شۆفێرانى مه‌رزى په‌روێزخان داوا ده‌كه‌ن به‌هۆى شۆفێرى ئێرانییەوە بێ كار نه‌كرێن

0
158

SNN- سیروان حه‌سه‌ن

زیاتر له‌ 400 شۆفێرى تانكه‌رى سووته‌مه‌نى له‌ مه‌رزى په‌روێزخان داواده‌كه‌ن حكوومه‌تى هه‌رێم رێگه‌ نه‌دات به‌ هاتنه‌ ژووره‌وى تانكه‌رى ئێرانى بۆ گواستنه‌وه‌ى سووته‌مه‌نى، چونكه‌ به‌و شێوه‌یه‌ بێ كار ده‌بن. ئیداره‌ى گه‌رمیانیش ده‌ڵێت له‌ هه‌وڵى چاره‌سه‌رى كێشه‌كه‌داین.

كاوه‌ ئه‌حمه‌د شۆفێرى سووته‌مه‌نى له‌ مه‌رزى په‌روێزخان به‌ SNNى راگه‌یاند؛ بازرگانه‌كانى گواستنه‌وه‌ى سووته‌مه‌نى له‌ هه‌رێمى كوردستان به‌ تایبه‌تى ئه‌وانه‌ى له‌ رێگه‌ى مه‌رزى په‌روێزخانه‌وه‌ نه‌وت هه‌نارده‌ ده‌كه‌ن نیازیان هه‌یه‌ له‌ رێگه‌ى شۆفێرى ئێرانییه‌وه‌ سووته‌مه‌نى بگوازنه‌وه‌ بۆ وڵاتى ئێران.

وتیشى، “له‌ ئێستادا له‌سه‌ر سنوور شۆفێرى ئێرانى و كوردستانى باره‌کانیان ئاڵوگۆڕده‌كه‌ن، ئه‌گه‌ر رێگه‌ به‌ هاتنه‌ ژووره‌وى شۆفێرى ئێرانى بدرێت و لێره‌شه‌وه‌ هه‌ر ئه‌وان سووته‌مه‌نى بگوازنه‌وه‌ بۆ وڵاتى ئێران ئه‌وا زیاتر له‌ 400 شۆفێرى تانكه‌ر له‌ مه‌رزه‌كه‌ بێ كار ده‌بن”.

ئه‌و شۆفێره‌ باسیشى له‌وه‌كرد، هۆكارى رێگه‌دان به‌ هاتنه‌ ژووره‌وه‌ى تانكه‌رى ئێرانى بۆ گواستنه‌وه‌ى سووته‌مه‌نى بۆ ئه‌وه‌یه‌ له‌ رێگه‌ى ئه‌وانه‌وه‌ نرخه‌كه‌ى كه‌متر له‌ بازرگانه‌كانى نه‌وت ده‌كه‌وێت.

جه‌لال نورى سه‌رپه‌رشتیارى ئیداره‌ى گه‌رمیان به‌ وه‌كاله‌ت بهSNNى راگه‌یاند؛ سه‌باره‌ت به‌ گرفتى ئه‌و شۆفێرانه‌ى مه‌رزى په‌روێزخان له‌گه‌ڵ نوێنه‌رى شۆفێره‌كان و به‌ ئاماده‌بوونى لایه‌نه‌ په‌یوه‌ندیداره‌كان كۆبوونه‌ته‌وه‌ و لیژنه‌یان دروستكردووه‌ بۆ ئه‌وه‌ى به‌ مه‌یدانى سه‌ردانى مه‌رزه‌كه‌ بكه‌ن بۆ دۆزینه‌وه‌ى رێگه‌ چاره‌و چاره‌سه‌رى كێشه‌ى ئه‌و شۆفێرانه‌.

بەشی بکە لە
Previous Next
Close
Test Caption
Test Description goes like this