“هاتنی ئەو ژمارە زۆرەی گەشتیاری عەرەب مەترسی دووبارە بەرزبوونەوەی ژمارەی کۆرۆنای هەیە”

0
311

SNN-عەلی حەمە سەعید

وتەبێژی بەڕێوەبەرایەتی گشتی تەندروستیی سلێمانی ئاماژە بەوەدەكات بەهۆی پابەند بوونی هاووڵاتییان بەڕێكار و رێنماییەكان لە كۆنتڕۆڵكردنی تەواوەتی پەتای كۆرۆنا نزیك بووینەتەوە، بەڵام بەداخەوە هاتنی ئەو ژمارە زۆرەی گەشتیارانی عەرەب لە پارێزگاكانی دیكەوە بۆ سنووری سلێمانی مەترسی دووبارە بەرزبوونەوەی ژمارەی تووشبووانی هێناوەتەوە ئاراوە.

د. یاد نەقشبەندی، وتەبێژی بەڕێوەبەرایەتی گشتی تەندروستیی سلێمانی، بە SNNی راگەیاند: لە كۆتا كۆبوونەوەی لیژنەی باڵای رووبەڕووبوونەوەی كۆرۆنا لە سلێمانی بڕیاردرا كە یەك گەشتیاری پارێزگاكانی باشوور و ناوەڕاست نەیەنە سنووری سلێمانی، بەڵام بەداخەوە ئەوەی لە ڕۆژانی جەژن و دواتریش بینیمان هاتنی ژمارەیەكی زۆری گەشتیاری پارێزگاكانی باشوور و ناوەڕاستی عێراق بوو كە ئێمەش وەك كەرتی تەندروستی هۆكاری هاتنی ئەو ژمارە زۆرەی گەشتیارە نازانین.

ئاماژەی بەوەشكرد، ئامارەكان لەماوەی رابردوودا زۆر جێگەی دڵخۆشی بوون و بەرەو داكشانێكی زۆر زۆر ڕۆشتن لە ماوەی چوار ڕۆژی جەژندا تەنها 78 تووشبووی نوێ‌ تۆماركراون و 43 تووشبووش چاكبوونەتەوە تەنها 16 حاڵەتی گیان لەدەستدان تۆماركراوە، بەڵام ئەوەی ئێستا ئێمە ترسمان لێی هەیە و بووەتە جێگەی نیگەرانیمان ئەوەیە كە پێشبینی دەكەین پاش هەفتەیەكی دیكە ژمارەی تووشبوون بە كۆرۆنا جارێكی دیكە ڕوو لە بەرز بوونەوە بكات بەهۆی ئەو بەریككەوتنەی كە لە نێوان هاووڵاتییان و ئەو گەشتیارە عەرەبانە روویداوە لە ڕۆژانی جەژندا.

وتەبێژی بەڕێوەبەرایەتی گشتی تەندروستیی سلێمانی، ئەوەشی خستەڕوو، “هاتنی ئەو گەشتیارە عەرەبانە بەشێوەی هەڕەمەكی بووە، بۆیە لە ئێستادا هیچ ئامار و داتایەكمان لەبەردەستدا نییە لەسەر ژمارەیان و ئەمجامدانی پشكنینی كۆرۆنا بۆیان، هاوكات پابەند بوونی هاووڵاتییانی دانیشتووی سلێمانی جێگەی سوپاسە كە كەمترین تێكەڵاوی بەریككەوتنیان هەبووە، بۆیە پێناچێت هاوشێوەی جەژنی ڕەمەزان ژمارەی تووشبوون بە كۆرۆنا بە خێراییەكی زۆر بەرەو هەڵكشان بچێت، بەتایبەت ئەگەر ئەو گەشتیارە عەربانەش نەهاتنایە ئەوا بەدڵنیاییەوە ڕەوشەكە بەرەو كۆنتڕۆڵی تەواوەتی دەچوو”.

بەشی بکە لە
Previous Next
Close
Test Caption
Test Description goes like this