پرۆژه‌ى هێنانى 100 پاس بۆ هه‌ولێر ونده‌بێت و وه‌زاره‌تى گواستنه‌وه‌ش لێى بێئاگایه‌

0
593
وێستگه‌یه‌كى پاس له‌ ئه‌ڵمانیان | فۆتۆ: Sustainable-Bus

SNN – بڕیار محەمەد
ماوه‌ى ساڵێك زیاتر تێپه‌ڕیووه‌ به‌سه‌ر ئه‌و به‌ڵێنه‌ى كه‌ پارێزگارى پێشووى هه‌ولێر داى به‌ هاووڵاتییان له‌باره‌ى هێنانى 100 پاسى مۆدێرن، وه‌زاره‌تى گواستنه‌وه‌ و گه‌یاندنیش ره‌خنه‌ له‌و بابه‌ته‌ ده‌گرێت و رایده‌گه‌یه‌نن: هیچ بابه‌تێكى له‌و شێوه‌یه‌ لاى ئه‌وان بوونى نییه‌.

ساڵی رابردوو نه‌وزاد هادى، پارێزگاری پێشووی هەولێر رایگەیاند: “100 پاسی مۆدێرن كە لەلایەن پارێزگاری دۆسڵدۆرفەوە بۆ هەولێر پێشنیار كراوه‌ ده‌هێننه‌ پارێزگاكه‌، وەك قۆناغی یەكەم 15 پاس دەهێنن و ئامادەكاری ته‌واو‌یش كراوه‌ بۆ ئه‌و بابه‌ته‌”، به‌ڵام زیاتر لە ساڵێك بەسەر ئه‌م بابه‌ته‌دا تێپه‌ڕیووه‌ و له‌ ئێستادا ئه‌و پارێزگاره‌ له‌ پۆسته‌كه‌ى نه‌ماوه‌، تا ئێستاش پاسەكان نەگەیشتوونەتە هەولێر و هیچ ئاسه‌وارێكى ئه‌و پرۆژه‌ و گرێبه‌سته‌ دیارنییه‌.

سه‌ڵاح جەوهەر، بەڕێوه‌بەری گشتی گواستنەوەی هەرێم له‌و باره‌یه‌وه‌ بە SNNی راگەیاند: “ئێمە وەك وەزارەتی گواستنەوە و گەیاندن دوور و نزیك پەیوەندیمان بەم بابەتەوە نییە، لە كاتی گرێبەستەكەی پارێزگاری هەولێر و پارێزگاری دۆسڵدۆرف هیچ راوبۆچوونی ئێمە وەرنەگیراوە، بۆیە نازانین ئەو پاسانە چەندن و چۆنن و بە چ شێوەیەك دێن”.

وتیشی: “رەنگە ئەگەر ئێمە پێشتر لە لیژنەكەدا بووینانه‌ و پرسیان بە ئێمە بكردایە ئێستا پاسەكان هاتبوون، بەڵام كە ئێمە كە لایەنی پەیوەندیدارین بۆ باتەكە و پرسمان پێ نەكراوە ئەوە ئەنجامەكەیەتی كە ساڵێك زیاتره‌ و كەس نازانێت چی بەسەر هاتووه‌؟ كەی دێت و گرێبەستەكەش چۆنە”؟

مانگی ئایارى ساڵى پار نەوزاد هادی، پارێزگاری پێشووی هەولێر لە كۆنگرەیەكی رۆژنامەوانیدا رایگەیاند: “بڕیار وایە 100 پاس كە لەلایەن پارێزگاری دۆسڵدۆرفەوە بۆ هەولێر پێشنیار كراون بهێنینه‌ شارى هه‌ولێر، لە ساڵی 2018وە سەرقاڵی ئەم بابەتەین و هێشتا پاسەكان نەهێنراون، بەڵام وەك قۆناغی یەكەم 15 پاس دەھێنرێن و ئامادەكاری بۆ ئەوە كراوە“.

وتیشی: “بابەتەكە كاتی پێویستە، چونكە دەبێت هێڵ بە هێڵ بیگوازینەوە، دەبێت بۆ ئەو بابەتە كۆمپانیایەك دابمەزرێنین و ئەو كۆستەر و پاسانەی لەو هێڵەدان، بەشدار بن، نامانەوێت ئەو خەڵكەی لەو هێڵانە كار دەكەن، زەرەرمەند ببن، بەڵكو دەمانەوێت هەم گۆڕانكاری بكرێ و ھەم خەڵكەكەش بەشدار بن”.

SNN زۆر هەوڵیدا پارێزگارى هه‌ولێر و ئه‌و كه‌سانه‌ى ئاگادارى ئه‌و بابه‌ته‌ن وه‌ربگرێت، به‌ڵام به‌شێكیان په‌یوه‌ندییه‌كه‌یان به‌رده‌ست نه‌بوو و به‌شێكیشیان ئاماده‌نه‌بوون له‌و باره‌یه‌وه‌ قسه‌ بكه‌ن.

بەشی بکە لە
Previous Next
Close
Test Caption
Test Description goes like this