یەکەم لێدوانی ئێران لەبارەی رێککەوتنەکەی بەحرەین و ئیسرائیل: کارێکی قێزەونیان کردووە

0
349

SNN

وەزارەتی دەرەوەی ئێران یەکەم لێدوانی خۆی لەبارەی رێککەوتنەکەی بەحرەین و ئیسرائیل و ئاساییکردنەوەی پەیوەندییەکانیان بڵاوکردەوە و دەڵێت: “کارێکی قێزەون و ناشرینیان کرد”.

وەزارەتی دەرەوەی ئێران لە بەیاننامەکەیدا دەڵێت: “ئەوەی دوێنێ کراوە قوربانیدانی گەلی فەلەستینی بنپێ کرد و بەحرەینییەکان پشتیان کردە هاووڵاتیانی خۆیان و گەلی فەلەستینیشیان پشتگوێخست”.

دوێنێ دۆناڵد ترەمپ سەرۆکی ئەمریکا لە تویتێکدا رایگەیاند: “ئیسرائیل و بەحرەینی هاوڕێمان رێککەوتنێکی ئاشتی لە نێوانیاندا واژوو دەکەن، ئەوەش دەبێتە دووەم وڵاتی عەرەبی کە لە 30 رۆژدا لەگەڵ ئیسرائیل رێککەوتنی ئاشتی واژوو بکات”.

سەرۆکی ئەمریکا و پاشای بەحرەین و سەرۆکوەزیرانی ئیسرائیل راگەیەندراوێکی هاوبەشیان بڵاوکردەوە کە تیایدا هاتووە: “ئەمە رێککەوتنێکی مێژووییە بۆ پێشخستنی رۆژهەڵاتی ناوەڕاست. دەستپێکردنی گفتوگۆ و دروستکردنی پەیوەندی راستەوخۆ لەنێوان هەردوو کۆمەڵگای بەحرەینی و ئیسرائیلیدا”.

ئەوەش خراوەتەڕوو: “کۆبوونەوەکە دەبێتەهۆی پێشخستنی ئابووری هەردوو وڵاتەکە و رۆژهەڵاتی ناوەڕاست دەباتە قۆناغێکی نوێوە، سەقامگیری و ئارامی لە ناوچەکەدا دروستدەکات”.

هەر لەو راگەیەندراوەدا سەرۆکی ئەمریکا سوپاسگوزاری خۆی نیشانی پاشای بەحرەین داوە بەوەی ساڵی رابردوو لە مەنامە کۆبوونەوەیەکی لوتکەی رێکخسرووە بە ئامانجی “ئاشتی و پێشخستنی ئابووری فەڵەستین”.

لە راگەیەندراوەکەدا بڵاویشکراوەتەوە: “بەحرەین و ئیسرائیل لە هەوڵەکانیان بەردەوام دەبن لەپێناو واژووکردنی لێکتێگەیشتنێک و دۆزینەوەی چارەسەرێکی درێژخایەن بۆ ناکۆکییەکانی فەڵەستین و ئیسرائیل”.

لە درێژەی راگەیەندراوەکەدا، سەرۆکوەزیرانی ئیسرائیل باسی لە مزگەوتی ئەقسا کردووە و وتوویەتی، “هەموو موسڵمانێکی ئاشتیخواز” دەتوانێت بەردەوام سەردانی ئەو مزگەوتە و شوێنە پیرۆزەکانی دیکە لە قودس بکات و ئەو شارە بە ڕووی تەواوی خاوەن بیروباوەڕەکاندا کراوەیە.

هاوکات پاشای بەحرەین و سەرۆکوەزیرانی ئیسرائیل سوپاسی دۆناڵد ترەمپیان کرد لە بەرامبەر “هەوڵەکانی بۆ بەدیهێنانی ئاشتی”، جەختکردنەوەی لە ئاڵنگارییە هاوبەشەکان و هەوڵەکانی بۆ نزیککردنەوەی وڵاتان لە یەکتری.

ئەوەش خراوەتەڕوو، شای بەحرەین لە رێوڕەسمی واژووکردنی رێککەوتنەکەی ئیمارات و ئیسرائیل لە 15ی ئەم مانگە لە کۆشکی سپی ئامادەیی دەبێت.

بەشی بکە لە
Previous Next
Close
Test Caption
Test Description goes like this