یاد نه‌قشبه‌ندى: دۆخى كۆرۆنا له‌ژێر كۆنترۆڵدایه‌ له‌ سلێمانى

0
957
تاقیگه‌یه‌كى كۆرۆنا له‌ سلێمانى | فۆتۆ: هه‌وراز ئه‌حمه‌د

SNN – هه‌وراز ئه‌حمه‌د

وته‌بێژى ته‌ندروستیى سلێمانى رایده‌گه‌یه‌نێت: به‌هۆى ئه‌و تێكه‌ڵاوییه‌ى له‌ رۆژانى چه‌ژنى قورباندا روویدا ژماره‌ى تووشبوون به‌ كۆرۆنا له‌ سلێمانى كه‌مێك زیادیكردووه‌، به‌ڵام هێشتا دۆخه‌كه‌ له‌ژێر كۆنترۆڵدایه‌ و جێگیره‌.

یاد نه‌قشبه‌ندى، وته‌بێژى ته‌ندروستیى سلێمانى به‌ SNNى راگه‌یاند: “دۆخى كۆرۆنا له‌ سنوورى پارێزگاى سلێمانى له‌ژێر كۆنترۆڵدایه،‌ ئه‌وه‌ى وایكرد كه‌مێك ئاماره‌كان به‌رزببنه‌وه‌ ئه‌و تێكه‌ڵاویه‌یه‌ له‌ رۆژانى چه‌ژنى قورباندا روویدا و ئاستى تاكپارێزى خاوبوویه‌وه‌ له‌لایه‌ن هاووڵاتییانه‌وه‌”.

وتیشى: “نه‌خۆشخانه‌كانى سلێمانى تواناى وه‌رگرتنى نه‌خۆشیان ماوه‌ و ئه‌و تووشبووانه‌ى سه‌ردانى نه‌خۆشخانه‌كان ده‌كه‌ن چاره‌سه‌رى ته‌واوه‌تیان پێده‌درێت، ئه‌و چاره‌سه‌رانه‌شى له‌ وڵاتانى پێشكه‌وتوودا بۆ كۆرۆنا به‌كاردێن ئێمه‌ش بۆ تووشبووان به‌كارمان هێناوه‌”.

وته‌بێژى ته‌ندروستیى سلێمانى ئه‌وه‌شى خسته‌ڕوو: “ئێمه‌ ناڵێن كۆرۆنا بنبڕده‌كه‌ین، به‌ڵام دڵنیایى ده‌ده‌مه‌ هاووڵاتییان ئه‌گه‌ر تاكپارێزى بكرێت ئه‌وا تووشبوون به‌ شێوه‌یه‌كى به‌رچاو كه‌مده‌بێته‌وه‌ و زۆربه‌ى قه‌ره‌وێڵه‌كانى نه‌خۆشخانه‌كان چۆڵده‌بن، بۆیه‌ پێویسته‌ چۆن له‌ رابردوودا هاووڵاتییان تاكپارێزییان كردووه‌ له‌ داهاتووشدا به‌رده‌وام بن، بۆ ئه‌وه‌ى ڤایرۆسه‌كه‌ ته‌شه‌نه‌ نه‌كات”.

له‌ باره‌ى ئه‌وه‌ى پێشبینيتان چیيه‌ بۆ رۆژانى داهاتوو، یاد نه‌قشبه‌ندى روونیكرده‌وه‌: “پێشبینى ئێمه‌ له‌ وه‌رزى سه‌رما و هه‌ركاتێكى دیكه‌ ده‌گه‌ڕێته‌وه‌ بۆ پابه‌ندبوونى هاووڵاتییان به‌ رێنمایه‌كان و تاكپارێزییه‌وه‌، ئێمه‌ش له‌ به‌ڕێوبه‌رایه‌تى ته‌ندروستیى سلێمانى هه‌موو ئاماده‌كارییه‌كمان كردووه‌ له‌ ئه‌گه‌رى زیادبوونى حاڵه‌ته‌كان، له‌ داهاتووشدا به‌ هه‌ما‌هه‌نگى له‌گه‌ڵ پارێزگارى سلێمانى نه‌خۆشخانه‌یه‌كى تایبه‌ت دروستده‌كه‌ین تایبه‌ت به‌ تووشبووانى كۆرۆنا”.

بەشی بکە لە
Previous Next
Close
Test Caption
Test Description goes like this