مەڵبەندی دووی رێکخستنی کەرکوکی یەکێتی: رێگه‌ ناده‌ین كه‌س دەست بۆ زەوی و زاری کورد به‌رێت

0
290
لۆگۆى یەکێتیی نیشتمانیی کوردستان | فۆتۆ: SNN

SNN

ئه‌مڕۆ یه‌كشه‌ممه‌ مەڵبەندی دووی رێکخستنی کەرکوکی یەکێتیی نیشتمانیی كوردستان راگه‌یه‌نراوێكى بڵاوكرده‌وه‌ له‌باره‌ى هێنانى 30 خێزانى عه‌ره‌بى هاورده‌ بۆ دوزخورماتوو و رایگه‌یاند: داوا لە سەرۆککۆمار، سەرۆكوەزیران، وەزیری ناوخۆی عێراقی فیدڕاڵ، نەتەوە یەکگرتووەکان و سەرجەم رێکخراوە نێودەوڵەتییەکان و لایەنە پەیوەندیدارەکانی دیکە دەکەین رێگە لەم دەستدرێژی و داگیرکارییە بگرن.

له‌ ده‌قى راگه‌یه‌نراوه‌كه‌دا كه‌ كه‌مێك له‌مه‌وبه‌ر‌ بڵاوكراوه‌ته‌وه‌ مەڵبەندی دووی رێکخستنی کەرکوکی یەکێتیی نیشتمانیی كوردستان ئاماژه‌ى به‌وه‌كردووه‌، “بە داخەوە لە کاتێکدا هاونیشتمانییانی کەرکوک و دوزخورماتوو سەرقاڵی بەڕێکردنی بۆنەکانی جەژنی قوربانن، لەم کاتەدا و بەدەر لە رێوشوێنە دەستووری و یاساییەکان بەشێک لە “عەرەبە هاوردەکان” کە لەدوای پڕۆسەی ئازادیی عێراقەوە کەرکوک و دەوربەریان بەجێهێشتووە و پێشتر لە چوارچێوەی سیاسەتی بە عەرەب کردن هێنرابوونە کەرکوک ناوچەکانی دەوروبەری، ئەمڕۆ جارێکی تر و بە مەبەستی بە عەرەب کردنەوەی ناوچەکانی (حەفتەغار و مەهاوش و کولیتەپەی سەر بە شارۆچکەی داقوق) بە هێزێکی زۆرە هاتوونەتەوە سنوورەکە و دەیانەوێت دووبارە لە سەر زەوی و زاری کوردی رەسەنی دانیشتووی ئەو ناوچانە نیشته‌جێ بکرێنەوە”.

له‌ راگه‌یه‌نراوه‌كه‌دا ئه‌وه‌شخراوه‌ته‌ڕوو، “لەم رووەوە داوا لە سەرۆککۆمار، سەرۆکوەزیران، وەزیری ناوخۆی عێراقی فیدڕاڵ، نەتەوە یەکگرتووەکان و سەرجەم رێکخراوە نێودەوڵەتییەکان و لایەنە پەیوەندیدارەکانی دیکە دەکەین کە بەپەلە رێگە لەم دەستدرێژی و داگیرکارییە بگرن و رێگە نەدەن ئاشتی کۆمەڵایەتیی بشێوێنرێ و پەیوەندی لە مێژینەی نێوان پێکهاتە رەسەنەکانی کەرکوک تێکبدرێت، ئێمە لە یەکێتیی نیشتمانیی کوردستان سەرلەبەری ئەم هەڵسوکەوتە داگیرکارییە رەتدەکەینەوە و بە سەرەتایەکی مەترسیداریشی دەزانین بۆ لێکترازانی نێوان پێکهاتەکان بە تایبەتیش نێوان کورد و عەرەب، لەو رووەوە داوا لە هێزە ئەمنییەکانیش دەکەین بەپەلە رێوشوێنە دەستوورییەکان بگرنەبەر و رێگە لەم داگیرکارییە بگرن و لایەنگیری نەکەن”.

له‌ كۆتاى راگه‌یه‌نراوه‌كه‌دا مەڵبەندی دووی رێکخستنی کەرکوکی یەکێتیی نیشتمانیی کوردستان ئاماژه‌ى به‌وه‌شكردووه‌، “لەم سۆنگەیەوە هەموو لایەک ئاگاداردەکەینەوە کە بەهیچ شێوەیەک رێگەنادەین دەست بۆ زەوی و زاری کورد ببرێ و لەو پێناوەدا هەموو رێوشوێنێک دەگرینەبەر و ئامادەی هەموو شێوازێکی خەباتی مەدەنی و سیاسین، هەر ئەمڕۆش لێپرسراوی مەڵبەندی کەرکوک و پەرلەمانتارەکان لە سەرخەتبوون بۆ ئەو مەبەستە و پەیوەندییان بە بەڕێز سەرۆککۆمار و وەزیری ناوخۆ و لایەنەکانی ترەوە کردووە و لە بەرامبەردا ئەوانیش بەڵێنیان داوە بە دەستوور و یاسا چارەسەری ئەم کێشەیە بکەن و هەر رێوشوێنێک پێویست بوو بيگرنەبەر‌ بە مەبەستی کۆتایی هێنان بەم کێشەیە”.

پێشتر كه‌ریم شوكر، به‌رپرسى مه‌ڵبه‌ندى یه‌كێتى له‌ خورماتوو به‌ SNNى راگه‌یاند: ” به‌یانى ئه‌مڕۆ به‌ هاوكارى هێزه‌ ئه‌منییه‌كان 30 خێزانى عه‌ره‌بى هاورده‌ هێنراون بۆ هه‌ردوو ناوچه‌ى (ته‌په‌ كولى) و (حه‌فته‌غار) كه‌ پێشتر له‌ ساڵانى نه‌وه‌ته‌كان له‌ لایه‌ن رژێمى به‌عسه‌وه‌ ئه‌و ناوچانه‌ ته‌عریب كران و دوو كۆمه‌ڵگه‌ى تێدا دروستكرا به‌ ناوى كۆمه‌ڵگاى مه‌هاوش و حه‌فته‌غار و كورده‌كان ده‌كران”.

وتیشى: “له‌ دواى رووخانى رژێمى به‌عسه‌وه‌ كورده‌كان جارێكى دیكه‌ گه‌ڕانه‌وه‌ زێدى خۆیان و ئه‌و عه‌ره‌بانه‌ ناوچه‌كه‌یان به‌جێهێشت، به‌ڵام ئه‌مڕۆ جارێكى دیكه‌ ده‌یانه‌وێت ئه‌و ناوچه‌یه‌ ته‌عریب بكه‌نه‌وه‌، 30 خێزان بۆ هه‌ردوو ناوچه‌كه‌ هێنراون ده‌یانه‌وێت كورده‌كان ده‌ربكه‌ن”.

بەشی بکە لە
Previous Next
Close
Test Caption
Test Description goes like this