مانگرتنی پزیشكان له‌ سلێمانى و هه‌ڵه‌بجه‌ و گه‌رمیان و ڕاپه‌ڕین ده‌ستیپێكرده‌وه‌

0
1002
مانگرتنى پزیشكان له‌ سلێمانى | فۆتۆ: هه‌وراز ئه‌حمه‌د / SNN

SNN – عەلی حەمە سەعید
بەهۆی جێبەجێنەكردنی بەڵێنەكەی حكومەت بە دابەشكردنی مووچە لە 30 رۆژ جارێك، لە ئەمڕۆوە جارێكی دیكە سەرجەم پزیشكانی نیشتەجێی خولاو لە نەخۆشخانە گشتیيەكانی سنووری پارێزگای سلێمانی، هەڵەبجە و ئیدارەكانی ڕاپەڕین و گەرمیان دەستیپێكردەوە.

د. ئاری عەلی، بەڕێوەبەری نەخۆشخانەی گشتی شەهید شەوكەتی حاجی موشیر لە قەزای سەیدسادق بە SNNی راگەیاند: “بەهۆی دابەشنەكردنی مووچەكانیان لەكاتی خۆیدا و جێبەجێنەكردنی ئەو بەڵێنەی پێیان درابوو بە دابەشكردنی مووچە 30 رۆژ جارێك، لە ئەمڕۆوە پزیشكانی نیشتەجێی خولاو لە سەرجەم نەخۆشخانەكانی سلێمانی و دەوروبه‌ری سلێمانی و هەڵەبجە و ئیدارەكانی گەرمیان و ڕاپەڕین دەستیان بە مانگرتن كردووەتەوە و بەشی فریاكەوتنی نەخۆشخانەكانیان جێهێشتووە”.

وتیشى: “مانگرتنی ئەم پزیشكانە گرفتێكی زۆری بۆ دروستكردوین بە تایبەت بۆ بەشی فریاكەوتنی نەخۆشخانەكان، لە ئێستادا كارمەندانی تەندروستی لە شوێنی ئەو پزیشكانە حاڵەتە كتوپڕەكان دەبینن، هاوكات هەر ئەمڕۆ لەلایەن بەشی فریكەوتنی خێرا ژمارە 122 ی نەخۆشخانەی فریاكەوتنی سلێمانییەوە پەیوەندیمان پێوەكرا كە هیچ حاڵەتێكی كتوپڕ رەوانەی سلێمانی نەكەین، چونكە لەوێش بەهۆی مانگرتنی پزیشكانی نیشتەجێی خولاو فشارێكی زۆریان لەسەرە و فریای هەموو حاڵەتەكان ناكەون، بۆیە ئەمەش گرفتێكی زۆری بۆ هاووڵاتیيان دروستكردووە”.

مانگرتنی ئەو پزیشكانە لە كاتێكدایە كە دابەشكردنی مووچە بە لێبڕینی لە%21 زیاتر لە 40 رۆژی تێپەڕاندووە، تا ئێستاش لەلایەن وەزارەتی داراییەوە هیچ وادەیەك بۆ دابەشكردنی مووچەی فەرمانبەرانی هەرێم رانەگەیەندراوە.

 

بەشی بکە لە
Previous Next
Close
Test Caption
Test Description goes like this