وێنه‌: یه‌كێتیی كاراتی سلێمانی سیمینارێكی له‌سه‌ر تووشبوون به‌ پێكانی یاریزانان ئه‌نجامدا

0
316
دیمەنێک لە سیمینارەکە

ئه‌رده‌ڵان محه‌مه‌د  -SNNsport

بۆ یه‌كه‌مجار له‌سه‌ر ئاستی هه‌رێمی كوردستان یه‌كێتیی كاراتی سلێمانی هه‌ستا به‌ئه‌نجامدانی سیمینارێك بۆ راهێنه‌رانی یاریه‌كه‌ له‌سه‌ر تووشبوونی یاریزانان به‌ پێكان و چۆنیه‌تی چاره‌سه‌ركردنی.

یه‌كێتیی كاراتی سلێمانی دوای ده‌ستكردنه‌وه‌ به‌چالاكییه‌كانی هه‌ستا به‌ئه‌نجامدانی ئه‌م سیمیناره‌ كه‌ راهێنه‌ران و یاریزانان دڵخۆشن به‌م چالاكییه‌، چونكه‌ سوودێكی زۆری هه‌یە بۆ ئه‌وه‌ی یاریزان له‌سه‌ر پێكانه‌كه‌ی له‌لایه‌ن راهێنه‌ره‌كه‌یه‌وه‌ ئاگاداربێت و زوو چاره‌سه‌ری بۆ بكرێت.

دیار جه‌بار سكرتێری یه‌كێتیی كاراتی سلێمانی ئه‌وه‌ی خسته‌ڕوو:” به ‌پێویستمانزانی كه‌ ئه‌م سیمیناره‌ بكه‌ینه‌وه‌ له‌سه‌ر توشبوونی یاریزان به ‌پێكان، چونكه‌ له‌ یاری كاراتیدا یاریزان زووتر تووشی پێكان ده‌بن، بۆیه‌ به ‌باشمانزانی له‌ رێگه‌ی مامۆستا سامان كه‌ مامۆستای په‌یمانگای وه‌رزشی سلێمانی و خوێندكاری ماسته‌ره‌ تایبه‌ت به‌ پێكانی وه‌رزشی یاریزانان، كه‌ یاریزانان كاراتی زیاتر له‌ ئه‌ژنۆیان تووشی پێكان ده‌بن، بۆ ئه‌وه‌ی كه‌ راهێنه‌ر چۆن مامه‌ڵه‌ له‌گه‌ڵ ئه‌و پێكانه‌ بكات كه‌ له‌ كاتی مه‌شق بێت یان كاتی پاڵه‌وانێتی بێت”.

له‌لای خۆیه‌وه‌ سامان بورهان مامۆستای په‌یمانگای وه‌رزشی سلێمانی رایگه‌یاند: ” كردنه‌وه‌ی ئه‌م جۆره‌ سیمینار و خولانه‌ به‌ تایبه‌تی بۆ راهێنه‌ران و یاریزانان زۆر گرنگه‌، له‌به‌رئه‌وه‌ی پێویسته‌ هه‌موو راهێنه‌رێك زانیاری هه‌بێت له‌سه‌ر ئه‌و پێكانانه‌ی كه‌ له‌ یاریزانه‌كانیدا روو ده‌دات و چۆن چاره‌سه‌ری ده‌كات به‌ تایبه‌تی له‌ یارییه‌ تاكه‌كاندا، بۆیه‌ پێویسته‌ راهێنه‌ر كه‌ یاریزانه‌كه‌ی تووشی پێكان دەبێت،چۆن مامه‌ڵه‌ی له‌گه‌ڵ بكات و چۆن چاره‌سه‌ری سه‌ره‌تایی بۆ بكات و بیگه‌ڕێنێته‌وه‌ سه‌ر ئاستی خۆی بۆ به‌شداریكردن له‌ پاڵه‌وانێتییه‌كان، له‌به‌رئه‌وه‌ ئه‌م كاره‌ی یه‌كێتیی كاراتی سلێمانی جێگه‌ی ده‌ستخۆشییه‌”.

شاخه‌وان ئه‌حمه‌د راهێنه‌ری كاراتی یانه‌ی پێشمه‌رگه‌ی سلێمانی دەڵێت:” كردنه‌وه‌ی ئه‌م سیمیناره‌ زۆر زۆر گرنگه‌ بۆ راهێنه‌ر، چونكه‌ ئێمه‌ی راهێنه‌ر زۆر گرنگه‌ كه‌ زانیاریمان هه‌بێت له‌سه‌ر تووشبوونی یاریزان به‌ پێكان، له‌به‌رئه‌وه‌ له‌سه‌ره‌تای پێكانه‌كه‌ی چاره‌سه‌ر بۆ بكه‌یت و تووشی پێكانی قورس نه‌بێت، به ‌پێچه‌وانه‌وه‌، ئه‌گه‌ر راهێنه‌ر زانیاری نه‌بێت له‌سه‌ر چۆنیه‌تی توشبوونی یاریزان به‌ پێكان ئه‌و كاته‌ یاریزانه‌كه‌ تووشی پێكانی زۆر مه‌ترسیدارتر ده‌بێت، هه‌رچه‌نده‌ ده‌بووایه‌ ئه‌مجۆره‌ سیمینارانه‌ پێَشتر ئه‌نجام بدرایه‌، به‌ڵام ئێستاش كاته‌كه‌ی گونجاو بوو بۆ ئێمه‌ی راهێنه‌ر”.

له ‌ئێستادا شاری سلێمانی یه‌كێكه‌ له‌و شارانه‌ی عێراق كه‌ یاری كاراتی له ‌به‌هێزترین ئاستیدایه‌ به‌جۆرێك كه‌ زۆربه‌ی یاریزانانی هه‌ڵبژارده‌ی عێراق له‌ یانه‌كانی پارێزگای سلێمانین، بۆیه‌ به‌رپرسانی یاریه‌كه‌ هه‌موو هه‌وڵێكیان بۆ ئه‌وه‌یه‌ كه‌ شاری سلێمانی له‌ لوتكه‌ی یاریه‌كه‌دا له‌سه‌ر ئاستی عێراق بمێنێته‌وه‌.

بەشی بکە لە
Previous Next
Close
Test Caption
Test Description goes like this