هەڵمەتی بڕینی ئاوی زێدەڕۆ لە شاری هەولێر دەستیپێكردەوە
هه‌ڵمه‌تى بڕینى ئاوى زێده‌ڕۆ له هه‌ولێر | فۆتۆ: SNN
SNN – مەودا مستەفا
هەڵمەتی بڕینی ئاوی زێدەڕۆ لە شاری هەولێر بۆ جارى دووه‌م دەستیپێكردەوه، بەڕێوەبەری ئاوی هەولێریش ده‌ڵێت: “ئەو سەرپێچیيانەی كراونەتە سەر ئاو لایدەده‌ین و سەرپێچیكارانیش سزا دەدرێن”.
ئەمڕۆ چوارشه‌ممه لە شاری هەولێر بە ئامادەبوونی مەسعود كاڕەش، جێگری پارێزگاری هەولێر و بە بەشداری لایەنە پەیوەندیدارەكان هەڵمەتى بڕینی ئاوى راكێشراوى زێده‌ڕۆ لە گەڕەكی 32ی پارك لە شاری هەولێر دەستیپێكرد، پاش ئه‌وه‌ى لە ماوەی رابردوودا هەڵمەتێكی هاوشێوە لە گەڕەكی وەزیران ئەنجامدرا.
مه‌سعود كاڕه‌ش، جێگرى پارێزگارى هه‌ولێر له‌میانى به‌ڕێوه‌چوونى هه‌ڵمه‌ته‌كه‌دا رایگه‌یاند: “جگە لەوەی سەرپێچییەكە لادەدەین سەرپێچیكارانیش سزاده‌ده‌ین و پسوڵەیەكیان پێدەده‌ین بە چاككردنەوەی ئەو شوێنە، سزای پێبژاردنیش دەدرێت كە بڕەكەی لە نێوان 500 هەزار دینار تا 2 ملیۆن دینار دەبێت ئەگەر پابەندنەبێت و سەرپێچیيەكەی نەبڕێت، ئەگەر ئەو سەرپێچیيە دووبارە بكاتەوە سزاكەی زیاتر دەبێت”.
پێشتر فرسه‌ت سۆفى، پارێزگارى هه‌ولێر ره‌خنه‌ى له هاووڵاتییانى پارێزگاكه گرت له‌باره‌ى ئه‌وه‌ى ئاو به‌فیڕۆده‌ده‌ن و وتى: “ئه‌گه‌ر هه‌زاران پرۆژه‌ى تریشمان هه‌بێت، به‌ڵام نه‌توانین پارێزگارى له ئاو بكه‌ین ناتوانین كێشه‌ى ئاو چاره‌سه‌ر بكه‌ین، ئه‌گه‌ر ته‌واوى زه‌ریاى ئه‌تڵه‌سیش له به‌رده‌ستى ئێمه بێت به‌و بێپلانییه‌ى ئێستا له هه‌ولێر هه‌یه ناتوانین كێشه‌ى ئاو چاره‌سه‌ر بكه‌ین”.
پەرەپێدراوە و دروستکراوە