گەنجێكی دانیشتووی هەولێر: رۆژی جیهانی گەنجان بۆ ئێمە بێ واتایە

0
324

SNN- مەودا مستەفا

لە رۆژی جیهانی گەنجاندا گەنجانی شاری هەولێر نیگەرانن لە رەوشی خۆیان و رەخنە لە حكومەت دەگرن بەوەی كە ئەو توێژەی فەرامۆشكردووە، گەنجێكیش دەڵێت: ”وای لێهاتووە هیچ خۆشی و ئارەزوویەک لەم نیشتمانە نابنین و رێگەی هەندەران بگرینەبەر و نیشتمان بۆ بەرپرسان و كوڕەکانیان جێبهێڵین” .

ئەمڕۆ 12ی ئاب بە ‌ڕۆژی جیهانی گەنجان-ە و لەم ڕۆژەدا لەسەرتاسەری جیهان بە ‌چالاكی و بۆنەی تایبەت ئەو ڕۆژە پیرۆز دەكەن، بەڵام ئەمساڵ بەهۆی بڵاوبوونەوەی ڤایرۆسی كۆرۆناوە هیچ چالاكییەك بەڕێوە ناچێت.

لەم رۆژەدا گەنجانی شاری هەولێر رووی رەخنە دەكەنە حكومەتی هەرێم و تۆمەتباری دەكەن بەوەی كە پەراوێزی خستوون.

عەدنان بورهان گەنجێکی بێكاری شاری هەولێرە و دەڵێت: “كێشە وگیر و گرفتی گەنجانی باشووری كوردستان تا ڕادەیەك زۆرن كە هیچ جۆرە ئینتیمایەكیان بۆ پیرۆزیی نیشتمان نەماوە و پۆل پۆل بەرەو هەندەران كۆچ دەكەن، ئەمەش مەترسی گەورە بەجێدەهێڵێت كە چینی گەنج لەناو كۆمەڵگەدا كەمدەكاتەوە، پێویستە حكومەتی هەرێم ئاوڕێكی جددی لە گەنجان بداتەوە و زەمینەی لەباریان بۆ بڕەخسێنێت، لە دامەزراندن و سوود وەرگرتن لەتواناكانیان بۆ بنیاتنانی كۆمەڵگەیەكی هۆشیار.

دلشاد موشیر گەنجێکی تەمەن 25 ساڵە و ئاماژە بەوە دەكات لە ماوەی تەمەنی تاوەكو ئێستا خۆشی لە ژیانی خۆیدا نەبینوە و هەموو كاتیش گیرفانەكانی خاڵی بووە، هەروەها ئەو دەڵێت: “بە بڕوای من لە ئێستادا جێهێشتنی كوردستان ئەركێكی ئاینی و نیشتمانییە، لەبەرئەوەی حكومەت ناتوانێت هیچ شتێك بۆ گەنجان بكات و ئەوەی واستە و شتیشی نەبێت دەبێت دەست بە دزین یان سواڵكردن بكات لە شەقامەكان”.

بیلال واحید گەنجێكی ترە و رۆژانە كاری كرێكاری دەكات لە عەلوەی هەولێر و لێمان پرسی دەزانی ئەمڕۆ رۆژی چییە؟ وتی نەخێر، پێموت ئەمڕۆ رۆژی جیهانی گەنجانە واتا ئەو رۆژە تایبەتە بە تۆ، وتی: “جا چ لە ڕۆژێك بكەم بۆ من كە ئەگەر نەچوومایە ئیش پارەی پاكەتی جگەرەم پێ نەدەبوو، یان ئەگەر رۆژێك نەچمە كرێكاری ئەوا دایك و باوكم پارەی كیلۆیەكە تەماتەیان نییە بیكڕن هەرچەند باوكم فەرمانبەریشە بەس خۆتان دەزانن ئەوە مووچە نییە و حكومەتیش بۆ ئەو دۆخە خراپەی ژیان لێی خەوتووە”.
دەشتی جەمال، بەرپرسی فیدراسیۆنی سەراسەری پەنابەرانی عێراق، سەبارەت بە كۆچی گەنجان بۆ وڵاتانی ئەوروپا، ڕایگەیاند “ڕێژەی كۆچكردن لە عێراق ساڵ بەساڵ لە بەرزبوونەوەدایە، كە بارودۆخی ناجێگیری سیاسیی، قەیرانی حكومڕانی لەعێراق، نەبوونی هەلی كار بۆ گەنجان، هۆكار گەلێکن بۆ زیاد بوونی دیاردەی كۆچی گەنجان بۆ وڵاتانی ئەوروپا، بەپێی ئەو ئامارانەشی لە بەردەستی ئێمەدان لە ماوەی یەك ساڵدا، ١٧ هەزار و ٦٢٩ پەنابەری عێراقی ڕوویان لە توركیا كردووە و ژمارەیەكی زۆر لەو پەنابەرانە پەڕیونەتەوە بۆ وڵاتانی ئەوروپی”.

بەشی بکە لە
Previous Next
Close
Test Caption
Test Description goes like this