سامان به‌رزنجى: پێداچوونه‌وه‌ به‌ رێكاره‌كانى رووبه‌ڕووبوونه‌وه‌ى كۆرۆنادا ده‌كه‌ین

0
68
كۆنگره‌ى رۆژنامه‌وانى وه‌زیرى ته‌ندروستیى حكومه‌تى هه‌رێم و پزیشكانى پسپۆڕ | فۆتۆ: SNN

SNN – بڕیار محه‌مه‌د
وه‌زیرى ته‌ندروستیى حكومه‌تى هه‌رێمى كوردستان رایگه‌یاند: رێنمایمانداوه‌ به‌ پارێزگاره‌كان پێداچوونه‌وه‌ به‌ رێكاره‌كانى رووبه‌ڕووبوونه‌وه‌ى كۆرۆنادا بكه‌ن، وتیشى: “له‌دواى 1ى تشرینى یه‌كه‌مه‌وه‌ بڕیارى نوێ له‌باره‌ى چۆنیه‌تى به‌ڕێوه‌چوونى پرۆسه‌ى خوێندن له‌ هه‌رێمى كوردستان ده‌رده‌كه‌ین”.

ئه‌مڕۆ پێنجشه‌ممه‌ سامان به‌رزنجى، وه‌زیرى ته‌ندروستيى حكومه‌تى هه‌رێم له‌گه‌ڵ ژماره‌یه‌ك له‌ پزیشكانى پسپۆڕ و به‌ ئه‌زموونى هه‌رێمى كوردستان كۆبووه‌وه‌، به‌ مه‌به‌ستى راوێژكردن و پێداچوونه‌وه‌ به‌ رێنماییه‌كانى رووبه‌ڕووبوونه‌وه‌ى ڤایرۆسى كۆرۆنا به‌تایبه‌ت كه‌ بڵاوبوونه‌وه‌ى ئه‌و ڤایرۆسه‌ له‌ هه‌رێمى كوردستان له‌ ئێستادا زۆر زیادیكردووه‌.

له‌دواى كۆبوونه‌وه‌كه‌ كۆنگره‌یه‌كى رۆژنامه‌وانى ئه‌نجامدا و وتى: “هێشتاش ڤایرۆسى كۆرۆنا له‌ هه‌رێمى كوردستان له‌ دۆخى بڵاوبوونه‌وه‌ى فراواندایه‌، به‌داخه‌وه‌ هۆكارى سه‌ره‌كى ئه‌مه‌ش پابه‌ند نه‌بوونى هاووڵاتییانه‌”.

له‌باره‌ى پێداچوونه‌وه‌ به‌ رێكاره‌كانى رووبه‌ڕووبوونه‌وه‌ى كۆرۆنا سامان به‌رزنجى ئه‌وه‌شى خسته‌ڕوو: “له‌ كۆتا كۆبوونه‌وه‌ماندا چه‌ند رێنماییه‌كى نوێمانداوه‌ به‌ پارێزگاره‌كان بۆ پێداچوونه‌وه‌ به‌ رێكاره‌كانى رووبه‌ڕووبوونه‌وه‌ى كۆرۆنا، له‌ چه‌ند رۆژى داهاتوودا پارێزگاره‌كان رایده‌گه‌یه‌نن”.

ئاماژه‌ى به‌وه‌شكرد: “له‌ به‌روارى 1ى تشرینى دووه‌م، كۆبوونه‌وه‌ى لیژنه‌ى وزارى ئه‌نجام ده‌ده‌ین، له‌ كۆبوونه‌وه‌كه‌دا رێكار و رێنمایی و بڕیارى نوێ ده‌رده‌كه‌ین بۆ چۆنیه‌تى به‌ڕێوه‌چوونى پرۆسه‌ى خوێندن”.

هه‌ر له‌ كۆنگره‌كه‌دا وه‌زیرى ته‌ندروستى ئامارى رۆژانه‌ى ڤایرۆسى كۆرۆناى بڵاوكرده‌وه‌ له‌ هه‌رێمى كوردستان و وتى: “له‌ ماوه‌ى 24 كاتژمێرى رابردوودا هه‌زار و 308 كه‌س تووشى كۆرۆنا بوون، 17 تووشبووش گیانیان له‌ده‌ستداوه‌”.

 

بەشی بکە لە
Previous Next
Close
Test Caption
Test Description goes like this