پەرلەمانتارێک “گێڕانەوەی موچە پاشەكەوتكراوەكان جگە لە خەونێكی شاعیرانە هیچی دیكە نییە”

0
639

SNN-عەلی حەمە سەعید

لەگەڵ ئەوەی حكومەتی هەرێم لەیاسای چاكسازی باسی لە گیڕانەوەی پاشەكەوتی مووچە و باشتركردنی سیستەمی مووچەی كردووە لە هەرێمی كوردستان، هاوكات تا ئێستاش زیاد لە 15 تریلیۆن دینار پارەی مووچەی فەرمانبەران لای حكومەت وەك پاشەكەوت بڕدراوە، بەڵام سەرۆكی لیژنەی دەستپاكی پەرلەمان دەڵێت: “گێڕانەوەی مووچە پاشەكەوتكراوەكان جگە لە خەونێكی شاعیرانە هیچی دیكە نییە”

شیرین ئەمین سەرۆکی لیژنەی دەستپاکی پەرلەمان بە SNNی راگەیاند: بە گوێرەی یاسای ژمارە ( 2 ) ی ساڵی 2020 كە بە یاسای چاكسازی ناسراوە، لە یەكێك لە بڕگەكانی ئەو یاسایەدا ئەوە هاتووە كە هەموو مووچەخۆرێك دەبێت ژمارە حسابییەكی بۆ بكرێتەوە بۆ ئەوەی كۆی گشتی مووچە پاشەكەوتكراوەكانی بڕواتە سەر ئەو ژمارە حسابیە و حكومەتیش لەكاتی باشبوونی دۆخی دارایی ئەو پارە پاشەكەوتكراوانە بگەڕێنێتەوە بۆ فەرمانبەران.

ئاماژەی بەوەشكرد، ئەم یاسایە لە 1/7/2020 بەركار بووە و كەوتووەتە بواری جێبەجێكردنەوە، بەڵام لەماوەی ئەم سێ‌ مانگەدا هیچ هەنگاوێك بۆ ئەم بابەتە لەلایەن حكومەتەوە نەنراوە، بۆیە ئەم بابەتی گێرانەوە پاشەكەوتی مووچەی فەرمانبەرانە لە خەونێكی شاعیرانە دەچێت و جێبەجێكردنی زۆر ئەستەمە و هێنانەكایەی ئەو بڕگەیە لە یاسای چاكسازی تەنها بۆ بێدەنگكردنی فەرمانبەران و بەڕێكردنی كاتە.

سەرۆكی لیژنەی دەستپاكی لە پەرلەمانی كوردستان ئەوەشی خستەڕوو: سیستەمی مووچە لە ئێستا و لە داهاتووشدا لە هیچ وڵاتێكی دنیا بوونی نەبووە و نابێت، كۆمەڵێك زاراوە هێندراونەتە ناو سیستەمی دارایییەوە لە هیچ فەرهەنگێكی دارایی بوونیان نییە وەك ( پاشەكەوتی مووچە، لێبڕینی ناچاری، خۆگونجاندن لەگەڵ داهات) و چەند زاراوەیەكی دیكە كە هەموو ئەمانە دەچنە چوارچێوەی نایاسایی لێبڕینی مووچەوە، بۆیە بەهۆی ئەوەی تا ئێستاش ئێمە وەك پەرلەمانتاران نازانین كۆی داهاتی هەرێم چەندە لەچیدا خەرجدەكرێت و چەندە قەرزكراوە، هەموو ئەمانە ئەوەمان پێدەڵێت كە هیچ هیوایەك نییە بۆ ئەوەی سیستەمی مووچە باشبكرێت ئەگەر لەمە زیاتر خراپتر نەبێت.

وتەكانی سەرۆكی لیژنەی دەستپاكی لە پەرلەمانی كوردستان لەكاتێكدا كە بە گوێرەی بەدواداچوونە داراییەكان لەماوەی پێنج ساڵی ڕابردوودا حكومەتی هەرێم بەناوی پاشەكەوتی مووچە و لێبڕینی مووچەوە بڕی 15 تریلیۆن و 72 ملیار دینار پارەی فەرمانبەرانی هەرێمی خواردووە.

بەشی بکە لە
Previous Next
Close
Test Caption
Test Description goes like this