وەزیری تەندروستی “گرفتەکانی کەرتی تەندروستیی ڕاپەڕین چارەسەر دەکەین”

SNN- محەمەد مستەفا

ئەمڕۆ شەممە 3ی تشرینی یەکەم، وەزیری تەندروستی حکومەتی هەرێم سەردانی ئیدارەی ڕاپەڕینی کرد و رایگەیاند: کار بۆ تەواوکردنی نەخۆشخانەی 291 قەرەوێڵەی ڕانیە و نەخۆشخانەی تایبەت بە کۆڕۆنا دەکەن لە ئیدارەی ڕاپەڕین.

لە کۆنگرەیەکی رۆژنامەوانیدا بۆ دەزگاکانی راگەیاندن دکتۆر سامان بەرزنجی وەزیری تەندروستی حکومەتی هەرێم رایگەیاند: ئەوان لە رێگەی لیژنەیەکی هاوبەشیان لە وەزارەتی تەندروستی و وەزارەتی ئاوەدانکردنەوە پێکهێناوە سەبارەت بە دەرخستەی تەواوکردنی نەخۆشخانەی 291 قەرەوێڵەیی و خستنەڕووی کەم و کوڕی هەڵە تەکنیکیەکان کە دواتر بە راپۆرتێک بەرز دەکرێتەوە بۆ ئەنجومەنی وەزیران بۆ ئەوەی بڕیار لەسەر تەواو کردنی پڕۆژەکە بدرێت.

وتیشی “لەسەر دەرخستە و داوای تەندروستیی ڕاپەڕین ئەوان وەک وەزارەت کار بۆ دابینکردنی پێداویستیەکانی نەخۆشخانەی تایبەت بە کۆڕۆنا دەکەن کە لە ئێستادا ئەو نەخۆشخانەیە لە ناحیەی چوارقوڕنە لە قۆناغەکانی کۆتاییدایە”.

باسی لەوەشکرد: لە ئێستا حکومەتی هەرێم بودجەیەکی 3 ملیار دیناری بۆ وەزارەتی تەندروستی تەرخانکردووە بۆ رێکارەکانی بەرەنگاربونەوەی ڤایرۆسی کۆڕۆنا، بۆیە ئەوان لەو بودجەیە بڕە پارەی پێویست بۆ تەندروستیی ڕاپەڕین دابین دەکەن بۆ چارەسەری گرفتەکانی سەنتەرەکانی کۆڕۆنا لە ڕاپەڕین.