ماوەی سزاکەی لە زیندان تەواو دەکات؛ بەڵام دوژمنەکەی هەر دەیکوژێت

0
6227
ئالان محەمەد و عومەر عەبدوڵا، قوربانى | فۆتۆ: SNN

SNN – محەمەد مستەفا

لە ماوەی 15 کاتژمێریدا، دوو کەس لە دوو رووداوی جیادا بە گوللـە کوژران، یەکێکیان پیاوێکە کە دوژمنداربووە، ئەگەرچی پێشتر لەسەر کێشەیەکی کۆمەڵایەتی لە زیندان سزادراوە، بەڵام کێشەکانی کۆتایی نەهاتووە و لەلایەن دوژمنەکەیەوە کوژراوە و ئەوەی دیکەش مێردمنداڵێکە کە تەمەنی تەنیا 15 ساڵە.

پۆلیسی ڕاپەڕین لە رێگەی SNNەوە وردەکاری رووداوەکان ئاشکرادەکات، لەبارەی یەکەم رووداوەوە دەڵێت: “کوژراوەکە پیاوێکی تەمەن 56 ساڵە بەناوی عومەر عەبدوڵا، ئەو کێشەی کۆمەڵایەتی هەبووە و دوژمنەکانی دەستیان پێی گەیشتووە”.

شۆڕش ئیسماعیل، وتەبێژی پۆلیسی ڕاپەڕین روونیکردەوە: “پێشنیوەڕۆی ئەمڕۆ هەینی لە مەیدانی ناحیەی حاجیاوای قەزای ڕانیە عومەر عەبدوڵا لایەن کەسێکەوە دەستڕێژی گوللـەی لێکراوە و چەند گوللـەیەک بەر سەری کەوتووە و دەستبەجێ گیانی لە دەستداوە، قوربانیەکە دانیشتووی ناحیەی بێتواتەی قەزای ڕانیەیە”.

وتیشی: “دوای رووداوەکە بکوژەکە بۆ شوێنێکی نادیار هەڵاتووە و پۆلیس دەستیکردووە بە لێکۆڵینەوە بۆ دەستگیرکردنی”.

SNN لە بەدواداچوونەکانیدا زانیویەتی، عومەر عەبدوڵا لە ساڵی 2012 وە بەهۆی کێشەی کۆمەڵایەتی و دوژمنداریەوە لەگەڵ بنەماڵەیەکی ناحیەی بێتواتە چووەتە زیندان، سزاکەی پێنج ساڵ بووە، ئەگەرچی کۆتایی بە سزاکەی هێناوە، بەڵام دوژمنەکانی لەو بنەماڵەیەی کە کێشەی لەگەڵیدا هەبووە لێی خۆشنەبوون، کەسێک لە بنەماڵەکە وەک تۆڵەکردنەوە کوشتوویەتی”.

لەبارەی رووداوی دووەمەوە، وتەبێژی پۆلیسی ڕاپەڕین باسی لەوەکرد: “ئێوارەی دوێنێ پێنجشەممە کوڕێکی تەمەن 15 ساڵ بە ناوى ئالان محەمەد کە پیشەی شوان بووە لە کاتی لەوەڕاندنی مەڕەکانی لەسەر زێی بچوک لە قەزای پشدەر لە شوێنێکی نادیارەوە تەقەی لێکراوە و کوژراوە، دوای لێکۆڵینەوەی ورد پۆلیسی ڕاپەڕین بکوژەکەی دەستگیر کردووە”.

شۆڕش ئیسماعیل ئاماژەی بەوەشکرد: “بکوژى مێردمنداڵەکە دەستگیرکراوە، لەکاتی لێکۆڵینەوە لەگەڵیدا تۆمەتبارەکە دانی بە تاوانەکەیدا ناوە و بە وتەی خۆی: بەهەڵە تەقەیکردووە”.

بەشی بکە لە
Previous Next
Close
Test Caption
Test Description goes like this