قوباد تاڵەبانی: رەتکردنەوەی پرۆژەیاسای میدیای ئەليکترۆنی دڵخۆشی کردم

0
613
قوباد تاڵه‌بانى، جێگرى سه‌رۆكى حكومه‌تى هه‌رێم

SNN-

جێگری سەرۆکی حکومەتی هەرێمی کوردستان دەڵێت: “رەتکردنەوەی پرۆژەیاسای رێکخستنی میدیای ئەليكترۆنی دڵخۆشی کردم”.

قوباد تاڵەبانی لە پەڕەی تایبەتی خۆی لە فەیسبوک نووسیوێتی: “زۆر کەس نیگەران بوون لە ناوەڕۆكی پرۆژەیاسای میدیای ئەليكترۆنی، بەڵام ئەوەی مایەی دڵخۆشی و گەشبینییە، کاردانەوەی ئەو كۆمەڵە زۆرەی هاوڵاتی و میدیا و نووسەر و چالاكوانەکان بوو لەسەر ماف و ئازادییەکان”.

ئاماژەی بەوەشکردووە “ئەمە ئاماژەی کۆمەڵگایەکی زیندووە كە هاووڵاتیان ئامادە نین دەستبەرداری مافە بنەڕەتی و گەردونییەکانی خۆیان بن کە ئازادی و ئازادی رادەربڕین لە سەرووی هەموویانەوەیە”.

ئەوەشی نووسیوە “زۆرێك لەو رۆژنامەنووس و میدیاكارانەی قسەم لەگەڵدا كردوون، رەخنە و نیگەرانی جدییان لە پرۆژەیاساكە هەبوو، هێشتا لە هەرێمی كوردستان خاوەن دەستوری تایبەت بەخۆمان نین، هەروەها لەم خولەی پەرلەمان و حكومەتیش بایی هێندە بارگرانی و كێشەی تەندروستی و ئابووری هەیە كە هەموو کاتی خۆمانی بۆ تەرخان بکەین”.

تاڵەبانی دەشڵێت “راستییەكی حاشا هەڵنەگر هەیە ئەویش هەبوونی دۆخێکی ئاژاوە و ژەهراوییە لەناو میدیا و سۆشیال میدیا، بەجۆرێك تەشهیر و ناوزڕاندن و سوکایەتی کردن بووەتە دیاردەیەکی رۆژانە، بەڵام لەمەشدا سۆشیال میدیای سپۆنسەركراو بە پارە و پولی سیاسی، بەرپرسیاری سەرەکین لەم دۆخە، ئەمەش دەرگایەكیتری گەندەڵییە”.

بەوتەی جێگری سەرۆکی حکومەت، رەنگە هەندێک کەس و لایەن پشتگیری یاسایەك بکەن كە کۆتایی بەو پاشاگەردانییە بهێنێت، بەڵام بەندە لەگەڵ ئەوەی یەكێكم لە قوربانییەکانی دیاردەی تەشهیر و ناوزڕاندن و لەهەموو بۆنەیەكدا بەراست و چەپدا هەر ئامانجم، بەڵام بە تەواوی دژی هەر پرۆژەیاسایەکم ئازادی رادەربڕین بەرتەسک بکاتەوە، پێشموایە بۆشایی یاسایی باشترە لە دانانی یاسایەك کە دەرفەتی ئەوەی تێدا بەدی بکرێت لەلایەن دەسەڵات و بەرپرسانەوە خراپ بەکاربهێنرێت.

دەشڵێت: “یەكێك لە كێشەكانی پرۆژەیاسای نیوەچڵ، دەرفەت رەخساندنە بۆ خراپ بەكارهێنانی، هەروەها دروستكردنی مەترسییە لەسەر هاووڵاتیان كە زۆریان تەنيا ئەكاونتەكانی خۆیان شك دەبەن بۆ دەردەدڵی، من كە خۆشبەختانە جگە لە پەیجی فەرمی خۆم، هیچ پەیج و ئەکاونت و میدیاکم نییە و هەموو میدیای كوردیش بەهی خۆم دەزانم، پێموایە ئەگەر یاسایەك هەبێ بۆ سزادانی میدیا و سۆشیال میدیا ئەوە لە داهاتوودا بەشێوەیەكی سەرەكی بەرۆكی دەزگای وەک ئاوێنە و هاوڵاتی و سپی میدیا و شار پرێس و كوردستان تایمز و هاوشێوەکانیان و سۆشیال میدیا بێ پشتو پەناکان دەگرێتەوە و كەناڵ و سۆشیال میدیای بەرپرسانی لێ پارێزراو دەبن، كەسیش دەستی بە پەیج و ئەكاونتی بێ ناونیشان و نهێنی ناگات”.

قوباد تاڵەبانی نووسیویشێتی: “دەستخۆشی لە كشاندنەوەی پرۆژەیاساكە دەكەم تا ئەگەینە قۆناغی دەستوریی تایبەت بەهەرێمی كوردستان”.

دەڵێت: “با لەبری یاسای میدیای ئەلیكترۆنی، پێكەوە كار لەسەر پڕكردنەوەی كەلێن و درزەكانی یاسا بەركارەكانیتر بكەین وەک یاسای رۆژنامەگەری و یاسای قەدەغەکردنی خراپ بەكارهێنانی ئامێرەكانی پەیوەندیكردن، كە ئەوەی دووەمیان زۆرجار بووەتە كێشە و بارگرانی بۆ نوسەر و میدیاكاران و لەبری یاسای رۆژنامەگەری بەو یاسایە زیندانی كراون، ئەگەر بۆشاییەكیش هەیە لەبارەی میدیای ئەليكترۆنی دەكرێت لەئێستادا لەو دوو یاسایەدا بەپێی ستانداردەكانی دنیای كراوە چارەسەر بكرێت و جێگەیان بكرێتەوە”.

 

بەشی بکە لە
Previous Next
Close
Test Caption
Test Description goes like this