وێنە: بەهۆی کەوتنەوەی ئاگر لە بازاڕێکی هەولێر سەدان دوکان سوتان

پەیامنێری SNN رایگەیاند: لە سەرلەبەیانی ئەمڕۆوە تیمەکانی بەرگری شارستانی لە هەوڵی کۆنتڕۆڵکردنی ئاگرەکەدا بوون و دوای سێ کاتژمێر توانیویانە کۆنتڕۆڵی بکەن، بەڵام زیانێکی زۆر بەر دوکاندارانی بازاڕە میلییەکە کەوتووە کە بە بازاڕی (سیمی) ناودەبرێت.

سەباح عەلی، خاوەنی یەکێک لەو دوکانانە بە SNNی راگەیاند: ژمارەی ئەو دوکانانەی کە سوتاون زیاترە لە 200 دوکان.

ئاماژەی بەوەشکرد: “ئەمە یەکەمجار نیە رووداوی لەو شێوەیە لە بازاڕەکە رووبدات، ساڵی رابردوو لە یەکەم رۆژی جەژنی ڕەمەزان بازاڕەکە سوتا و هێشتا قەرەبوو نەکراوینەتەوە، بۆیە داواکارین لایەنە پەیوەندیدارەکان قەرەبووی زیانەکانمان بکەنەوە”.

بە گوێرەی ئەو زانیارییانەی دەست SNN کەوتوون، ئاگرەکە بەهۆی شۆرتی کارەباوە بووە، بەرگری شارستانی هەولێریش رایگەیاندووە: سەرقاڵی لێکۆڵینەوەن لە رووداوەکە.