وادەی دەسپێكردنەوەی هاتوچۆی هاووڵاتییان لە مەرزی باشماخەوە راگەیەندرا

0
645

SNN-عەلی حەمە سەعید

سەرپەرشتیاری كەرتی تەندروستی لە مەرزی نێودەوڵەتی باشماخ، ئاشكرایكرد كە لە سبەی دووشەممەوە هاتوچۆی هاووڵاتییان لە مەرزی نێودەوڵەتی باشماخ دەستپێدەكاتەوە، ئەو هاووڵاتییانەی كە لە ئێرانەوە دێنە هەرێمی كوردستان بەڵێننامەیان پێ پڕدەكرێتەوە كە دەبێت لەماڵەكانیان خۆیان كەرەنتینە بكەن تا ئەنجامی پشكنینەكانیان دەردەچێت ئەو كەسانەشی سەردانی ئێران دەكەن دەبێت لە كۆنسوڵگەری ئێران ڤیزا وەربگرن.

هێرش عەلی سەرپەرشتیاری كەرتی تەندروستی لەمەرزی نێودەوڵەتی باشماخ، بە SNNی راگەیاند: دوابەدوای دەرچوونی فەرمانی وەزارەتی ناوخۆ بۆ هاتوچۆكردنی هاووڵاتییان لە مەرزی باشماخ، بڕیارە لە سبەی دووشەممە 27 تەمموز ڕۆشتن و هاتنی هاووڵاتییان لە مەرزی باشماخەوە دەستپێبكاتەوە، بەڵام چەندمەرجێك دانراون دەبێت لەكاتی هاتن و چوونی هاووڵاتییان جێبەجێیان بكەن پاشان ڕێگەیان پێدەدێت بڕۆنە ئێران یاخود لەئێرانەوە بێنە هەرێمی كوردستان.

روونیشكردەوە، “ئەو كەسانەی كە لەئێرانەوە دێنە هەرێم، سەرەتا پشكنینی ڤایرۆسی كۆرۆنایان بۆ ئەنجام ئەدەین پاشان بەڵێننامەیان پێپڕدەكەینەوە كە دەبێت لەماڵەوە كەرەنتین بكرێن تا ئەوكاتەی ئەنجامی پشكنینەكەیان دەردەچێت، بۆ ئەومەبەستەش سەرپەرشتیاری مەرزی نێودەوڵەتی باشماخ تەندروستی سلێمانی راسپاردووە بەدابینكردنی پشكنینی خێرا بۆسەرجەم ئەو شۆفێرە ئێرانی و بیانیانەی دێنە خاكی هەرێم، بۆیە تا ئەوكاتەی ئەو پشكنینە خێرایانە دەگەنە دەستمان رێگە نادەین هیچ شۆفێرێكی بارهەڵگری ئێرانی و بیانی بێتە هەرێمی كوردستان”.

سەرپەرشتیاری كەرتی تەندروستی لەمەرزی نێودەوڵەتی باشماخ، ئەوەشی خستەڕوو، “ئەو هاووڵاتییانەی كە بۆ مەبەستەكانی نەشتەرگەری و هاوسەرگیری وخوێندن هەركارێكی دیكە دەیانەوێت سەردانی ئێران بكەن، دەبێت سەرەتا لە رێگەی ئۆنڵاینەوە ناوی خۆیان تۆماربكەن و رەزامەندی وەزارەتی ناوخۆ بەدەستبهێنن، پاشان سەردانی كۆنسوڵگەری ئێران لە سلێمانی بكەن و ڤیزە وەربگرن دواتر رێگەیان پێدەدرێت لە مەرزی باشماخەوە بچەنە ئێران”.

دەرچوونی ئەو رێنماییانە لە كاتێكدایە كە پێش بڵاوبوونەوەی ڤایرۆسی كۆرۆنا، هاووڵاتییانی هەرێم بەبێ‌ وەرگرتنی ڤیزا دەیانتوانی سەردانی ئێران بكەن.

بەشی بکە لە
Previous Next
Close
Test Caption
Test Description goes like this