یەكەم پرۆژەی بەرهەمهێنانی ماسی سەلەمون لە گوندێكی پێنجوێنە

0
557

SNN، عەلی حەمە سەعید

لە سروشتێكی جوان و ڕازاوەدا و كەشوهەوایەكی زۆر فێنك و لەباردا، گەنجێكی گوندی جۆمەرەسی ناحیەی ناڵپارێزی سەر بە قەزای پێنجوێن، ماوەی نۆ ساڵە پرۆژەیەكی بەخێوكردن و گەورەكردنی ماسی جۆری سەلەمونی دەستپێكردووە، كە بە وتەی خۆی یەكەم پرۆژەی لەو شێوەیەیە لە سنورەكەدا و ساڵانە توانای بەرهەم هێنانی سەدان تۆن ماسی هەیە.

جەمیل محەمەد، دانیشتووی گوندی جۆمەرەسی، لە SNNەوە باس لە بیرۆكەی كارەكەی دەكات و دەڵێت: هاوشێوەی زۆرێك لە گوندەكانی سنورەكە خاوەن سروشت و كەشوهەوایەكی لەبارین بۆ بەخێوكردن و بەرهەمهێنانی ماسی، بەڵام لە هەمووی گرنگتر خاوەن سەرچاوەیەكی ئاوین كە بە سەرچاوەی (چەقان) ناسراوە ئاوێكی زۆر ساردە و بە هەمیشەیی ئاوەكە بەردەوامە ئەمەش وایكرد كە ئێمە بتوانین سود لەو ئاوە وەربگرین بۆ بەخێوكردنی ماسی، سەرەتا لە ساڵی 2011 دەستم كرد بە دروستكردنی چەند حەوزێك بۆ بەخێوكردنی ماسی جۆری (كارب) بەڵام بەهۆی ئەوەی ئاوەكە زۆر سارد بوو ماسیەكان توانای ژیانیان نەبوو پرۆژەكەمان زۆر سەركەوتوو نەبوو.

ئاماژەی بەوەشكرد، هەر لەو ساڵەدا سەردانێكی هەورامانی ڕۆژهەڵاتی كوردستانم كرد كە كەشوهەوا و سەرچاوەی ئاوەكەیان هاوشێوەی ئێمەیە، بینیم لەوێ‌ ماسی جۆری (سەلەمون) بەخێودەكرێت، بۆیە بیرم لەوەكردەوە كە دەبێت منیش هەمان كار بكەم، بۆیە خۆشبەختانە دەستم بە هێنانی پەنجەماسیكرد لە ئێرانەوە كە كێشی هەریەك لەو پەنجە ماسیانە نزیكەی 50 گرامە، ئەمەش نزیكەی 11 مانگی دەوێت بۆ بەخێوكردن تا دەبێت ماسییەكی یەك كیلۆی بەڵام ماسیەكی بەتام و چێژ و تەواو سروشتی بەرهەم دەهێنین كە زۆر جیاوازە لەو ماسیانەی لە حەوزەكانی دیكە بەرهەم دەهێندرێت.

ئەو خاوەن پرۆژە، ئەوەشی خستەڕوو، ماسی سەلەمون چەند تایبەتمەندیەكی خۆی هەیە كە لە ماسییەكانی دیكە نییە وەك ئەوەی ئەم ماسییە دڕكی زۆر كەمە و گۆشتی زۆرە و پولەكەی زۆر كەمە و چەرمەكەشی دەخورێت جۆرە چەوریەكی تێدایە چەورییە زیان بەخشەكان دەتوێنێتەوە و بۆ مرۆڤ زۆر سود بەخشە، بۆیە ئەم ماسیەی ئێمە كڕیاری تایبەتی خۆی هەیە هەرچەندە شوێنەكەیان زۆر دوورە و ڕێگاوبانەكانمان زۆر سەختن بەڵام كڕیارەكانمان لە سلێمانی قەرەداغ و گەرمیان و هەڵەبجە و تەنانەت لە هەولێریشەوە دێن ماسیمان لادەبەن چونكە دەزانن بە شێوەیەكی سروشتی بەخێویان دەكەین.

ئەو گەنجەی دانیشتووی گوندی جۆمەرەسی ئەوەشی خستەڕوو، ئەگەر حكومەت هاوكارمان بێت و لە كاتی هێنانی پەنجە ماسی لە مەرزەكانەوە گرفتمان بۆ دروست نەكات و ڕێگاوبانەكان بۆ چاك بكەن، دەتوانین چەندین پرۆژەی هاوشێوەی ئەم پرۆژەیە دروست بكەین ئەو كات دەتوانین بەشی پێداویستی بازاڕەكانی هەرێم لە ماسی سەلەمون بە شێوەیەكی سروشتی بخەینە بازاڕەوە و هەلیكاریش بۆ سەدان كەس بڕەخسێنین.

بەشی بکە لە
Previous Next
Close
Test Caption
Test Description goes like this