“له‌ چه‌مچه‌ماڵ ته‌رمى دوو خوشك دۆزرایه‌وه‌ كه‌ پێده‌چێت له‌لایه‌ن باوكیانه‌وه‌ كوژرابن”

0
663
یه‌كێك له‌ گۆڕستانه‌كانى سلێمانى | فۆتۆ: هه‌وراز ئه‌حمه‌د / SNN

SNN – عەلی حەمە سەعید
دوای ئەوەی بەهۆی كێشەیەكی كۆمەڵایەتییەوە لە ناحییەی شۆڕشی سەربە قەزای چەمچەماڵ دوو خوشك دیارنامێنن ته‌رمه‌كه‌یان له‌ گۆڕستانێكدا ده‌دۆزرێته‌وه‌، پۆلیسیش ده‌ڵێت: “پێده‌چێت له‌لایه‌ن باوكیانه‌وه‌ كوژرابن”.

محەمەد عەبدی، بەڕێوەبەری پۆلیسی قەزای چەمچەماڵ بە SNNی راگەیاند: “ئەمڕۆ زانیاریمان پێدرا تەرمی دوو كچ كە تەمەنیان لە نێوان 17 ساڵ و 20 ساڵدایە لە گۆڕستانێكی دەرەوەی ناحییەی شۆڕشی سەربە قەزای چەمچەماڵ دۆزراونەتەوە”.

له‌باره‌ى تۆمه‌تبارى رووداوه‌كه‌وه‌ محەمەد عەبدی وتیشى: “پێدەچێت ئه‌و دوو كچه‌ لە لایەن باوكیانەوە كوژاربن بەهۆی كێشەیەكی كۆمەڵایەتییەوە”.

بەڕێوەبەری پۆلیسی قەزای چەمچەماڵ ئه‌وه‌شى خسته‌ڕوو: “لە ئێستادا باوكی ئەو دوو كچە هەڵاتووە، به‌ڵام لە هەوڵی دۆزینەوە و دەستگیركردنیداین، هاوكات لیكۆڵینەوەی زیاتر لە رووداوەكە دەستیپێكردووە”.

له‌باره‌ى ورده‌كارى زیاترى رووداوه‌كه‌وه‌ محەمەد عەبدی ئه‌وه‌شى خسته‌ڕوو: “ئه‌و دوو كچه‌ دانیشتووى گوندێكن، ته‌رمه‌كه‌یان له‌ گۆڕستانێكدا شاردراوه‌ته‌وه‌، پاش وه‌رگرتنى فه‌رمانى دادوه‌ر ده‌ستبه‌ ده‌رهێنانى هه‌ردوو ته‌رمه‌كه‌ ده‌كه‌ین و ده‌یاننێرین بۆ پزیشكى دادوه‌رى به‌ مه‌به‌ستى توێكارى”.

بە گوێرەی زانیارییەكانی SNN كه‌ له‌ كه‌سانى نزیك له‌ بنه‌ماڵى قوربانییه‌كان وه‌ریگرتوون، “ئەو دوو كچە نزیكەی هەفتەیە لە ماڵەوە چوونەتە دەرەوە و دیارنەماون، ئەمڕۆش تەرمەكانیان دۆزراونەتەوە”.

 

 

بەشی بکە لە
Previous Next
Close
Test Caption
Test Description goes like this