چیرۆكی ئەو پیاوەی 30  ساڵی تەمەنی بۆ خزمەتکردنی ژینگە بەسەربردووە

0
148

SNN-عەلی حەمە سەعید

كاتێك دەچیتە هەڵەبجە، پیاوێكی سەروڕیش سپی لە یەكێك لە شەقامەكانی شارەكەدا دەبینرێت کە نزیكەی 30 ساڵە كاری گوڵفرۆشی دەكات، لە رێگەی رادیۆكەی دەستیشییەوە بەردەوام گوێ‌ لە رووداوەكانی جیهانیش دەگرێت، وەك خۆی دەڵێت زیاد لە 30 ساڵە لەژێر ئەم كەپرەدا بە بێ‌ ئەوەی دەستكاری بكەم و تێكی بدەم، خزمەتم بە ژینگە و سروشتی ناوچەكە كردووە زۆریش ئاسودەم بە كارەكەم. 

جەمال تۆفیق، كە تەمەنی 69 ساڵە و زیاد لە 30 ساڵە تەمەنی لەگەڵ گوڵ و نەمام بەسەر بردووە بە SNNی راگەیاند: هەر لە منداڵییەوە شەیداری گوڵ و نەمام و ژینگەی سەوز بووم، هەر ئەمە وایلێكردم كە بتوانم نەمامگەیەك دروستبكەم و لە نەمامگەكەدا بەردەوام خەریكی خزمەتكردنی گوڵەكانبم كە چەندین جۆری گوڵی جۆراوجۆرم بەرهەمهێناوە، لەلایەك كردومەتە سەرچاوەی دارایی و بژێوی ژیانم لە لایەكی دیكەشەوە خزمەتێكم بە ژینگە و سروشتی ناوچەكە كردووە.

ئاماژەی بەوەشكرد: “دوای كیمیابارانی هەڵەبجە و ئاوارە بوونی دانیشتوانەكەی ئێمەش بەرەو ئێران رۆشتین لە ئۆردوگای كەنگاوەر نیشتەجێبووین، لەوێش هەر بیرم لای سەوزایی و گوڵ و نەمام بوو.

“ناڕەحەتیەكانی ژیان و ئاوارەیی چرچولۆچی خستتە ناو روخسارمەوە بەڵام لەگەڵ ئەوەشدا هەر كۆڵم نەدا لە خزمەتكردنی ژینگە، بۆیە كاتێك خەڵكی كوردستان راپەڕینیان كرد لە دژی زوڵم و ستەمی رژێمی بەعس جارێكی دیكە گەڕاینەوە بۆ هەڵەبجە، ئەوكات هەڵەبجە تەنیا سێ‌ ماڵی تێدابوو”.

جەمال تۆفیق، بەدەم خزمەتكردنی گوڵەكانی و ئاودانیان بەردەوام بوو لە گێڕانەوەی چیرۆكەكی و ئەوەی وت: كاتێك گەڕاینەوە بۆ هەڵەبجە بیرم لەوە كردەوە كە دەبێت كارێك بكەم خزمەت بە ژینگە و سروشتی جوانی هەڵەبجە بكات، بۆیە بە خێرایی دەستمكرد بە پاككردنەوە ئەم زەوییەی كە ئێستا تیایدا نیشتەجێم، لە پاشماوەی وێرانكاری رووخانی خانووەكان كەپرێكم دروستكرد، دەستمكرد بە كاری سەوزە و كاری گوڵفرۆشی، لەو كاتەوە تا ئێستا هەمان ئەو كەپرەی كە دروستم كردووە تێكم نەداوە و نەمگۆڕیوە وەك خۆی ماوەتەوە، كەلەقامیش و دارچنار و حەسیر دروستمكردون.

ئەو ژینگەدۆستە دەڵێت: “زۆر بە كارەكەم دڵخۆشم، چونكە زۆر ماندووم لەگەڵ كارەكەمدا، بەڵام كاتێك دەبینم گوڵەكانم بە سەوزە دەدرەوشێنەوە و ماڵ و شوێنە گشتییەكان سەوزدەكەم و ژینگە و سروشی ناوچەكەش بە پاكی رادەگرم، هەموو ئەو ماندووبوونەم بیردەچێتەوە”.

بەشی بکە لە
Previous Next
Close
Test Caption
Test Description goes like this