لە سلێمانی و هەڵەبجە چارەسەرێكی نوێ بۆ تووشبووانى كۆرۆنا بەكاردەهێنرێت

0
2050
نه‌خۆشخانه‌ى (شه‌هید تاهیر عه‌لى والى به‌گ) تایبه‌ت به‌ كۆرۆنا له‌ سلێمانى | فۆتۆ: SNN

SNN – عەلی حەمه‌سەعید
بەڕێوەبەری نەخۆشخانەی وەفا تایبەت بە چارەسەری تووشبووانی كۆرۆنا لە پارێزگای هەڵەبجە رایده‌گه‌یه‌نێت: دەستیانكردووە بە بەكارهێنانی جۆرە چارەسەرییه‌كی نوێ‌ بۆ تووشبووانی كۆرۆنا، ده‌شڵێت: “كاریگەری باشی هەبووە لە چاكبوونەوەی تووشبووان و بڕێكی باشیش لەو جۆرە چارەسەرییەمان بۆ دابینكراوە”.

د. ئاراس حەمەسەعید، بەڕێوەبەری نەخۆشخانەی وەفا تایبەت بە تووشبووانی كۆرۆنا لە پارێزگای هەڵەبجە بە SNNی راگەیاند: “پێشتر بۆ تووشبووانی ڤایرۆسی كۆرۆنا پرۆتۆكۆڵی دەرمانی (هایدرۆكسی كلۆرۆكوین) و چەند دەرمانێكی دیكەمان بەكاردەهێنا، ئەمە سەرەڕای پلازمای خوێنی ئەو كەسانەشمان به‌كارده‌هێنا كە تووشی نەخۆشییەكە بوون و دواتر چاكبوونەتەوە، بەڵام لە ئێستادا چارەسەرییه‌كی نوێ‌ بەكاردەهێنین كە كاریگەری زۆر باشی هەیە لە خێرا چاكبوونەوەی تووشبووانی كۆرۆنا”.

وتیشى: “ئەو چارەسەرییە نوێیەی كە بەكاریدەهێنین جۆرە حەپێكە بە ناوی (فاڤی پریڤایر) (Favipiravir)، ئەم جۆرە چارەسەرییە خراوەتە ناو پرۆتۆكۆڵی چارەسەری تووشبووانی كۆرۆناوە، هەموو ئەو نەخۆشخانەی كە لە ئێستادا لە نەخۆشخانەی وەفا خەوێندراون ئەو جۆرە چارەسەرییە وەردەگرن و ئەم چارەسەرییەش دژبە ڤایرۆسی كۆرۆنایە”.

بەڕێوەبەری نەخۆشخانەی وەفا لە پارێزگای هەڵەبجە ئەوەشی خستەڕوو: “هەرچەندە لەڕووی نرخەوە كەمێك نرخی گرانە و هەر پارچەیەك لەو حەبانە بە 300 هەزار دینارە، بەڵام خۆشبەختانە لە لایەن حكومەتەوە بڕێكی باشمان بۆ دابینكراوە و لە ئێستادا ئەو جۆرە دەرمانە بەكاردەهێنین و وازمان لە بەكارهێنانی هایدرۆكسی كلۆرۆكوین هێناوە، هاوكات لە نەخۆشخانەكانی شاری سلێمانیش هەمان ئەو جۆرە چارەسەرییە بەكاردەهێنرێت، چونكە پرۆتۆكۆڵێكی رێگەپێدراوی وەزارەتی تەندروستییە و دەكرێت لە هەموو هەرێمی كوردستان ئەو چارەسەرییە بەكار بهێندرێت”.

بەشی بکە لە
Previous Next
Close
Test Caption
Test Description goes like this