه‌ڵامیان بداته‌وه‌ دووباره‌ بڕۆن بۆ به‌غدا”.

 

ئاماده‌نین نه‌وتى هه‌رێم و داهاتى ده‌روازه‌ سنوورییه‌كان راده‌ستى به‌غدا بكه‌ن له‌ به‌رامبه‌ر ناردنى 600 ملیار دینار

په‌رله‌مانتاره‌كه‌ى یه‌كێتى له‌باره‌ى هه‌ڵوێستى حكومه‌تى هه‌رێم له‌سه‌ر راده‌ستكردنى نه‌وت و داهاتى ده‌روازه‌ سنوورییه‌كان وتووشیه‌تى: “حكومه‌تى هه‌رێم زۆر به‌ روونى به‌غداى له‌وه‌ دڵنیاكردووه‌ته‌وه‌ كه‌ ئاماده‌نین نه‌وتى هه‌رێم و داهاتى ده‌روازه‌ سنوورییه‌كان راده‌ستى به‌غدا بكه‌ن له‌ به‌رامبه‌ر ناردنى 600 ملیار دینارى مووچه‌ى فه‌رمانبه‌ران به‌شێوه‌ى مانگانه‌”.

له‌باره‌ى ئه‌و مه‌رجه‌ى كه‌ حكومه‌تى هه‌رێم پێى رازییه‌ ئه‌و په‌رله‌مانتاره‌ ئه‌وه‌شى خستووه‌ته‌ڕوو: “مه‌رجه‌كه‌ى ئه‌وه‌ بووه‌ داهاتى نه‌وت و 50٪ى داهاتى ده‌روازه‌ سنوورییه‌كان راده‌ستى به‌غدا بكرێت له‌ به‌رامبه‌ردا حكومه‌تى عێراق به‌ڵێن بدات ئه‌و پاره‌یه‌ى كه‌ ده‌ینێرێت بۆ هه‌رێم زیاترى بكات و شایسته‌ى كۆمپانیا نه‌وتییه‌كانیش بخاته‌ ئه‌ستۆى خۆى”.

پێشتر جوتیار عادل، وته‌بێژى حكومه‌تى هه‌رێمى كوردستان رایگه‌یاندبوو: “حكومه‌تى هه‌رێم ئاماده‌یه‌ له‌گه‌ڵ حكومه‌تى ناوه‌نديى رێكبكه‌وێت”.

مه‌رج و داواكارییه‌كانى حكومه‌تى هه‌رێم بۆ حكومه‌تى ناوه‌ندیی به‌غدا له‌ كاتێكدایه‌ تا ئێستا وه‌زاره‌تى دارایی حكومه‌تى هه‌رێم مووچه‌ى مانگى شوباتى دابه‌شكردووه‌، ئه‌مڕۆش سه‌ركۆ ئازاد، ئەندامی لیژنەی دارایی و ئابووری لە پەرلەمانی كوردستان بە SNNی راگەیاند: “دوای كۆبوونەوەمان لەگەڵ وەزیری دارایی و بەڕێوەبەری گومرگ و خاڵە سنوورییەكان بۆمان دەركەوت حكومەت و وەزارەتی دارایی هیچ بڕە پارەیەكیان لەبەردەستدانییە بۆ دابەشكردنی مووچەی فەرمانبەران بۆ مووچەی ئەم مانگە (مووچه‌ى مانگى ئازار)”.

نرخى نه‌وت به‌رزبوونه‌وه‌ى به‌خۆیه‌وه‌ بینیووه‌

هاوكات نرخى نه‌وت به‌رزبوونه‌وه‌ى به‌خۆیه‌وه‌ بینیووه‌ له‌ ئێستادا نرخى یه‌ك به‌رمیل نه‌وتى خاوى برێنت له‌ بازاڕه‌ جیهانییه‌كاندا به‌ 43 دۆلار و 37 سه‌نت مامه‌ڵه‌ى پێوه‌ده‌كرێت، ئه‌مه‌ش به‌ به‌راورد به‌ مانگه‌كانى ئازار و نیسان و ئایار و حوزه‌یرانى ئه‌مساڵ به‌رزبووه‌نه‌وه‌یه‌كى به‌رچاوه‌‌، چونكه‌ نرخى یه‌ك به‌رمیل نه‌وتى برێنت پێشتر‌ 20 دۆلار بوو .

بەشی بکە لە
Previous Next
Close
Test Caption
Test Description goes like this