بزوتنەوەی گۆڕان لەبەشداری حكومەتەوە بۆ ئەگەری جیابوونەوە و دووبەرەیی

0
304
لۆگۆى بزووتنه‌وه‌ى گۆڕان | فۆتۆ: SNN

SNN-عەلی حەمە سەعید

لەگەڵ ئەوەی تادێت ناكۆی و ناڕەزایەتییەكان لەبارەی بەشداری بزوتنەوەی گۆڕان لە بەشداریكردنی كابینەی نۆیەمی حكومەتی هەرێم بووەتە جێگەی ناڕەزایەتی ژمارەیەك لە پەرلەمانتار و ئەندامانی جڤاتی نیشتیمانی، هاوكات بێباكی بەرپرسانی باڵای گۆڕان لە ئاست نیگەرانییەكان بووەتە هۆی ئەوەی بزوتنەوەی گۆڕان بەرەو جیابوونەوە و دروستكردنی دووبەرەیی ببات.

غالب محەمەد، پەرلەمانتاری بزوتنەوەی گۆڕان لە پەرلەمانی عێراق كە لەبەرەی دژ بەبەشداری گۆرانن لە بەشداری كابینەی نۆیەی حكومەتی هەرێم بە SNNی ڕاگەیاند: بزوتنەوەی گۆڕان بۆ خزمەتكردنی هاووڵاتییان دروستبووە هەمیشە دەنگێكی ناڕەزایەتی هەبووە دژ بەو گەندەڵی و نادادیەی كە لە هەرێمی كوردستان دەگوزەرێت، بەڵام كاتێك دەبینین ئەم هەموو گەندەڵی و خراپتر بوونی باری گوزەرانی هاووڵاتییان لە كوردستان بەردەوامی هەیە و بزوتنەوەی گۆڕانیش بێدەنگە، ئەمە وای لە ئێمەی پەرلەمانتاری بەغدا كردووە بەیاننامەیەك دەربكەین و بە فەرمی داوای كشانەوەی گۆڕان لە كابینەی مەسرور بارزانی بكەین، چونكە نیەتی ئەنجامدانی چاكسازی لەم كابینەیەدا نابینین.

ئاماژەی بەوەشكرد، “زیاد لە دوو هەفتەیە ئێمە لەڕێگەی دەركردنی ئەو بەیاننامەیەوە بەفەرمی هەڵوێستی خۆمان ڕاگەیاندووە، بەڵام تا ئێستا لەلایەن ڕێكخەری گشتی و خانەی ڕاپەڕاندنەوە بەفەرمی وەڵام نەدراوینەتەوە بەڵام ئێمە هەر سورین لەسەر هەڵوێستی خۆمان و پاشەكشە ناكەین لەو هەڵوێستەمان، چونكە پێمانوایە كابینەی نۆیە خراپترین كابینەیە كە بزوتنەوەی گۆڕان بەناوی چاكسازییەوە بەشداری تێدا كردبێت، بەڵام نەك چاكسازیمان نەبینی بەڵكو هەتادێت گەندەڵی و نادادی زیاد دەكات و داهات كەمدەكات و مووچەی فەرمانبەران دەبڕدرێت”.

ئەو پەرلەمانتارەی بزوتنەوەی گۆران لە پەرلەمانی عێراق داوایەكیشی ئاراستەی پەرلەمانتارانی بزوتنەوەكەی كرد لە پەرلەمانی كوردستان بەوەی كە بە واژۆكردن لەسەر بانگهێشتكردنی (مەسرو بارزانی) بۆ پەرلەمان مێژوویەكی جوان بۆ خۆیان تۆمار بكەن، بۆیە بەشێوەیەكی گشتی بەردەوام بوونی ئەم دۆخەی كە لەئێستادا لە بزوتنەوەی گۆڕاندا دەگوزەرێت دەبێتەی هۆی ئەوەی كە زیانێكی زۆر لەخۆی بدات لە دەنگدانی داهاتوو زۆر زیانی بەردەكەوێت دواجار زیانیش لە ئۆپۆزسیۆنی سنورەكە دەدات، مێژووش ناوی ئەو كەسانە تۆماردەكات كە هۆكاربوون بۆ لاوازبوونی گۆڕان و ئەو زیانانەی كە بەهۆی ئەوانەوە بەریكەوتووە.

لای خۆیەوە نزار مەحمود، ئەندامی جڤاتی نیشتیمانی بزوتنەوەی گۆڕان بۆ SNNی ڕوونكردەوە، “تا ئێستا هیچ كۆدەنگۆیەک لە ناو جڤاتی نیشتیمانی بزوتنەوەی گۆڕان دروست نەبووە لەبارەی كشانەوەی بزوتنەوەی گۆڕان لە كابینەی نۆ، چونكە نامانەوێت ڕۆژێك لە حكومەت بین ڕۆژێك لەدەرەوەی حكومەت، بۆیە ئێمە دەمانەوێت چاكسازی لە حكومەتدا بكەین و بەو مەبەستەش بەشداری حكومەتمان كردووە”.

ئاماژەی بەوەشكرد، “ئێمە پێمانوایە لەم قۆناغەدا لەناو حكومەتدا بین دەتوانین چاكسازی بكەین نەك لەدەرەوەی حكومەت، بۆیە دەبێت ئەوەش بزانین كە ئەنجامدانی چاكسازی بەڕۆژێك و دوو ڕۆژ و تەنانەت بەساڵێكیش ئەنجامی چاكسازی دەرناكەوێت، بەڵام ئەوەی تێبینی دەكەین ئەم كابینەی حكومەتە نێتی ئەنجامدانی چاكسازی هەیە و ئەوە دەبێت هاووڵاتییان بڕیار بدەن”.

ئەو ئەندامەی جڤاتی نیشتیمانی گۆڕان ئەوەشی خستەڕوو، ئێمە مامەڵە لەگەڵ پارتی ناكەین بۆ بەڕێوەبردنی حكومەت بەڵكوو ئێمە هەر سێ‌ لایەنی سیاسی یەكێتی و گۆڕان و پارتی حكومەتمان پێكهێناوە، ئەگەر پارتی و یەكێتی نەیانەوێت چاكسازی بكەن ئەوا ئێمە هەڵوێستی خۆمانمان دەبێت.

بەڕای چاودێرانی سیاسی بەردەوامی بزوتنەوەی گۆڕان لەم دۆخەیدا درێژە ناكێشێت بزوتنەوەكە بەرەو جیابوونەوە و دوو بەرەیی دەبات، ئەوەش لە كاتێكدا كە پێش چەند ڕۆژێك (یوسف محەمەد) سەرۆكی فراكسیۆنی بزوتنەوەی گۆڕان لە پەرلەمانی عێراق ئەوەی بە SNN ڕاگەیاند بوو كە بە ڕوونی بە بزوتنەوەی گۆڕانمان ڕاگەیاندووە كە دەبێت لە حكومەت بكشێنەوە چونكە ئەم كابینەی حكومەتە نیەتی نیە چاكسازی ئەنجام بدات.

بە گوێرەی زانیارییەكانی SNNلەگەڵ ئەوەی سەرجەم ئەندامانی فراكسیۆنی بزوتنەوەی گۆڕان لە پەرلەمانی عێراق و هەروەها ژمارەیەك لە ئەندامانی فراكسیۆنی گۆڕان لەپەرلەمانی كوردستان و ژمارەیەك لە ئەندامانی جڤاتی نیشتیمانی و هەڵسوڕاوانی گۆڕان، لەگەڵ ئەوەن كە گۆڕان لە حكومەت بكشێتەوە، بەڵام لەبەرامبەردا ڕێكخەری گشتی بزوتنەوەی گۆڕان وزۆربەی ئەندامانی خانەی راپەڕاندن لەگەڵ مانەوەی گۆڕانن لە حكومەت.

بەشی بکە لە
Previous Next
Close
Test Caption
Test Description goes like this