دۆخى ته‌ندروستى زاخۆ خراپه‌: شۆفێرى بارهه‌ڵگرێك له‌ناو ئۆتۆمبێله‌كه‌یدا گیانى له‌ده‌ستداوه‌

0
640
پردى ده‌لال له‌ زاخۆ | فۆتۆ: Bahzad Sedari / Flickr

SNN

ئه‌ندامێكى په‌رله‌مانى كوردستان رایده‌گه‌یه‌نێت: دۆخى ته‌ندروستى زاخۆ زۆر خراپه‌ و ئامێر و پێداویستى پزیشكى پێویستى نییه‌، ئه‌ندامێكى ترى په‌رله‌مانى كوردستانیش ده‌ڵێت: له‌ چه‌ند رۆژى رابردوودا شۆفێرى یه‌كێك له‌و بارهه‌ڵگرانه‌ى كه‌ هاتوونه‌ته‌ ناو هه‌رێمى كوردستان به‌هۆى كۆرۆناوه‌ گیانى له‌ده‌ستداوه‌ له‌نێو ئۆتۆمبێله‌كه‌یدا.

ئه‌مڕۆ پێنجشه‌ممه‌ كۆبوونه‌وه‌ى ئاسایی په‌رله‌مانى كوردستان ده‌ستیپێكرد، له‌میانى ده‌ستپێكى كۆبوونه‌وه‌كه‌دا هێڤیدار ئه‌حمه‌د، ئه‌ندامى په‌رله‌مانى كوردستان له‌ فراكسیۆنى زه‌رد وتى: “دۆخى زاخۆ زۆر خراپه‌ له‌ڕووى ته‌ندروستى و بڵاوبوونه‌وه‌ى ڤایرۆسى كۆرۆناوه‌، ئه‌و ئامارانه‌ى ده‌وترێت رۆژانه‌ 50 كه‌س تووشده‌بێت راست نین، چونكه‌ رۆژانه‌ 500 كه‌س له‌ زاخۆ تووشده‌بن، پێداویستییه‌ پزیشكییه‌كانیش زۆر كه‌مبووه‌ته‌وه‌ به‌تایبه‌ت ئۆكسجین و ده‌رمان”.

ئه‌و ئه‌ندامه‌ى په‌رله‌مانى كوردستان باسى له‌ بابه‌تى هاتنى بارهه‌ڵگره‌كانى وڵاتى توركیا و په‌یوه‌ندى به‌ بڵاوبوونه‌وه‌ى ڤایرۆسى كۆرۆنا كرد و وتیشى: “رۆژانه‌ ده‌یان بارهه‌ڵگر دێنه‌ ناو خاكى هه‌رێمى كوردستان، شۆفێر هه‌یه‌ پێنج رۆژ له‌ناو خاكى هه‌رێمى كوردستاندا بووه‌، دواى ئه‌وه‌ پێیان وتووه‌: تووشى كۆرۆنا بوویت، خه‌ڵكێكى زۆرى تووشكردووه‌”.

به‌ وته‌ى هێڤیدار ئه‌حمه‌د: “پشكنینى ئه‌و شۆفێرانه‌ى كه‌ له‌ ده‌روازه‌ى ئیبراهیم خه‌لیله‌وه‌ دێنه‌ ناو خاكى هه‌رێم زۆر به‌شێوه‌یه‌كى ناڕێكوپێك و خراپ ده‌كرێت ئه‌مه‌ش بووه‌ته‌ هۆكارى هه‌ڵكشانى تووشبوون به‌ ڤایرۆسى كۆرۆنا”.

هه‌ر له‌وباره‌یه‌وه‌ حیكمه‌ت محه‌مه‌د، ئه‌ندامى فراكسیۆنى زه‌رد وتى: “دۆخى زاخۆ هێنده‌ خراپه‌ له‌ چه‌ند رۆژى رابردوودا شۆفێرێك به‌ كۆرۆنا له‌ناو بارهه‌ڵگره‌كه‌یدا مردووه‌، له‌به‌ر ئه‌وه‌ پێویسته‌ چاره‌سه‌رێك بۆ كێشه‌ى ئه‌و بارهه‌ڵگرانه‌ بدۆزرێته‌وه‌، تاوه‌كو دۆخى كۆرۆناش له‌ناو زاخۆ كۆنترۆڵ بكرێت”.

بەشی بکە لە
Previous Next
Close
Test Caption
Test Description goes like this