پۆلیس لەبارەی جێهێشتنی نامەیەك لە دوای گیانلەدەستدانی بریندارێكی چەكی كیمیایی روونكردەوە دەدات

0
837

SNN-عەلی حەمە سەعید

دوای ئەوەی دوێنێ‌ هاووڵاتییەك كە برینداری چەكی كیمیایی هەڵەبجە بوو لەباخی گشتی كۆتایی بە ژیانی خۆی هێنا، نامەیەك لە تۆڕە كۆمەڵایەتییەكان بڵاوكرایەوە گوایە ئەو هاووڵاتییە لەدوای خۆی بەجێی هێشتووە، وتەبێژی پۆلیسی هەڵەبجە دەڵێت :” هێزەكانمان چونەتە سەر تەرمەكەی هیچ نامەیەكی پێ نەبووە و نامەكە هیچ بنەمایەكی نییە”، ئێوارەی ئەمڕۆش لەباخی گشتی هەڵەبجە خۆپیشاندانێك بەڕێوەدەچێت.

بەرزان عوسمان، وتەبێژی پۆلیسی پارێزگای هەڵەبجە بەSNNی راگەیاند: دوای ئەوەی دوێنێ‌ لە باخی گشتی هەڵەبجە یەكێك لە بریندارانی چەكی كیمیایی بەناوی ( كاوە حەمە ئەمین) كۆتایی بە ژیانی خۆی هێنا، دواتر لە تۆڕە كۆمەڵایەتییەكان نامەیەك بە خێرایی بڵاوبووەتەوە كە گوایە ئەو كەسە لەدوای خۆی جێی هێشتووە، بەڵام ئەو نامەیە هیچ بنەمایەكی نییە، نازانین كێ بەناوی ئەو هاووڵاتییەوە بڵاویكردووەتەوە، بەداخەوە ئەو هاووڵاتییە لە ژیان نەماوە، نەدەبوو كەسانێكی بێویژدان ئەو نامەیە بەناوی ئەوەوە بڵاوبكەنەوە.

ئاماژەی بەوەشكرد، “ئەو هاووڵاتییە كێشەی خێزانی هەبووە و بەو هۆیەوە كۆتایی بە ژیانی خۆی هێناوە، كاتێكیش هێزەكانمان چونەتە سەر تەرمەكەی هیچ نامەیەكی پێنەبووە و نامەكە هیچ بنەمایەكی نییە”.

هەر دوێنێش لوقمان عەبدولقادر سەرۆكی كۆمەڵەی قوربانیانی كیمیابارانی هەڵەبجە بۆ SNNی روونكردەوە، كە نەناردنە دەرەوەی بەركەوتووانی چەكی كیمیایی و خراپی باری دارایی و تەندروستی و دەرونییان هێندەی دیكە دۆخی ژیانی بریندارانی چەكی كیمیایی سەختكردووە بە جۆرێك كە پەنا بۆكاری نەخوازراو ببەن.

وابڕیارە سەر لە ئێوارەی ئەمڕۆش بەشێك لە چین و توێژە جیاوازەكانی هەڵەبجە لە باخی گشتی گردبوونەوەیەكی ناڕەزایەتی سەبارەت بە ئاوڕنەدانەوە لە دۆخ و ژیانی هاووڵاتییان و بریندارانی چەكی كیمیایی هەڵەبجە بەڕێوەببەن.

بەشی بکە لە
Previous Next
Close
Test Caption
Test Description goes like this