کازمی: لیژنەیەک بۆ کارکردن لەسەر داواکارییەکانی هەڵەبجە پێکدەهێنین

0
143

عەلی حەمەسەعید/SNN

مستەفا کازمی سەرۆکوەزیرانی عێراق دوانیوەڕۆی ئەمڕۆ هەینی لەگەڵ پارێزگاری هەڵەبجە و بەڕێوەبەری گشتییەکان و کەسوکاری هەڵەبجە کۆبووەوە و لەلایەن ئازاد تۆفیق-ەوە 17 داواکاری هاووڵاتییانی پارێزگاکەی پێگەیەندرا.

بە گوێرەی ئەو زانیارییانەی کە دەست SNN کەوتووە، داواکارییەکان سەرەکیترین خاڵیان پرسی تەواوکردنی رێکارەکانی تایبەت بە پارێزگاکردنی هەڵەبجە، دابینکردنی بودجەیەکی تایبەت بۆ ئاوەدانکردنەوەی پارێزگاکە، بە نێودەوڵەتیکردنی مەرزە لاوەکییەکانی سنوورەکە، کردنەوەی بەڕێوەبەرە فیدراڵییە پێویستەکان لە پارێزگای هەڵەبجە، قەرەبووکردنەوەی کەسوکاری شەهیدانی کیمیابارانە.

لەدوای کۆبوونەوەکە کازمی لە کۆنفرانسێکی رۆژنامەوانیدا رایگەیاند: لیژنەیەک پێکدەهێنین بۆ کارکردن لەسەر داواکارییەکانی پارێزگاکە، وتیشی: پاڵپشتی هاووڵاتییانی هەڵەبجە دەکەین لە دابینکردنی خزمەتگوزارییەکانیاندا، هەڵەبجە زامێکە لە ویژدانی عێراق و مرۆڤایەتیدا ماوەتەوە.

سەبارەت بە شایستە داراییەکانی جوتیارانی هەڵەبجەش وتی: “هیچ جیاوازییەک لە نێوان جوتیارانی ئەو پارێزگایە و پارێزگاکانی دیکەی عێراق ناکەین و شایستە داراییەکانیان دابەشدەکەین”.

لەلایەکی دیکەوە ئازاد تۆفیق لە کۆنگرەیەکی رۆژنامەوانیدا رایگەیاند: “لەسەر ماف و قەرەبووی کەسوکاری کیمیابارانی هەڵەبجە داواکاریمان داوەتە سەرۆکوەزیران و پرسی پارەی گەنمی جوتیارانیشمان دراوەتە دەستی، چونکە خەڵکی ئەم ناوچەیە هەموو بژێوی ژیانی لەسەر کشتوکاڵە و دەبێت حکومەتی ناوەندی حسابی ئەوە بکات”.

وتیشی: سەردانەکەی سەرۆکوەزیرانی عێراق بۆ هەرێم و سەردانی بۆ پارێزگاکان و پاشان هەڵەبجە بۆخۆی ناساندنی هەڵەبجەیە وەک پارێزگار.

هەر بە گوێرەی زانیارییەکانی SNN، دوو هەفتەی دیکە شاندێکی هەڵەبجە دەچێتە بەغدا بۆ تاوتوێکردنی داواکارییەکانی پارێزگاکە.

بەشی بکە لە
Previous Next
Close
Test Caption
Test Description goes like this