فراکسیۆنی کۆمەڵ لەبارەی پەسەندکردنی دەستلەکارکێشانەوەی سۆران عومەر روونکردنەوە دەدات

SNN

ئەمڕۆ دووشەممە پاش کۆبوونەوەی پەرلەمانی کوردستان و لە كۆی 89 پەرلەمانتاری ئامادەبوو 55 پەرلەمانتار دەنگیان بە نامەی دەستلەكاركێشانەوەكەی سۆران عومەردا، پاش ئەم دەنگدانە فراکسیۆنی کۆمەڵی ئیسلامی راگەیەندراوێک بڵاودەکاتەوە.

دەقی راگەیەندراوەکە:

ئەمڕۆ 27ی تەمموزی 2020 دەستلەکارکێشانەوەی (سۆران عومەر) پەرلەمانتاری فراکسیۆنەکەمان لە کۆبوونەوەی پەرلەمان و بە زۆرینەی دەنگ پەسەندکرا.

بەم بۆنەیەوە وەک فراکسیۆنی کۆمەڵ چەند ڕاستییەک بۆ رایگشتیی و دەسەڵاتی سیاسیی دەخەینەڕوو:

1. دەسەڵات بەو هەموو شکست و گەندەڵییەی تێیکەوتووە، بەو هەموو کارەساتەی بەسەر خەڵک و خاکی هەرێمی کوردستاندا هێناوێتی، هێشتا ئەوەندە کەم تەحەمول و سینە تەنگە بەرگەی ڕەخنەیەک ناگرێت و نایەوێ حەقیقەت ببیستێ، بۆیە هەرزوو کەوتە بەکارهێنانی یاسا و دادگا بۆ بێدەنگکردنی خەڵک و نوێنەرەکانی .

2. راستە سۆران ئەندامی فراکسیۆنی کۆمەڵ بوو، بەڵام نوێنەرێکی بەجورئەتی خەڵک و پەرلەمانتارێکی چالاکی کوردستان بوو، بە دەستلەکارکێشانەوەشی زیان بە دەنگی خەڵکی مەزڵوم کەوت و پەرلەمان یەکێک لەو دەنگانەی لەدەستدا کە بەردەوام دژ بە گەندەڵیی بەرز بووە .

3. سیاسەتی بێدەنگکردن و سەرکوتکاری تاسەر بەردەوام نابێت، ڕۆژێک دێت ئەم ستەمکارییە کۆتایی بێت، تاکە رێگەی دروست، سەلماندنی پەرێز پاکی دەسەڵاتە بۆ خەڵک و دروستکردنی متمانەیە نەک بەکارهێنانی دادگا و یاسا بۆ بەرژەوەندی شەخسیی و حزبیی !

عەبدولستار مەجید
سەرۆکی فراکسیۆنی کۆمەڵ
لە پەرلەمانی کوردستان
27 ی تەمموزی 2020