كوێستان محه‌مه‌د: هیوادارم سزاى له‌سێداره‌دان له هه‌رێمى كوردستان جێبه‌جێ نه‌كرێت
كۆنگره‌ى رۆژنامه‌وانى كوێستان محه‌مه‌د، وه‌زیرى كار و كاروبارى كۆمه‌ڵایه‌تى حكومه‌تى هه‌رێم | فۆتۆ: SNN
SNN – بڕیار محەمەد
وه‌زیرى كار و كاروبارى كۆمه‌ڵایه‌تى حكومه‌تى هه‌رێم رایده‌گه‌یه‌نێت: 40 سزادراو له زیندانى چاكسازى گه‌ورانى شارى سلێمانى تووشى كۆرۆنا بوون، ده‌شڵێت: هیوادارم سزاى له‌سێداره‌دان له هه‌رێمى كوردستان جێبه‌جێ نه‌كرێت”.
ئه‌مڕۆ چوارشه‌ممه كوێستان محه‌مه‌د، وه‌زیرى كار و كاروبارى كۆمه‌ڵایه‌تى حكومه‌تى هه‌رێم له‌دواى كۆتایی هاتنى كۆبوونه‌وه‌ى په‌رله‌مانى كوردستان كه به‌شدارى تێدا كرد كۆنگره‌یه‌كى رۆژنامه‌وانى سازكرد و رایگه‌یاند: “ئەمڕۆ پەرلەمانی كوردستان راپۆرتێكی زۆر باشیان لەبارەی چاكسازیەكان ئامادەكردبوو كە تێیدا پێشنیاری زۆر باش و تێبینی وردی تێدابوو كە دەكرێت ئێمە لە ئایندەدا بەهەند وەریبگرین و كاریان لەسەر بكەین، لەكۆتایی كۆبوونەوەكەشدا داوامان كرد لیژنەی تایبەتمەند لەگەڵمان بن بۆ جێبەجێكردنی پێشنیار و خاڵەكانی ناو راپۆرتەكە”.
وه‌زیرى كار و كاروبارى كۆمه‌ڵاتى هه‌رێم باسى له دۆخى بڵاوبوونه‌وه‌ى ڤایرۆسى كۆرۆنا له‌ناو چاكسازییه‌كانیشدا كرد و وتى: ” 40 سزادراو لە سلێمانی تووشی كۆرۆنا بوون و چاكبوونەتەوە، لە ژنان و منداڵان كەس تووش نەبووە، لە هەولێر چوار حاڵەت هەبوون لە چاكسازی گەوران و ژنان ئه‌وانیش چاكبوونەتەوە، لە دهۆك هیچ حاڵه‌تێك لە چاكسازییەكان نەبوون، به‌ڵام یەك پاسەوانی چاكسازی ژنان و منداڵان بە كۆرۆنا كۆچی دوایی كردووه”.
له‌باره‌ى جێبه‌جێكردنى سزاى له‌سێداره‌دان له هه‌رێمى كوردستان كوێستان محه‌مه‌د ئه‌وه‌شى خسته‌ڕوو :”هیوادارم سزای لەسێدارەدان جێبەجێ نەكرێت، بەڵام پرسی یاسایی پەیوەندی بە ئەنجوومەنی دادوەرییه‌وه هەیە”.
سەبارەت بە هەموواری بڕیاری لێبوردنی گشتی وه‌زیرى كار باسی لەوەشكرد: “یەكێك لە پێشنیارەكان لە راپۆرتەكە خراوەتەڕوو بڕیارى لێبوردنى گشتى بووه، بەڵام ئەوە بەرپرسیارییه‌تى نێوان ئێمە و پەرلەمان و ئەنجوومەنی دادوەریە پرۆژەیاسا ئامادە بكەین”.
لەبارەی سزادراوەكانی پارێزگاكانی تری عێراق كە لەهەرێم دەستگیركراون بە ماددەى تیرۆر ئه‌وه‌شى خسته‌ڕوو: “بە بڕیاری سەرۆكی حكومەت لیژنەیەكی باڵا دروستكراوە بۆ چارەسەركردنی كێشەكان، لیژنەكە پێشنیاریان كردووە ئەو كەسانەی زیندانی كراون بە ماددەی تیرۆر و خەڵكی پارێزگاكانی تری عێراقن بگوازرێنەوە بۆ شوێنى خۆیان و له ئێستادا چاوەڕوانی بڕیاری سەرۆكی حكومەتین”.
پەرەپێدراوە و دروستکراوە