نه‌خۆشی زه‌ردوويى له‌نێو گۆشتى ئاژه‌ڵاندا له‌ سلێمانى بڵاوبووه‌ته‌وه‌

0
320
گۆشتفرۆشێك له‌ پارێزگاى هه‌ڵه‌بجه‌ | فۆتۆ: SNN

SNN – هه‌ڵكه‌وت سه‌روه‌ت

به‌ڕێوه‌به‌رى كوشتارگه‌ى سلێمانى رایده‌گه‌یه‌نێت: نه‌خۆشی زه‌ردوويى له‌نێو گۆشتى ئاژه‌ڵاندا بڵاوبووه‌ته‌وه‌، ده‌شڵێت: “پێویسته‌ هاووڵاتییان خۆیان به‌دوور بگرن له‌ كڕینى گۆشت له‌سه‌ر شه‌قامه‌كان”.

د. شاڵاو عارف، به‌ڕێوه‌به‌ری كوشتارگه‌ی سلێمانی به‌ SNNى راگه‌یاند: “نه‌خۆشی زه‌ردوويی له‌ گۆشتی ئاژه‌ڵاندا زیادیكردووه له‌ پارێزگاى سلێمانى‌، ئێمه‌ له‌ كوشتارگه‌كه‌مان رێگریمان كردووه‌ له‌ بڵاوبوونه‌وه‌ی ئه‌و جۆره‌ نه‌خۆشییه، به‌ڵام گه‌ره‌نتى ئه‌و جۆره‌ گۆشته‌ ناكرێت كه‌ له‌ده‌ره‌وه‌ و دوور له‌ چاوى ئێمه‌ ده‌فرۆشرێت”.

وتیشى: “نه‌خۆشى زه‌ردوويى دوو جۆرى هه‌یه‌ یه‌كێكیان ده‌گوازرێته‌وه‌ بۆ مرۆڤ له‌ڕێگه‌ى گۆشتى ئاژه‌ڵه‌وه‌‌، له‌ ئێستاشدا هه‌ردوو جۆره‌كه‌ى بڵاوبووه‌ته‌وه‌”.

ئه‌و پزیشكه‌ هۆشدارى ده‌داته‌ هاووڵاتییان كه‌ خۆیان به‌دوور بگرن له‌ كڕینى گۆشتى سه‌ر شه‌قامه‌كان و ئاماژه‌ به‌وه‌ده‌كات: “پێویسته‌ هاووڵاتییان له‌ كڕینی گۆشتی سه‌ر شه‌قامه‌كان دووربكه‌ونه‌وه‌، چونكه‌ ئه‌م جۆره‌ نه‌خۆشییه‌ له‌ گۆشته‌كاندا به‌چاو هه‌ستی پێناكرێت و به‌هیچ شێوه‌یه‌كیش ئه‌و جۆره‌ گۆشتانه‌ ته‌ندروستنین كه‌ ره‌زامه‌ندی كوشتارگه‌كه‌یانی له‌سه‌ر نه‌بێت”.

به‌وته‌ى به‌ڕێوه‌به‌ری كوشتارگه‌ی سلێمانی، “له‌ ماوه‌ی رابردوودا دوو ته‌ن گۆشتی خراپ به‌هۆی نه‌خۆشی زه‌ردووییه‌وه‌ له‌ كوشتارگه‌كه‌یان ده‌ستیبه‌سه‌ردا گیراوه‌ و دواتر سووتێنراوه‌ و له‌ناو براوه‌”.

 

 

بەشی بکە لە
Previous Next
Close
Test Caption
Test Description goes like this