نوێترین زانیاری لەبارەی دەستگیركردنی بكوژی دوو خوشكەكەی چەمچەماڵ

0
4191

SNN-عەلی حەمە سەعید

قایمقامی قەزای چەمچەماڵ ئاماژە بەوەدەكات تا ئێستا ڕاپۆرتی پزیشكی دادی تایبەت بەهۆكار و چۆنیەتی كوشتنی ئەو دوو خوشكەی چەمچماڵ نەگەڕاوەتەوە هاوكات تا ئێستاش شوێنی نیشتەجێبوونی باوكی دوو كچەكەمان بۆ دەستنیشان نەكراوە بەڵام لەوە دڵنیاین كە لەدەرەوەی چەمچەماڵە، لە هەفتەی داهاتووشەوە چەند ڕێوشێونێكی دیكە دەگرینە بەر.

ڕەمەك ڕەمەزان، قایمقامی قەزای چەمچەماڵ بە SNNی ڕاگەیاند: هەوڵەكانمان بۆ دۆزینەوە و دەستگیركردنی بكوژی تاوانی دوو خوشكەكەی چەمچەماڵ بەردەوامی هەیە، بەڵام ئەوەی بووتە گرفت لەبەردەمماندا ئەوەی كە تا ئێستا ڕاپۆرتی پزیشكی دادی تایبەت بە هۆكار و چۆنییەتی كوشتنی ئەو دوو خوشكەمان بۆ نەگەڕاوەتەوە، هاوكات تا ئێستا نازانین باوكی ئەو دوو خوشكە لە كوێ‌ خۆی حەشارداوە بەڵام لەوە دڵنیاین كە لەدەرەوەی چەمچەماڵە.

ئاماژەی بەوەشكرد، “لەگەڵ دادوەر و لایەنە ئەمنییەكان بەردەوام لەسەر هێڵین بۆ كاركردن لەسەر ئەو دۆسیەیە، هەر بە فەرمانی دادوەریش لە ئەمڕۆ و سبەی و هەفتەی داهاتوو بە فەرمانی دادوەر، چەند ڕێوشوێنێكی دیكە دەگرینە بەر بۆ دۆزینەوەی ئەنجامدەری ئەو تاوانە قێزەونە، بەڵام لەبەر ڕەوتی لێكۆڵینەوە و لایەنی ئەمنی ناتوانم وردەكاری چۆنیەتی گرتنەبەری ئەو ڕێوشوێنانە ئاشكرا بكەم”.

قایمقامی چەمچەماڵ ئەوەشی خستەڕوو، هۆكاری نەگەڕانەوەی ڕاپۆرتی پزیشكی دادی پێدەچێت پەیوەندی بەو لێكۆڵینەوە كیمیایی و فیزایی و جەستەییەوە هەبێت كە بۆ قوربانیانی ئەو تاوانە ئەنجامدراوە، تا ئێستا ئەنجامەكان دەرنەچوون، بەڵام لە هەموو ئەگەرەكاندا ئێمە بەردەوامین لەكارەكانمان بۆ دزۆزینەوەی بكەرانی ئەو كارە نامرۆڤانەیە.

وتەكانی قایمقامی چەمچەماڵ لەكاتێكدایەكە لە دوو هەفتەی ڕابردوودا دوو كچی تەمەن 17 ساڵ و 19 ساڵ لە گوندی (برایم ئاغا)ی ناوچەی شوان كوژران و تەرمەكانیان لە گۆڕستانێكی كۆنی ناوچەكەدا شاردرابوونەوە، لەدوای پشكنین و توێكاری بۆ تەرمەكان كەسوكاریان ئامادەنەبوون وەریبگرنەوە، بۆیە لەلایەن ئیداری چەمچەماڵەوە و هاووڵاتییانەوە بەخاكسپێردرانەوە.

بەشی بکە لە
Previous Next
Close
Test Caption
Test Description goes like this